ភ្នំពេញៈ មន្ត្រីសាលារាជធានីភ្នំពេញបានឱ្យដឹងថា រដ្ឋបាលរាជធានីភ្នំពេញបានសម្រេចជ្រើសរើសកម្មករប្រមូលសំរាមថ្មី ដើម្បីសម្អាតទីក្រុងឡើងវិញ តែនៅអំពាវនាវឱ្យកម្មករចាស់វិលមកធ្វើការវិញ ខណៈពួកគេនៅតែបន្តធ្វើកូដកម្មនោះ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានប្រាប់ ភ្នំពេញ ប៉ុស្តិ៍ ពីម្សិលមិញថា ពេលនេះរដ្ឋបាលរាជធានីភ្នំពេញកំពុងជ្រើសរើសកម្មករប្រមូលសំរាមថ្មីបានបណ្តើរៗហើយ ប៉ុន្តែលោកមិនទាន់បានបញ្ជាក់ពីចំនួនកម្មករថ្មីទេ។
លោកថា៖ «ការជ្រើសរើសនេះគឺបត់បែនតាមស្ថានការណ៍ក្នុងការដោះស្រាយ ហើយកម្មករចំនួនប៉ុន្មាននាក់ ដែលយើងត្រូវជ្រើសរើសនោះយើងមិនទាន់អាចជម្រាបបាននៅឡើយទេ ដោយសារទន្ទឹមនឹងការជូនដំណឹងជ្រើសរើសកម្មករថ្មីនេះសាលាក្រុងក៏នៅតាមដានមើលកម្មករជាបុគ្គលិកក្រុមហ៊ុនស៊ីនទ្រីកំពុងធ្វើកូដកម្មនោះមានការភ្ញាក់រឭកបានកម្រិតណា...»។
បើតាមលោក ម៉េត មាសភក្តី ការជ្រើសរើសកម្មករថ្មីបន្ថែមគឺអាស្រ័យលើការខ្វះខាត ប៉ុន្តែយន្តការដោះស្រាយឱ្យទីក្រុងស្អាតនោះត្រូវតែឱ្យមានដំណើរការឡើងវិញ។
លោក ម៉េត មាសភក្តី បានថ្លែងថា៖ «...យើងមិនអាចបន្តអនុញ្ញាតឱ្យអ្នកយកសំរាមធ្វើជាចំណាប់ខ្មាំងដើម្បីតថ្លៃលើការទាមទារផ្ទុយពីច្បាប់ឡើយ។
រដ្ឋបាលរាជធានីបានព្យាយាមសម្របសម្រួល ពន្យល់ណែនាំគ្រប់ទិដ្ឋភាព រួមទាំងទិដ្ឋភាពច្បាប់ការងារ...កម្លាំងពលកម្មថ្មីត្រូវតែបង្ខំចិត្តអនុវត្តដើម្បីកែប្រែស្ថានការណ៍នៃការសម្អាតទីក្រុងឡើងវិញ»។
ទោះជាយ៉ាងណា លោកបានអំពាវនាវឱ្យកម្មករប្រមូលសំរាមចាស់ភ្ញាក់រឭក និងបញ្ឈប់ការទាមទារខុសច្បាប់ការងារ ហើយវិលមកធ្វើការវិញ។
ទន្ទឹមនឹងនេះសាលាក្រុងក៏កំពុងត្រៀមកម្លាំងពលកម្មរាប់រយនាក់ និងរថយន្តបន្ថែមប្រមាណ ៧០ គ្រឿង ដើម្បីប្រមូលសំរាមពីទីក្រុងភ្នំពេញផងដែរ។
លោក ម៉េត មាសភក្តី បានបញ្ជាក់ថា៖ «យន្តការដែលយើងត្រូវការដោះស្រាយបញ្ហាសំរាមយូរអង្វែងក៏នឹងកៀកខិតជិតបញ្ចប់ដែរ មានន័យថា ក្រុមហ៊ុនដែលយើងគ្រោងជ្រើសរើសចំនួន ៣ ក្រុមហ៊ុន ដើម្បីធ្វើប្រតិបត្តិការប្រមូលសំរាមរបស់យើងក្នុង ៣ តំបន់ ដែលយើងគ្រោងធ្វើការបែងចែក...»។
លោក ម៉ី ផាន អគ្គលេខាអធិការនៃសហជីពវិស័យទេសចរណ៍នៃក្រុមហ៊ុនស៊ីនទ្រីបានថ្លែងពីម្សិលមិញនេះថា កម្មករនៅតែប្រមូលផ្តុំគ្នាខាងមុខក្រុមហ៊ុនស៊ីនទ្រីដដែល ដោយមានចាក់ធុងបាសកម្សាន្តផង។ រីឯដំណោះស្រាយក៏មិនទាន់មាន និងការចរចាគ្នាបន្តក៏មិនទាន់មានដែរ ។
