.jpg)
គំនរសំរាមនៅខណ្ឌដូនពេញកាលពីម្សិលមិញ។ ហេង ជីវ័ន
ភ្នំពេញ: សាលារាជធានី-ភ្នំពេញបានប្រាប់ម្ចាស់លំនៅឋាន ម្ចាស់អាជីវកម្មសេវាកម្ម និងពលរដ្ឋឲ្យរៀបចំទុកដាក់សំរាមបានត្រឹមត្រូវនៅតាមទីតាំងរៀងៗខ្លួនដោយសារបុគ្គលិកកម្មករក្រុមហ៊ុនស៊ីនទ្រីត្រូវបានឈប់សម្រាកនារដូវបុណ្យភ្ជុំបិណ្ឌ ខណៈក្រសួងចំនួន ៣ ចេញប្រកាសរួមគ្នាឲ្យមន្ត្រីគ្រប់គ្រង និងប្រើប្រាស់ថវិកាបានពីការពិន័យអ្នកចោលសំរាមតាមភាពចាំបាច់។
តាមលិខិតជូនដំណឹងរដ្ឋបាលរាជធានីភ្នំពេញចុះថ្ងៃទី ២៣ កញ្ញា បានឲ្យដឹងថា «សូមម្ចាស់លំនៅឋាន ម្ចាស់អាជីវកម្មសេវាកម្ម និងប្រជាពលរដ្ឋទាំងអស់នៅរាជធានីភ្នំពេញយោគយល់ និងអធ្យាស្រ័យកុំបញ្ចេញសំរាមមកដាក់នៅតាមដងផ្លូវសាធារណៈដោយសូមរក្សាការទុកដាក់សំរាមឲ្យបានត្រឹមត្រូវនៅក្នុងទីតាំងរៀងៗខ្លួនជាបណ្តោះអាសន្នសិន»។
លិខិតសាលារាជធានីភ្នំពេញបន្តថាក្នុងថ្ងៃឈប់សម្រាកនៃពិធីបុណ្យភ្ជុំបិណ្ឌ ៣ ថ្ងៃចាប់ពីថ្ងៃទី ២៧-២៩ ខែកញ្ញា បុគ្គលិកកម្មករក្រុមហ៊ុនស៊ីនទ្រីដែលបម្រើការងារប្រមូលសំរាមនៅរាជធានីភ្នំពេញត្រូវបានឈប់សម្រាក ហើយមួយចំនួនត្រូវធ្វើដំណើរទៅស្រុកកំណើតនៅខេត្តនានាដែលធ្វើឲ្យការផ្តល់សេវាសម្អាត ប្រមូល និងដឹកជញ្ជូនសំរាមមានភាពរអាក់រអួល។
លោក ម៉េត មាសភក្ដី អ្នកនាំពាក្យសាលារាជធានីភ្នំពេញកាលពីម្សិលមិញមិនអាចទាក់ទងសុំការបញ្ជាក់បន្ថែមជុំវិញការជូនដំណឹងនេះនៅឡើយ។
ទាក់ទិនករណីនេះដែរលោក ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ, ឧបនាយករដ្ឋមន្ដ្រី អូន ព័ន្ធមុន្នីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ និងលោក សាយ សំអាល់ រដ្ឋមន្ដ្រីក្រសួងបរិស្ថានបានចេញប្រកាសរួមគ្នាស្ដីពីការគ្រប់គ្រង និងការប្រើប្រាស់ចំណូលពីការពិន័យអន្ដរការណ៍ចំពោះអំពើល្មើសនឹងអនុក្រឹត្យស្ដីពីការគ្រប់គ្រងសំរាមសំណល់រឹងទីប្រជុំជន។
