.jpg)
អាជីវករចាប់ផ្ដើមលក់ម្អូបអាហារនៅខណ្ឌពោធិ៍សែនជ័យ ក្នុងថ្ងៃនេះ។ ហេង ជីវ័ន
ភ្នំពេញៈ អាជ្ញាធររាជធានីភ្នំពេញ អនុញ្ញាតឲ្យមានសកម្មភាពការងារ មុខរបរ និងអាជីវកម្មពាក់ព័ន្ធផ្នែកអាហារ-ភេសជ្ជៈគ្រប់ប្រភេទ ស្ថិតនៅតំបន់លឿង អាចដំណើរការឡើងវិញ ដោយគោរពតាមវិធានការសុវត្ថិភាព ខណៈតំបន់លឿងទុំអាចអនុញ្ញាតឲ្យត្រឹមតែមានការវេចខ្ចប់ប៉ុណ្ណោះ។
សេចក្ដីណែនាំស្ដីពីគោលការណ៍អនុវត្តចំពោះសកម្មភាពការងារ មុខរបរ និងអាជីវកម្មពាក់ព័ន្ធផ្នែកអាហារ-ភេសជ្ជៈគ្រប់ប្រភេទ ក្នុង «តំបន់លឿង» នៃភូមិសាស្ត្ររាជធានីភ្នំពេញរបស់សាលារាជធានីភ្នំពេញចុះថ្ងៃទី ២៨ មេសា បានឲ្យដឹងថា ជាគោលការណ៍ សម្រាប់ “តំបន់ក្រហម” រាល់សកម្មភាពការងារ មុខរបរ និងអាជីវកម្មពាក់ព័ន្ធផ្នែក អាហារ-ភេសជ្ជៈគ្រប់ប្រភេទ ត្រូវផ្អាកជាបណ្តោះអាសន្ន។
ប៉ុន្តែសាលារាជធានីភ្នំពេញបានបញ្ជាក់ថា សម្រាប់ “តំបន់លឿងទុំ" សកម្មភាពការងារ មុខរបរ និងអាជីវកម្មពាក់ព័ន្ធផ្នែកអាហារ-ភេសជ្ជៈគ្រប់ប្រភេទត្រូវបានអនុញ្ញាតឱ្យបើកដំណើរការលក់ដូរជាលក្ខណៈវេចខ្ចប់ ខណៈសកម្មភាពការងារ មុខរបរ និងអាជីវកម្មពាក់ព័ន្ធផ្នែកអាហារ-ភេសជ្ជៈគ្រប់ប្រភេទក្នុងតំបន់លឿង អាចដំណើរការជាធម្មតា ដោយត្រូវគោរពតាមវិធានការសុវត្ថិភាព។
លោក ឃួង ស្រេង អភិបាលរាជធានីភ្នំពេញបានលើកឡើងក្នុងលិខិតថា ដោយពិនិត្យឃើញពីភាពចាំបាច់ និងដើម្បីឲ្យសកម្មភាពការងារ មុខរបរ និងអាជីវកម្មពាក់ព័ន្ធផ្នែកអាហារ-ភេសជ្ជៈគ្រប់ប្រភេទក្នុងតំបន់លឿង អាចដំណើរការទៅដោយសុវត្ថិភាព ចៀសវាងការឆ្លងរាលដាលជំងឺកូវីដ ១៩ បន្ថែមទៀតក្នុងអំឡុងពេលនៃការបិទខ្ចប់ គឺគ្រប់សកម្មភាពទាំងនោះត្រូវអនុវត្តតាមវិធានមួយចំនួន។
លោក ឃួង ស្រេង បានបញ្ជាក់ថា៖ «គ្រប់ទីផ្សារ ភោជនីយដ្ឋាន អាហារដ្ឋាន តូបអាហារ ហាងកាហ្វេ ហាងភេសជ្ជៈ និងអាជីវកម្មដ្ឋានផ្នែក អាហារ-ភេសជ្ជៈគ្រប់ប្រភេទក្នុងតំបន់លឿងទុំ ក៏ត្រូវប្រកបអាជីវកម្មលក់ដូរជាលក្ខណៈវេចខ្ចប់ដាច់ខាត មិនត្រូវទទួលអតិថិជនឱ្យចូលមកទទួលទានក្នុងបរិវេណអាជីវកម្មដ្ឋានរបស់ខ្លួនឡើយ»។
គ្រប់សកម្មភាពខាងលើនេះ គឺអនុញ្ញាតឲ្យអនុវត្តបានក្នុងរយៈពេល ៧ (ប្រាំពីរ) ថ្ងៃ គិតចាប់ពីថ្ងៃទី ២៩ ខែមេសា រហូតដល់ថ្ងៃទី ៥ ខែឧសភា ឆ្នាំ ២០២១។
បន្ថែមពីនេះ លោកលើកឡើងទៀតថា ចំពោះ សកម្មភាពការងារ មុខរបរ និងអាជីវកម្មពាក់ព័ន្ធអាហារ ភេសជ្ជៈគ្រប់ប្រភេទ ដែលបើកដំណើរការនៅក្នុងតំបន់លឿង ត្រូវអនុវត្តវិធានការសុវត្ថិភាពផ្នែកសុខាភិបាលឱ្យបានម៉ឺងម៉ាត់ជាអាទិ៍ កាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាព និងត្រូវប្រកាន់ខ្ជាប់នូវការធ្វើអនាម័យ ដើម្បីសម្លាប់មេរោគ ការវាស់កម្ដៅ និងការអនុវត្តវិធានការសុវត្ថិភាពផ្សេងទៀត តាមការណែនាំរបស់ក្រសួងសុខាភិបាល។
លោក ឃួង ស្រេង ក៏បានណែនាំឲ្យរដ្ឋបាលខណ្ឌទាំង ១៤ មន្ទីរពាណិជ្ជកម្មរាជធានីភ្នំពេញ និងមន្ទីរទេសចរណ៍រាជធានីភ្នំពេញត្រូវសហការ ចុះត្រួតពិនិត្យតាមបណ្តាគោលដៅទីផ្សារ ភោជនីយដ្ឋាន អាហារដ្ឋាន តូបអាហារ ហាងកាហ្វេ ហាង ភេសជ្ជៈ និងអាជីវកម្មដ្ឋានផ្នែកអាហារ -ភេសជ្ជៈគ្រប់ប្រភេទ ក្នុងតំបន់លឿង ដើម្បីធានាការអនុវត្តឱ្យបានត្រឹមត្រូវតាមខ្លឹមសារនៃសេចក្ដីណែនាំនេះ។
កាលពីថ្ងៃទី ២៦ ខែមេសា ឆ្នាំ ២០២១ រាជរដ្ឋាភិបាលបានសម្រេចបន្តបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាលមួយសប្តាហ៍ទៀត ដើម្បីទប់ស្កាត់ការឆ្លងរាលដាលនៃជំងឺកូវីដ១៩។
ជាមួយគ្នានេះនៅថ្ងៃទី ២៧ ខែមេសា ឆ្នាំ ២០២១ រដ្ឋបាលរាជធានីភ្នំពេញ ក៏បានសម្រេចកំណត់ភូមិសាស្ត្ររាជធានីភ្នំពេញ ជា ៣ តំបន់ គឺ «តំបន់ក្រហម» «តំបន់លឿងទុំ» និង «តំបន់លឿង»៕
