ភ្នំពេញៈ រដ្ឋបាលរាជធានីភ្នំពេញប្រកាសហាមមិនឲ្យរថយន្តធុនធំ រថយន្តក្រឡុកស៊ីម៉ងត៍ រថយន្តដឹកទំនិញ រថយន្តឈ្នួលដឹកអ្នកដំណើរ និងម៉ូតូសណ្តោងរ៉ឺម៉កបើកចូលក្នុងរាជធានីភ្នំពេញរយៈពេល ៥ ថ្ងៃ ក្នុងអំឡុងពេលព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ចាប់ពីថ្ងៃទី ៩ រហូតដល់ថ្ងៃទី ១៣ ខែវិច្ឆិកា។
សេចក្តីជូនដំណឹងរបស់រដ្ឋបាលរាជធានីភ្នំពេញ ចុះហត្ថលេខាដោយលោក ឃួង ស្រេង អភិបាលរាជធានីភ្នំពេញចេញផ្សាយកាលពីថ្ងៃពុធបានណែនាំដល់ប្រជាពលរដ្ឋ ម្ចាស់ការដ្ឋានសំណង់នានា ម្ចាស់អាជីវកម្មក្រឡុកស៊ីម៉ងត៍ ម្ចាស់រថយន្តដឹកទំនិញគ្រប់ប្រភេទ រថយន្តឈ្នួលដឹកអ្នកដំណើរ និងម៉ូតូសណ្តោងរ៉ឺម៉កគ្រប់ប្រភេទ ត្រូវគោរពទៅតាមការកំណត់នេះ ដើម្បីកាត់បន្ថយនូវការកកស្ទះចរាចរណ៍នៅរាជធានីភ្នំពេញ។
សេចក្តីជូនដំណឹងនោះបានបញ្ជាក់ថា៖ «គ្រប់យានយន្តធ្វើដំណើរមកចូលរួមទស្សនាព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក មិនអនុញ្ញាតឱ្យចរាចរលើផ្លូវច្រាំងទន្លេសាប ផ្លូវលេខ ១៣០ ផ្លូវលេខ ៥ ផ្លូវលេខ ១៥៤ មហាវិថីព្រះនរោត្តម ផ្លូវលេខ ២១៤ ផ្លូវលេខ ៥១ ផ្លូវលេខ ២៩៤ កំណាត់មហាវិថីសម្តេចសុធារសដល់កែងផ្លូវស្ថានទូតរុស្ស៊ី វិថីរដ្ឋសភា ផ្លូវលេខ ៧៨ ផ្លូវសបឺត មហាវិថីព្រះសុរាម្រិត កំណាត់តិរវិថីព្រះស៊ីសុវត្ថិដល់កែងផ្លូវលេខ ១៣០»។ សេចក្តីជូនដំណឹងដដែលនោះបញ្ជាក់បន្តថា៖ «ចំពោះរថយន្ត និងម៉ូតូសណ្តោងរ៉ឺម៉កដឹកអ្នកដំណើរមកចូលរួមទស្សនាព្រះរាជពិធីបុណ្យអុំទូកតាមផ្លូវលេខ ៥៩៨ និងមហាវិថីឧកញ៉ាម៉ុងឫទ្ធី ត្រូវបង្វែរចូលតាមផ្លូវតូចៗមិនឱ្យចូលហួសមហាវិថី គីម អ៊ីលស៊ុង និងចតនៅបរិវេណតំបន់អភិវឌ្ឍន៍បឹងកក់»។
ចំណែករថយន្តឈ្នួលដឹកអ្នកដំណើរ និងម៉ូតូសណ្តោងរ៉ឺម៉ក ក៏មិនអនុញ្ញាតឱ្យចរាចរចូលក្នុងរាជធានីភ្នំពេញចាប់ពីម៉ោង ១០:០០ នាទី រហូតដល់ម៉ោង ២២:០០ នាទី ប៉ុន្តែអាចចរាចរបានវិញ ចាប់ពីម៉ោង ២២:០០ នាទី រហូតដល់ម៉ោង ១០:០០ នាទី ខណៈរថយន្តធុនធំ រថយន្តក្រឡុកស៊ីម៉ងត៍ រថយន្តដឹកទំនិញ គឺហាមចូលតែម្តង។