តាមប្រកាសអន្ដរក្រសួងចុះថ្ងៃទី ១០ កញ្ញាដែលភ្នំពេញប៉ុស្ដិ៍ទើបទទួលបានពីម្សិលមិញឲ្យដឹងថា រដ្ឋបាលរាជធានី/ស្រុកត្រូវរៀបចំគណៈកម្មការទទួលបន្ទុកអនុវត្តការពិន័យអន្ដរការណ៍រាជធានីចំពោះអំពើល្មើសនានាដែលមានចែងក្នុងជំពូកទី ៧ នៃអនុក្រឹត្យស្ដីពីការគ្រប់គ្រងសំរាម សំណល់រឹងទីប្រជុំជន។
សេចក្ដីប្រកាសបន្តថា ប្រាក់ចំណូលប្រមូលបានពីការពិន័យអន្តរការណ៍ចំពោះអំពើល្មើសនឹងទោសបញ្ញត្តិដូចមានកំណត់ក្នុងជំពូកទី ៧ នៃអនុក្រឹត្យនេះត្រូវបែងចែកជាចំណែកសម្រាប់បង់ចូលថវិការដ្ឋបាលថ្នាក់ក្រោមជាតិសាមីចំនួន ៥០ ភាគរយ។
ចំណែកប្រាក់រង្វាន់លើកទឹកចិត្តសម្រាប់ផ្ដល់ជូនរដ្ឋបាលថ្នាក់ក្រោមជាតិសាមី ៤៤ ភាគរយ ចំណែកប្រាក់រង្វាន់លើកទឹកចិត្តសម្រាប់ផ្ដល់ជូនមន្ទីរបរិស្ថាន ៥ ភាគរយ និងចំណែកប្រាក់រង្វាន់លើកទឹកចិត្តសម្រាប់ផ្ដល់ជូនមន្ទីរសេដ្ឋកិច្ចនិងហិរញ្ញវត្ថុ ១ ភាគរយ។
សេចក្ដីប្រកាសបញ្ជាក់ថា «រដ្ឋបាលរាជធានី/ក្រុង និងរដ្ឋបាលស្រុកត្រូវធ្វើការផ្សព្វផ្សាយជាសាធារណៈឲ្យបានទូលំទូលាយខ្លឹមសារនៃប្រកាសអន្តរក្រសួងនេះក្នុងរយៈពេល ៦ ខែចាប់ពីថ្ងៃចេញប្រកាសនេះនឹងត្រូវរៀបចំឲ្យមានកន្លែងទទួលបណ្ដឹងតវ៉ាដែលអាចកើតមានឡើងជាយថាហេតុលើការជំទាស់ ឬការមិនសុខចិត្តរបស់អ្នកប្រព្រឹត្តអំពើល្មើសនឹងទោសបញ្ញត្តិដូចមានកំណត់ក្នុងជំពូកទី ៧ នៃអនុក្រឹត្យ ចំពោះការអនុវត្តការពិន័យអន្តរការណ៍របស់បុគ្គលិក និងភ្នាក់ងារអនុវត្តការពិន័យអន្តរការណ៍»។
រដ្ឋលេខាធិការ និងជាអ្នកនាំពាក្យក្រសួងបរិស្ថានលោក នេត្រ ភក្ត្រា បានថ្លែងថា អាជ្ញាធរពាក់ព័ន្ធត្រូវបន្តផ្សព្វផ្សាយអប់រំដើម្បីបណ្តុះស្មារតីពលរដ្ឋឲ្យស្រឡាញ់បរិស្ថាន និងមានមេត្រីភាពចំពោះបរិស្ថានក្នុងការរស់នៅរបស់ពួកគាត់ដោយទុកដាក់វេចខ្ចប់សំរាមឲ្យបានត្រឹមត្រូវ។
លោកបន្តថា សាលារាជធានី និងរដ្ឋបាលក្រុងនៅទូទៅប្រទេសបានទទួលកញ្ចប់ថវិកាសេវាអនាម័យបរិស្ថានប្រចាំឆ្នាំ ដើម្បីរៀបចំទីក្រុងរបស់ខ្លួន ហើយក្រុងភាគច្រើនបានបង្កើតផែនការរៀងៗខ្លួន ដើម្បីគ្រប់គ្រងបរិស្ថាន។
