ភ្នំពេញៈ សាលារាជធានីភ្នំពេញបានបើកកិច្ចប្រជុំពិភាក្សាពីសំណើសុំធ្វើបទបង្ហាញស្តីពីប្រព័ន្ធគ្រប់គ្រងសំរាម និងកាកសំណល់រឹង ខណៈកិច្ចពិភាក្សានេះនឹងឈានទៅរកការរៀបចំបង្កើតប្រព័ន្ធគ្រប់គ្រងសេវាប្រមូលសំរាមតាមប្រព័ន្ធបច្ចេកវិទ្យា (App) សម្រាប់ប្រើប្រាស់ក្នុងទូរស័ព្ទដៃ។
លោក ហួត ហៃ អភិបាលរងរាជធានីភ្នំពេញបានដឹកនាំកិច្ចប្រជុំកាលពីម្សិលមិញស្តីពីសំណើសុំធ្វើបទបង្ហាញស្តីពីប្រព័ន្ធគ្រប់គ្រងសំរាម និងកាកសំណល់រឹងរបស់ក្រុមហ៊ុន Optistech Co.,Ltd នៅសាលារាជធានីភ្នំពេញ ដោយមានអ្នកពាក់ព័ន្ធជាច្រើនរូបចូលរួម។
លោក នួន សំណាវុធ អភិបាលរដ្ឋាករស្វយ័តគ្រប់គ្រងសំរាមសំណល់រឹង រាជធានីភ្នំពេញបានប្រាប់ភ្នំពេញប៉ុស្តិ៍ថា កិច្ចប្រជុំនេះធ្វើឡើងដើម្បីពិភាក្សាជុំវិញការបង្កើតប្រព័ន្ធគ្រប់គ្រងសេវាប្រមូលសំរាមតាមប្រព័ន្ធបច្ចេកវិទ្យា ( App) ដែលអាចប្រើប្រាស់បានក្នុងទូរស័ព្ទដៃអតិថិជន ជុំវិញសេវាប្រមូលសំរាម។
ការបង្កើត App នេះ គឺដើម្បីឱ្យអតិថិជនបានពិនិត្យ និងតាមដានក្នុងការបម្រើសេវា ព្រមទាំងផ្តល់ភាពងាយស្រួលគ្រប់បែបយ៉ាងទាំងអស់ពាក់ព័ន្ធនឹងការគ្រប់គ្រងសំរាមទូទាំងរាជធានីភ្នំពេញ។
លោកបញ្ជាក់ថា៖ «App នេះផ្តល់ភាពងាយស្រួលទាំងអស់ដល់ពួកគាត់តាំងពីការប្រមូល តាំងពីការបង់ថ្លៃសេវា តាមរយៈប្រព័ន្ធស្មាតហ្វូនដែលគាត់ប្រើប្រាស់ App របស់យើងគឺអាចត្រួតពិនិត្យការបង់សេវារបស់គាត់។ លើសពីនេះ គឺមានព័ត៌មានទាក់ទងនឹងសេវាតែម្តង»។
ដោយសារតែប្រព័ន្ធគ្រប់គ្រងតាមបច្ចេកវិទ្យា ( App) ទើបតែត្រូវបានរៀបចំបង្កើត លោក នួន សំណាវុធ បានសង្កត់ធ្ងន់ថា នៅពេលក្រុមការងារបានបញ្ចប់ការពិភាក្សាលក្ខណៈបច្ចេកទេសចប់រួចរាល់ពេលណានោះ ថ្នាក់ដឹកនាំនឹងប្រកាសពីព័ត៌មានលម្អិតជុំវិញការប្រើប្រាស់ App សម្រាប់គ្រប់គ្រងបម្រើឱ្យសេវាប្រមូលសំរាមនេះក្នុងពេលខាងមុខ។
លោកបញ្ជាក់ថា៖ «រឿង App នេះ យើងកំពុងកែតម្រូវវាឱ្យធ្វើចេញមកបានស្រួលប្រើប្រាស់ ហើយវាមិនទាន់ផ្លូវការទេ។ នៅពេលយើងសម្រេចលទ្ធផលបាន គឺយើងនឹងផ្សព្វផ្សាយហើយដោយរង់ចាំការសម្រេច និងពិភាក្សាពីថ្នាក់លើសិន»។
កាលពីថ្ងៃទី ៥ កុម្ភៈ សាលារាជធានីភ្នំពេញបានប្រកាសថា ក្រុមហ៊ុនសិង្ហបុរី និងក្រុមហ៊ុនចិនបានទទួលសិទ្ធិប្រមូល និងគ្រប់គ្រងសំរាមក្នុងតំបន់ចំនួន ២ ហើយក្រុមហ៊ុនស៊ីនទ្រីទទួលបានសិទ្ធិបន្តក្នុងការផ្តល់សេវាកម្មនេះនៅតំបន់ទី ៣។ សាលារាជធានីភ្នំពេញបានឱ្យដឹងថា ក្រុមហ៊ុនទាំង ៣ នឹងចូលខ្លួនបម្រើសេវាប្រមូលសំរាមនៅតាមទីតាំងរបស់ខ្លួនរៀងៗខ្លួនក្នុងអំឡុងខែឧសភា ឆ្នាំនេះ ខណៈក្រុមហ៊ុននីមួយៗបានបង្ហាញការតាំងចិត្តក្នុងការបម្រើសេវាប្រមូលសំរាមដល់អតិថិជន។