ប្រធានមន្ទីរការងារ និងបណ្តុះបណ្តាលវិជ្ជាជីវៈរាជធានីភ្នំពេញលោក ជួន វុឌ្ឍី បានឱ្យដឹងពីម្សិលមិញថា ការចរចា ៣ ថ្ងៃកន្លងមក មិនទាន់សះជាទេ តែនៅរង់ចាំបន្តដោះស្រាយទៀត។
លោកថា៖ «ខាងក្រុមហ៊ុនមិនបានបញ្ឈប់កម្មករណាម្នាក់នោះទេ ប៉ុន្តែកម្មករខ្លួនឯងទេដែលមិនព្រមចូលធ្វើការ យើងបានជួប និងពន្យល់ពួកគាត់ ប៉ុន្តែពួកគាត់មិនស្តាប់យើងទេ»។
ករណីជ្រើសរើសកម្មករថ្មីខណៈកម្មករចាស់មិនទាន់ឈប់នេះ លោកមេធាវី លី ច័ន្ទតុលា បានថ្លែងពីម្សិលមិញថា បើពិនិត្យលើច្បាប់ការងារមានគោលការណ៍ ២ ដែលទី ១ គឺក្នុងករណីកម្មករកំពុងធ្វើកូដកម្មគឺគេហាមនិយោជកជ្រើសរើសបុគ្គលិកថ្មីមកជំនួសកូដករ ប៉ុន្តែច្បាប់នេះក៏គេមានចែងផងដែរថា ក្នុងករណីពិសេសដែលក្រុមហ៊ុននោះផ្តល់សេវាដែលគេចែងថាសេវាជាសារវន្ត ឬផ្តល់សេវាជាអប្បបរមាគឺអាចបាន។
ក្នុងករណីក្រុមហ៊ុននេះផ្តល់សេវាជាសារវន្តគឺច្បាប់អនុញ្ញាតឱ្យនិយោជកមានសិទ្ធិក្នុងការជ្រើសរើសកម្មករថ្មីមកជំនួសកម្មករដែលជាកូដករនេះ។ ករណីដែលផ្អាកការផ្គត់ផ្គង់សេវាមានការប៉ះពាល់ទៅដល់សណ្តាប់ធ្នាប់សាធារណៈ ឬក៏សុខភាពសាធារណៈនោះគឺគេអាចជ្រើសរើសបុគ្គលិកជំនួសបាន។
លោកថា៖ «អ្វីដែលសាលារាជធានីភ្នំពេញធ្វើគឺស្របទៅនឹងបញ្ញត្តិដែលមានចែងក្នុងច្បាប់ស្តីពីការងារឆ្នាំ ១៩៩៧»។
គួរបញ្ជាក់ផងដែរថា កម្មករប្រមូលសំរាមរបស់ក្រុមហ៊ុនស៊ីនទ្រីប្រមាណ ២ ០០០ នាក់ បានចាប់ផ្ដើមតវ៉ាចាប់ពីថ្ងៃទី ២ ខែតុលា មកដោយស្នើឱ្យក្រុមហ៊ុនដោះស្រាយនូវសំណូមពរ ៥ ចំណុច រួមមានប្រាក់បំណាច់អតីតភាពការងារ ប្រាក់សំណងជំងឺចិត្ត ប្រាក់ជួសការជូនដំណឹងមុន ប្រាក់ខែចុងក្រោយ និងការឈប់សម្រាកប្រចាំឆ្នាំដែលនៅសេសសល់។
លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ មិនអាចសុំការអត្ថាធិប្បាយបានទេ ដោយសារមិនមានអ្នកទទួលទូរស័ព្ទពីម្សិលមិញ។
ក៏ប៉ុន្តែលោក ឃួង ស្រេង អភិបាលក្រុងភ្នំពេញបានផ្ញើសារទៅកាន់កម្មករទាំងនោះពីម្សិលមិញថា មិនដូចការគិតរបស់គាត់ទេដែលបារម្ភថា ប្រាក់អតីតភាពការងារពួកគាត់បាត់បង់នោះ។
ប៉ុន្តែក្រសួងការងារបានពន្យល់ហើយថា ប្រាក់អតីតភាពការងារនេះនឹងត្រូវបានផ្តល់ជូនជាដំណាក់ៗ ហើយពួកគាត់នៅតែទទួលបានឱកាសការងារថ្មីនៅពេលក្រុមហ៊ុនចំនួន ៣ បើកប្រតិបត្តិការប្រមូលសំរាម៕