លោកបញ្ជាក់ថា៖ «យើងជឿជាក់ថា ការប្រកាសអន្តរក្រសួងនេះនឹងពង្រឹងបន្ថែមទៀតនូវប្រសិទ្ធភាពការងារក្នុងការគ្រប់គ្រងសំណល់រឹងទីប្រជុំជន ដើម្បីធ្វើឲ្យទីប្រជុំជននៅទូទាំងប្រទេសកម្ពុជាមានបរិស្ថាន អនាម័យល្អស្អាត ហើយវាកាន់តែទាក់ទាញក្នុងការរស់នៅ និងទីមនោរម្យសម្រាប់ភ្ញៀវទេសចរជាតិ និងអន្តរជាតិផងដែរ»។
លោក កែវ ចាន់ណារិទ្ធ ប្រធានគណៈគ្រប់គ្រងទីលានចាក់សំរាមដង្កោបានគាំទ្រឲ្យមានការអនុវត្តច្បាប់ ខណៈការទុកដាក់សំរាមមួយចំនួនបានល្អ ប៉ុន្ដែមួយចំនួនទៀតមិនព្រមចូលរួមទេ ថែមទាំងយឺតយ៉ាវក្នុងការបង់ថ្លៃសេវាទៀត។
លោកថា៖ «វាគួរតែដល់ពេលដែលត្រូវដាក់កំហិតលើអ្នកដែលមិនព្រមអនុវត្តតាមការណែនាំព្រោះយើងទាំងអស់គ្នាសុទ្ធតែចង់ឲ្យប្រទេសយើងគ្មានសំរាម ស្អាត និងមានបរិយាកាសល្អ...»។
លោក សាន ដារ៉ាវិត ប្រធានក្រុមយុវជនសំរាមបានថ្លែងថា បើទោះបីជាធ្លាប់មានអនុក្រឹត្យ ឬសេចក្ដីប្រកាសពាក់ព័ន្ធការផាកពិន័យ ឬផ្តន្ទាទោសចំពោះអ្នកប្រព្រឹត្តបទល្មើសចោលសំរាម ឬការទុកសំរាមមិនត្រឹមត្រូវក្ដី ក៏មិនទាន់មានប្រសិទ្ធភាពដែរ។
លោកបញ្ជាក់ថា៖ «សេចក្ដីប្រកាសចុងក្រោយនេះ ខ្ញុំមានសង្ឃឹមតិចតួចដែរថា អាជ្ញាធរនឹងអនុវត្តតាមអន្តរក្រសួងនេះ ហើយអ្វីដែលសំខាន់ជាងនេះគឺការអប់រំពលរដ្ឋគ្រប់ទីកន្លែងដែលមិនទាន់យល់ដឹងពីការទុកដាក់សំរាមឲ្យងាកមកទុកដាក់សំរាមបានល្អ។ ជាពិសេសខ្ញុំចង់ឲ្យមានក្រុមហ៊ុនកែច្នៃសំរាមដែរ ព្រោះសព្វថ្ងៃនេះយើងមិនទាន់មានក្រុមហ៊ុនកែច្នៃសំរាមទេ»។
លោក នួន សំណាវុធ នាយកទីចាត់ការគ្រប់គ្រងសំណល់ និងបរិស្ថាននៃសាលារាជធានី-ភ្នំពេញបានថ្លែងកាលពីថ្ងៃទី ១៩ កញ្ញាថា ជារៀងរាល់ថ្ងៃគ្រាន់តែរាជធានីភ្នំពេញមួយបានបង្កើតឲ្យមានកាកសំណល់ក្នុងបរិមាណចន្លោះពី ២ ពាន់ទៅ ៣ ពាន់តោនក្នុងនោះមាន ៦០០ តោនជាកាកសំណល់ប្លាស្ទិក។
នៅក្នុងប្រទេសកម្ពុជាទាំងមូលមានកាកសំណល់សំរាមជាង ១ ម៉ឺនតោនជារៀងរាល់ថ្ងៃ ឬច្រើនជាង ៣,៦ លានតោននៅក្នុង ១ ឆ្នាំ៕