កាលពីថ្ងៃទី ២២ ខែ តុលា ឆ្នាំ ២០១៩ លោកនាយករដ្ឋមន្ត្រី ហ៊ុន សែន បានប្រកាសដកសិទ្ធិប្រមូលសំរាមពីក្រុមហ៊ុនស៊ីនទ្រីដែលជាក្រុមហ៊ុនទទួលបានសិទ្ធិផ្តាច់មុខក្នុងការបម្រើសេវាយកមកឱ្យរដ្ឋបាលរាជធានីភ្នំពេញគ្រប់គ្រងបណ្តោះអាសន្នមុននឹងរកក្រុមហ៊ុនថ្មីមកជំនួសបានក្រោមហេតុផលថា ក្រុមហ៊ុនស៊ីនទ្រីមិនមានសមត្ថភាពក្នុងការប្រមូលសំរាម។
នៅក្នុងអំឡុងពេលនៃការដកហូតនេះសាលារាជធានីភ្នំពេញក៏បានធ្វើការកំណែទម្រង់នូវលក្ខខណ្ឌ និងការផ្តល់សេវាមួយចំនួន ដូចជា ការដកតម្លៃសេវាប្រមូលសំរាមចេញពីវិក្កយបត្រភ្លើងការបង់កម្រៃសេវាតាមរយៈភ្នាក់ងារបង់លុយទំនើបនានាដែលបង្កលក្ខណៈងាយស្រួល រួមទាំងការកែប្រែការប្រមូលសំរាមរឹង រាវ និងការផ្តល់សេវាឱ្យបានល្អជាងមុនផងដែរ។
លោក វិឆ័យ ជាពលរដ្ឋម្នាក់រស់នៅក្នុងខណ្ឌទួលគាកដែលធ្លាប់បានលើកឡើងពីភាពអសកម្មជុំវិញបញ្ហាសំរាមបានថ្លែងពីម្សិលមិញថា ក្នុងរយៈពេលចុងក្រោយនៃការផ្លាស់ប្តូរការគ្រប់គ្រងការប្រមូលសំរាមនេះគឺមានការល្អប្រសើរជាងមុន។
លោកបន្តថា ទាំងឥរិយាបថរបស់អ្នកប្រមូលសំរាម និងការផ្តល់សេវានានាពាក់ព័ន្ធនឹងបញ្ហាសំរាមនេះគឺមានភាពល្អប្រសើរ ប៉ុន្តែមិនមែនបានន័យថា ល្អទាំងស្រុងនោះទេ។ លោករំពឹងថា នៅពេលក្រុមហ៊ុនទាំង ៣ ចូលបំពេញការងារ ពលរដ្ឋ នឹងទទួលបានសេវានេះកាន់តែល្អប្រសើរថែមទៀត។
លោកបញ្ជាក់ថា៖ «ទាក់ទងនឹងការជូនដំណឹងគឺផ្តល់ឱ្យពួកយើងបានបានល្អ ហើយចំពោះការបង់សេវាប្រចាំខែ ក៏មិនមានបញ្ហាអ្វីនោះដែរ គាត់មកប្រមូលសំរាមអស់ ហើយបើអាជ្ញាធរ គាត់ចង់បង្កើតឱ្យមានការប្រើប្រាស់តាមប្រព័ន្ធបច្ចេកវិទ្យាទៀតពាក់ព័ន្ធនឹងសេវាប្រមូលសំរាមនេះគឺល្អណាស់»។
សូមជម្រាបថា រដ្ឋាភិបាលបានសម្រេចបែងចែករាជធានីភ្នំពេញជា ៣ តំបន់សម្រាប់ធ្វើការគ្រប់គ្រង ផ្តល់សេវាប្រមូលសំរាមដោយតម្រូវឱ្យក្រុមហ៊ុនចំនួន ៣ ផ្សេងគ្នាធ្វើការគ្រប់គ្រងក្នុងនោះតំបន់ទី១ មាន ខណ្ឌទួលគោក ឫស្សីកែវ សែនសុខ ជ្រោយចង្វារ និងខណ្ឌព្រែកព្នៅ។
តំបន់ទី២ មានខណ្ឌដង្កោ ពោធិ៍សែនជ័យ កំបូល ដូនពេញ និងខណ្ឌ ៧ មករា។ ចំណែកតំបន់ទី៣ គឺមានខណ្ឌចំការមន មានជ័យ ច្បារអំពៅ និងខណ្ឌបឹងកេងកង៕