.jpg)
កម្មករកំពុងប្រមូលសំរាមដាក់ឡាននៅតាមផ្លូវមួយក្នុងរាជធានីភ្នំពេញកាលពីខែកក្កដា។ ហ៊ាន រង្សី
ភ្នំពេញៈ រដ្ឋបាលរាជធានីភ្នំពេញបានស្នើដល់ម្ចាស់លំនៅឋានម្ចាស់អាជីវកម្ម សេវាកម្ម និងប្រជាពលរដ្ឋទាំងអស់ក្នុងរាជធានីភ្នំពេញធ្វើការវេចខ្ចប់ និងទុកដាក់សំរាមឲ្យបានត្រឹមត្រូវនៅក្នុងបរិវេណលំនៅឋានជាបណ្ដោះអាសន្ន ក្នុងអំឡុងពេលថ្ងៃឈប់សម្រាករយៈពេល ៣ ថ្ងៃ នៃពិធីបុណ្យភ្ជុំបិណ្ឌ។
យោងសេចក្ដីជូនដំណឹងរបស់រដ្ឋបាលរាជធានីភ្នំពេញចុះថ្ងៃទី ៨ ខែ កញ្ញា ឆ្នាំ ២០២០ បុគ្គលិកកម្មកររបស់ក្រុមហ៊ុនស៊ីនទ្រីមួយចំនួននឹងត្រូវបានឈប់សម្រាកពីការងាររយៈពេល ៣ ថ្ងៃគឺចាប់ពីថ្ងៃទី ១៦ ដល់ថ្ងៃទី ១៨ ខែកញ្ញាដើម្បីចូលរួមពិធីបុណ្យភ្ជុំបិណ្ឌជាមួយក្រុមគ្រួសារ និងសាច់ញាតិនៅឯស្រុកកំណើតរបស់ពួកគាត់ ដែលធ្វើឲ្យការផ្តល់សេវាសម្អាត ប្រមូល និងដឹកជញ្ជូនសំរាម សំណល់រឹង ក្នុងរាជធានីភ្នំពេញមានភាពរអាក់រអួលមិនបានពេញលេញដូចថ្ងៃធម្មតា។
រដ្ឋបាលរាជធានីបញ្ជាក់ក្នុងលិខិតថា៖ «សូមមេត្តាកុំបញ្ចេញសំរាម និងសំណល់រឹងមកដាក់នៅតាមដងផ្លូវសាធារណៈនៅក្នុងអំឡុងពេលថ្ងៃឈប់សម្រាកនេះ។ រដ្ឋបាលរាជធានីភ្នំពេញសង្ឃឹមជឿជាក់ថា ម្ចាស់លំនៅឋាន ម្ចាស់អាជីវកម្ម សេវាកម្ម និងបងប្អូនប្រជាពលរដ្ឋទាំងអស់នឹងចូលរួមចំណែកថែរក្សាអនាម័យ បរិស្ថានរាជធានីភ្នំពេញយើងឲ្យបានល្អប្រសើរ»។
ប្រជាពលរដ្ឋក្នុងមូលដ្ឋានសង្កាត់ក្រាំងធ្នង់ និងសង្កាត់គោកឃ្លាង ខណ្ឌសែនសុខបានលើកឡើងថា ការប្រមូលសំរាមរបស់ភ្នាក់ងារសំរាមនាពេលបច្ចុប្បន្ន នៅមានភាពអសកម្មនៅឡើយ។
លោក ស្វាយ ស៊ីណារ៉េត ដែលមានលំនៅឋានក្នុងបុរីពិភពថ្មីក្បែរសាលាសង្កាត់ក្រាំងធ្នង់ ថ្លែងថាការប្រមូលសំរាមនៅក្នុងតំបន់លំនៅឋានរបស់លោកមានតែ ៣ ទៅ ៤ ដងប៉ុណ្ណោះក្នុង ១ ខែ។
លោកថ្លែងថា៖ «មិនថាថ្ងៃបុណ្យ ឬមិនបុណ្យនោះទេ ការប្រមូលសំរាមក្នុងតំបន់រស់នៅរបស់ខ្ញុំ ហាក់ដូចជាមានភាពយឺតយ៉ាវខ្លាំងណាស់។ សំរាមដែលគរទុកចោលច្រើនថ្ងៃវាតែងតែផុយរលួយ និងបង្កឲ្យមានក្លិនមិនល្អប៉ះពាល់ដល់សុខភាព និងបរិស្ថាន បើទោះបីយើងវេចខ្ចប់ និងចងទុកដាក់វាឲ្យមានរបៀបរៀបរយយ៉ាងណាក៏ដោយ»។
យ៉ាងណាក៏ដោយលោក ខៀវ វុទ្ធី បុគ្គលិកផ្នែកប្រមូលសំរាមនៃក្រុមហ៊ុនស៊ីនទ្រីប្រាប់ភ្នំពេញ-ប៉ុស្តិ៍នៅថ្ងៃពុធថា ភាពយឺតយ៉ាវក្នុងការប្រមូលសំរាមគឺបណ្ដាលមកពីការទុកដាក់សំរាមរបស់ប្រជាពលរដ្ឋក្នុងមូលដ្ឋានគ្មានរបៀបរៀបរយ និងការបញ្ចេញសំរាមមិនសមស្របតាមកម្មវិធីដែលបានកំណត់។
លោកថ្លែងថា៖ «យើងទទួលស្គាល់ថា មានបងប្អូនប្រជាពលរដ្ឋមួយចំនួនមានការយល់ដឹង និងបានចូលរួមបំពេញកាតព្វកិច្ចនៅក្នុងការវេចខ្ចប់ ទុកដាក់ និងបញ្ចេញសំរាមបានល្អត្រឹមត្រូវតាមកម្មវិធីរបស់យើង ប៉ុន្តែបងប្អូនមួយចំនួននៅមិនទាន់បានអនុវត្តត្រឹមត្រូវនោះទេ។ មិនតែប៉ុណ្ណោះ នៅតែបន្តបោះចោលសំរាមពាសវាលពាសកាល តាមដងផ្លូវសាធារណៈ»។
លោក វុទ្ធី បានអំពាវនាវសុំឲ្យគ្រប់ភាគីពាក់ព័ន្ធទាំងអស់ ពិសេសម្ចាស់លំនៅឋាន និងម្ចាស់អាជីវកម្ម សេវាកម្ម ចូលរួមក្នុងការសម្អាតអនាម័យ និងវេចខ្ចប់សំរាម និងកាកសំណល់រឹងទុកដាក់ឲ្យមានរបៀបរៀបរយ និងបញ្ចេញសំរាមមកខាងក្រៅតាមកម្មវិធីដែលបានកំណត់៕