លោក ឃួង ស្រេង បានណែនាំដល់រថយន្តធុនធំ និងរថយន្តដឹកទំនិញដែលតែងតែបើកឆ្លងកាត់រាជធានីភ្នំពេញតាមផ្លូវជាតិលេខ ១ ផ្លូវជាតិលេខ ២ ផ្លូវជាតិលេខ ៣ និង ៤ ផ្លូវជាតិលេខ ៥ និងផ្លូវជាតិលេខ ៦ ត្រូវបញ្ចៀសចរាចរណ៍ និងចតយានយន្តរបស់ខ្លួនតាមទីតាំងដែលបានកំណត់ផងដែរ។
ក្នុងនោះសម្រាប់ផ្លូវជាតិលេខ ១ រថយន្តធុនធំ និងរថយន្តដឹកទំនិញដែលឆ្លងកាត់រាជធានីភ្នំពេញត្រូវចូលចតនៅក្នុងបរិវេណវត្តនិរោធរង្សី ចំណតរថយន្តច្បារអំពៅ (ចំណតបេនរថយន្ត ស៊ុយ សុផាន) និងត្រូវបញ្ចៀសចរាចរណ៍រថយន្តធុនធំចំណុចផ្លូវជាតិលេខ ១ កែងផ្លូវរោងចក្រថៃហ្គ័រ។ ចំពោះរថយន្តដឹកអ្នកដំណើរគ្រប់ប្រភេទ និងម៉ូតូសណ្តោងរ៉ឺម៉កត្រូវចូលចតក្នុងបរិវេណវត្តនិរោធរង្សី និងតាមបណ្តោយផ្លូវលេខ ៣៦៩ (ខាងត្បូងវត្តព្រែកប្រា)។ ចំណែកនៅផ្លូវជាតិលេខ ២ ចំពោះរថយន្តធុនធំ និងរថយន្តដឹកទំនិញត្រូវចូលចតនៅចំណតរថយន្តចាក់អង្រែក្រោម និងក្នុងបរិវេណអនុវិទ្យាល័យចាក់អង្រែ។
ចំពោះរថយន្តដឹកអ្នកដំណើរគ្រប់ប្រភេទ និងម៉ូតូសណ្ដោងរ៉ឺម៉កត្រូវចូលចតចំណតចាក់អង្រែក្រោម និងក្នុងបរិវេណអនុវិទ្យាល័យចាក់អង្រែ ទីធ្លាវត្តចាក់អង្រែលើ ។ ចំពោះរថយន្តធុនធំដែលចរាចរលើផ្លូវលេខ ២១៧ ត្រូវឈប់ចតនៅខាងជើងរង្វង់មូលដីក្រហម។ ជាមួយគ្នានោះសម្រាប់ផ្លូវជាតិលេខ ៣ និងផ្លូវជាតិលេខ ៤ រថយន្តដឹកជញ្ជូនគ្រប់ប្រភេទដែលធ្វើដំណើរឆ្លងកាត់រាជធានីភ្នំពេញទៅតាមបណ្តាខេត្តប៉ែកពាយព្យ និងឦសានត្រូវធ្វើចរាចរតាមមហាវិថីឈ្នះ-ឈ្នះទៅតាមផ្លូវជាតិលេខ ៥ ឬឆ្លងកាត់ស្ពានព្រែកព្នៅ។
លោក ឃួង ស្រេង បានថ្លែងថា៖ «សម្រាប់រថយន្តធុនធំ និងរថយន្តដឹកទំនិញ ត្រូវចូលចតនៅចំណតរថយន្តចោមចៅ ស្តុបមុខអាកាសយានដ្ឋានអន្តរជាតិភ្នំពេញ និងស្តុប ២០០៤។ ចំពោះរថយន្ត និងម៉ូតូសណ្តោងរ៉ឺម៉កដឹកអ្នកដំណើរមកទស្សនាព្រះរាជពិធីបុណ្យអុំទូកបណ្តែតប្រទីប និងសំពះព្រះខែ អកអំបុកត្រូវឈប់ចតមិនឱ្យហួសស្តុបណតប្រ៊ីតឡើយ»។
