ភ្នំពេញៈ លោក ឃួង ស្រេង អភិបាលរាជធានីភ្នំពេញបានសម្រេចមិនឱ្យអាជ្ញាធរកាប់ដើមឈើចំនួន ៣ ដើម ដែលមានអាយុកាលជាង ៣០០ ឆ្នាំ ដែលស្ថិតនៅតាមបណ្តោយសួនផ្លូវភ្លោះនៅមុខមន្ទីរពេទ្យអង្គឌួង ឬសួនកាណាឌីយ៉ាស្ថិតក្នុងខណ្ឌដូនពេញ រាជធានីភ្នំពេញ។
ក្នុងពេលដឹកនាំមន្ត្រីជំនាញ និងអាជ្ញាធរខណ្ឌចុះពិនិត្យមើលស្ថានភាពដើមឈើទាំង ៣ ដើមជាក់ស្តែងពីម្សិលមិញលោកអភិបាលរាជធានីភ្នំពេញ បានបញ្ជាក់ថា ការសម្រេចឱ្យរក្សាទុក ដើមឈើទាំងនេះ បន្ទាប់ពីពិនិត្យឃើញថា ដើមឈើទាំង ៣ ដើមនេះអាចនៅបន្តឈរទៀតបាន។
លោក ឃួង ស្រេង ក៏បានប្រាប់ឱ្យមន្ទីរបរិស្ថាន មន្ទីរកសិកម្ម និងមន្ទីរសាធារណការ រាជធានីភ្នំពេញ សហការគ្នាមើលថែ ដោយធ្វើបានត្រឹមតែលះមែក ឬកាត់មែកដែលស្អុយចេញបាន។ ចំណែកដើមឈើទាំងមូលត្រូវធ្វើជើងទម្រទប់ដើម ដើម្បីកុំឱ្យរលំបង្កគ្រោះថ្នាក់ដល់ប្រជាពលរដ្ឋ។
លោកថ្លែងថា៖ «សម្រាប់នៅក្នុងរាជធានីភ្នំពេញ គឺគ្មានការកាប់ដើមឈើណាមួយយកចេញនោះទេ ប៉ុន្តែអាជ្ញាធរមានតែដាំដើមឈើថ្មីបន្ថែម ដើម្បីឱ្យទីក្រុងភ្នំពេញក្លាយជាទីក្រុងមានពណ៌បៃតង និងមានបរិស្ថានល្អ»។
អ្នកនាំពាក្យរដ្ឋបាលរាជធានីភ្នំពេញលោក ម៉េត មាសភក្តី ឱ្យដឹងពីម្សិលមិញដែរថា មូលហេតុដែលលោកអភិបាលសម្រេចរក្សាទុកនូវដើមឈើចំនួន ៣ ដើម ដែលមានអាយុកាល ៣០០ ឆ្នាំនេះ គឺដើម្បីរក្សាឱ្យអស់លទ្ធភាពនូវដើមឈើដែលមានរួចហើយ។
ទោះជាយ៉ាងណាលោក ម៉េត មាសភក្តី មិនបានផ្តល់ព័ត៌មានពីចំនួនដើមឈើនៅក្នុងរាជធានីភ្នំពេញដែលមានអាយុកាលជាង ១០០ ឆ្នាំមានប៉ុន្មានដើមនោះទេ លោកបានប្រាប់ឱ្យសួរមន្ត្រីជំនាញរបស់រដ្ឋបាលរាជធានីភ្នំពេញ។
ដោយឡែកលោក សំ សាមុត ប្រធានអង្គភាពសួនច្បារ និងរុក្ខជាតិនៃមន្ទីរសាធារណការរាជធានីភ្នំពេញកាលពីថ្ងៃទី ៨ ខែមករា ឱ្យដឹងថា អាជ្ញាធររាជធានីភ្នំពេញដោយមានការឯកភាពពីក្រសួងកសិកម្ម រុក្ខាប្រមាញ់ និងនេសាទអាចកាត់យកចេញនូវដើមឈើចំនួន ៣ ដើមនេះ ហើយដាំដើមឈើថ្មីជំនួសវិញ។
បើតាមមន្ត្រីរូបនេះ ដើមឈើធំៗនៅសួនផ្លូវភ្លោះកាណាឌីយ៉ាមុខពេទ្យព្រះអង្គឌួងមានចំនួនប្រមាណ ៥០ ដើមដោយក្នុងនោះ ដើមឈើធំៗចំនួន ៣ ដើមនេះមានសភាពពុកគល់ ប្រហោងក្នុងដែលអាចនឹងបង្កឱ្យមានគ្រោះថ្នាក់ដល់ប្រជាពលរដ្ឋជាអ្នកដំណើរជាយថាហេតុណាមួយកើតឡើង។
លោក លឿង វង្សវិសុទ្ធិ ប្រជាពលរដ្ឋរស់នៅទីក្រុងភ្នំពេញដែលឧស្សាហ៍ធ្វើដំណើរឆ្លងកាត់តំបន់សួនផ្លូវភ្លោះកាណាឌីយ៉ាមុខពេទ្យព្រះអង្គឌួងនេះ បាននិយាយថា អាជ្ញាធរគួរតែខិតខំរក្សាទុកដើមឈើទាំង ៣ ដើមនេះឱ្យគង់វង្សបានយូរ ដើម្បីសម្រាប់លម្អសោភណភាពទីក្រុង ផ្តល់ម្លប់ដល់អ្នកធ្វើដំណើរ និងពលរដ្ឋដែលមកលេងកម្សាន្តនៅក្នុងទីក្រុងភ្នំពេញ។
ទោះជាយ៉ាងណាលោក វង្សវិសុទ្ធិ បញ្ជាក់ទៀតថា បើអាជ្ញាធរពិនិត្យមើលឃើញថា វាមានហានិភ័យខ្ពស់ខ្លាំងក៏គួរមានវិធានការ កាប់វាចេញ ឬត្រួតពិនិត្យឱ្យបានទៀងទាត់ ដើម្បីធ្វើយ៉ាងណាកុំឱ្យមានហានិភ័យ ឬគ្រោះថ្នាក់ដល់ពលរដ្ឋ និងអ្នកធ្វើដំណើរ និងអ្នករស់នៅក្នុងតំបន់នេះ៕