.jpg)
រដ្ឋបាលខណ្ឌសែនសុខ បានចែកអំណោយជូនដល់បងប្អូនប្រជាពលរដ្ឋ ដែលត្រូវបិទខ្ទប់ដោយសារការឆ្លងរីករាលដាលជំងឺកូវីដ-១៩ ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ កាលពីថ្ងៃទី ១៦ មេសា ២០២១ នឹង កម្មវិធីតេឡេក្រាម ។ រូបថត រដ្ឋបាលខណ្ឌសែនសុខ
ភ្នំពេញៈ សាលារាជធានីភ្នំពេញបង្កើតក្រុមតេឡេក្រាមដើម្បីផ្តល់ឱកាសឲ្យពលរដ្ឋដែលខ្វះខាតអាចទាក់ទងស្នើសុំស្បៀងទាន់ពេលវេលាក្នុងអំឡុងពេលបិទខ្ទប់ ខណៈអភិបាលរាជធានី បញ្ជាឲ្យបញ្ចេញអង្ករប្រមាណ ១៤០ តោន ទុកបែងចែកទៅតាមខណ្ឌទាំង ១៤ នៅរាជធានីភ្នំពេញ។
តាមសេចក្តីប្រកាសរបស់គណៈកម្មការជាតិគ្រប់គ្រង និងដឹកនាំការអនុវត្តវិធានការបិទខ្ទប់ "គ.ប.ខ." រាជធានីភ្នំពេញបានប្រកាសថា «ប្រសិនបងប្អូនកំពុងជួបប្រទះនូវបញ្ហាខ្វះខាតនូវស្បៀងអាហារប្រចាំថ្ងៃចាំបាច់ជាបន្ទាន់ នៅក្នុងអំឡុងពេលនៃការបិទខ្ទប់នេះសូមបងប្អូនជូនដំណឹងមកគណៈកម្មការជាតិគ្រប់គ្រង និងដឹកនាំការអនុវត្តវិធានការបិទខ្ទប់ “គ.ប.ខ.” តាមរយៈក្រុមតេឡេក្រាម «តម្រូវការបន្ទាន់នូវជំនួយស្បៀងចាំបាច់ (គ.ប.ខ.)»។
ប៉ុន្តែគណៈកម្មការនេះបានបញ្ជាក់ថា មុននឹងទទួលបានអំណោយនេះ សូមពលរដ្ឋបញ្ជាក់ឲ្យបានច្បាស់លាស់អំពីចំនួនគ្រួសារ ស្ថានភាពគ្រួសារ និងមុខរបររួមនឹងទីតាំងស្នាក់នៅ (ផ្ទះ ផ្លូវ សង្កាត់ ខណ្ឌ) និងលេខទំនាក់ទំនងភ្ជាប់មកជាមួយ ។
ជាមួយនឹងការបង្កើតក្រុមការងារនេះ លោក ឃួង ស្រេង អភិបាលរាជធានីភ្នំពេញ នៅយប់ថ្ងៃទី ១៨ ខែ មេសា ឆ្នាំ ២០២១ បានថ្លែងថា លោកនាយករដ្ឋមន្ត្រី ហ៊ុន សែន បានបញ្ចេញអង្ករ ១៤០ តោនទៅខណ្ឌទាំង ១៤ ដើម្បីចែកជូនប្រជាពលរដ្ឋខ្វះខាត នៅក្នុងមូលដ្ឋាន តាមរយៈសំណើនានា ដែលទទួលបានពីក្រុមការងារ។
លោកបានបញ្ជាក់ថា៖ «អង្ករដែលជាអំណោយរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រមាណ ១៤០ តោននេះនឹងដឹកទៅកាន់ខណ្ឌទាំង ១៤ ដោយក្នុង ១ ខណ្ឌចំនួន ១០ តោននៅថ្ងៃទី ១៩ ខែ មេសា ឆ្នាំ ២០២១ ដើម្បីទុកឲ្យអភិបាលខណ្ឌយកទៅចែកជូនប្រជាពលរដ្ឋដែលខ្វះខាតស្បៀងអាហារ»។
ក្រៅពីនេះ លោក ឃួង ស្រេង ក៏បានណែនាំឲ្យអភិបាលខណ្ឌទាំងអស់ត្រូវតាមដានឲ្យបានជាប់ជាប្រចាំលើបណ្តាញសង្គមហ្វេសប៊ុក ដើម្បីពិនិត្យមើលការដង្ហោយហៅរកជំនួយពីសំណាក់ប្រជាពលរដ្ឋដែលខ្វះខាតក្នុងអំឡុងពេលបិទខ្ទប់៕