ដោយឡែកផ្លូវជាតិលេខ ៥ គឺត្រូវបង្វែរទិសធ្វើដំណើរតាមមហាវិថីឈ្នះ-ឈ្នះ ឬចូលចតនៅចំណតគីឡូម៉ែត្រលេខ ៩ ចំពោះរថយន្តដឹកអ្នកដំណើរ និងម៉ូតូសណ្តោងរ៉ឺម៉កត្រូវចូលចតនៅសាលាដែកដោយមិនឱ្យចូលហួសផ្លូវលេខ ៦៨ ឡើយ។ ចុងក្រោយសម្រាប់ផ្លូវជាតិលេខ ៦ គឺរថយន្តធុនធំទាំងអស់ត្រូវបង្វែរទិសធ្វើដំណើរឆ្លងកាត់ស្ពានលីយ៉ុងផាត់តាមមហាវិថីឈ្នះ-ឈ្នះ ចំពោះរថយន្តដឹកអ្នកដំណើរ និងម៉ូតូសណ្តោងរ៉ឺម៉កត្រូវចូលចតនៅទីតាំងដីតំបន់អភិវឌ្ឍន៍ ocic។
ជាមួយគ្នានោះ រដ្ឋបាលរាជធានីភ្នំពេញក៏បានបញ្ជាក់ដែរថា សម្រាប់ផ្លូវលេខ ២៧១ និងផ្លូវលេខ ៣៧១ រថយន្តធុនធំ និងរថយន្តដឹកទំនិញត្រូវចូលចតនៅខាងត្បូងស្ពានម័ល ហើយចំពោះរថយន្ត និងម៉ូតូសណ្តោងរ៉ឺម៉កដឹកអ្នកដំណើរមកចូលរួមទស្សនាព្រះរាជពិធីបុណ្យអុំទូកត្រូវឈប់នៅចំណុចច្រមុះជ្រូកក្បាលថ្នល់។ សម្រាប់ផ្លូវចោមចៅ (ផ្លូវវេងស្រេង) រថយន្តដឹកអ្នកដំណើរ និងម៉ូតូសណ្តោងរ៉ឺម៉កដែលចូលតាមមហាវិថីសម្តេចព្រះមុនីរ៉េត ត្រូវចូលចតនៅសាលាបឋមសិក្សាស្ទឹងមានជ័យជាមួយគ្នានោះរថយន្តធុនធំ ត្រូវបញ្ចៀសចរាចរណ៍នៅត្រង់ចំណុចច្រមុះជ្រូកស្ទឹងមានជ័យ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា ប្រាប់ភ្នំពេញប៉ុស្តិ៍កាលពីម្សិលមិញថា ការបិទសម្រាប់ពិធីនេះគឺកើតមានឡើងជារៀងរាល់ឆ្នាំ ប៉ុន្តែចំពោះបញ្ហាក៏តែងតែកើតមានជាហូរហែផងដែរ ហើយអ្នកដែលមានផ្ទះសំបែងនៅក្នុងតំបន់ដែលមានការបិទផ្លូវ តែងតែជួបការលំបាក ព្រោះប៉ូលិសបានហាមមិនឲ្យប្រជាពលរដ្ឋបើកបរចូល។
ចំណែកអ្នកមកពីចម្ងាយក៏មានការលំបាកដូចគ្នា ព្រោះតែត្រូវធ្វើដំណើរយូរទម្រាំដល់ទីតាំងដែលខ្លួនចង់មកទស្សនា។
លោកលើកឡើងបន្តថា៖ «ការបិទឆ្ងាយបែបនេះអាចធ្វើឲ្យប្រជាពលរដ្ឋ មានការធុញទ្រាន់ក្នុងការធ្វើដំណើរផ្លូវឆ្ងាយបែបនេះទៅកាន់ទីកន្លែងប្រារព្ធពិធី ហើយក៏អាចមានការឡើងថ្លៃនៃការធ្វើដំណើរជាដើម។ យើងគួរតែធ្វើការសម្រួលឡើងវិញ សម្រាប់រថយន្តធុនតូចអាចបើកបរបានកៀកនឹងកន្លែងពិធីបានងាយស្រួល»។
យ៉ាងណាក្តីលោក សន ជ័យ ថាការសម្រេចផ្អាកចំពោះយានយន្តធុនធ្ងន់ មិនឲ្យធ្វើចរាចរក្នុងរាជធានីភ្នំពេញព្រោះក្នុងអំឡុងពេលនោះអាចនឹងមានមនុស្សច្រើន ហើយយានយន្តធុនធ្ងន់ងាយនឹងបង្កគ្រោះថ្នាក់៕