ភ្នំពេញៈ រដ្ឋបាលសាលារាជធានីភ្នំពេញបានប្រកាសកាត់បន្ថយការប្រើប្រាស់ភេសជ្ជៈផ្អែមនៅតាមសាលារៀន ដើម្បីចូលរួមភាពជាដៃគូជួយសង្គ្រោះជាមួយទីក្រុងចំនួន ៧០ ក្នុងពិភពលោកដែលបានប្ដេជ្ញាចិត្តធ្វើឲ្យប្រសើរឡើងនូវសុខុមាលភាពពលរដ្ឋ ស្របពេលដែលក្រសួងអប់រំកម្ពុជាធ្លាប់បានដាក់បម្រាមស្រដៀងគ្នានៅតាមសាលារៀនអស់ជាច្រើនខែមកហើយ។
តាមទំព័រហ្វេសប៊ុករបស់រដ្ឋបាលរាជធានីភ្នំពេញដែលបានចុះផ្សាយកាលពីថ្ងៃទី ១៣ ខែធ្នូ ថា លោក ឃួង ស្រេង អភិបាលនៃគណៈអភិបាលរាជធានីភ្នំពេញបានប្រកាសផែនការថ្មីដើម្បីកាត់បន្ថយការប្រើប្រាស់ភេសជ្ជៈផ្អែម។
ទំព័រហ្វេសប៊ុកថា៖ «រដ្ឋបាលរាជធានីភ្នំពេញអនុវត្តការកាត់បន្ថយការទទួលទានភេសជ្ជៈផ្អែមនៅតាមសាលារៀនជាផ្នែកមួយនៃភាពជាដៃគូដើម្បីសុខុមាលភាពទីក្រុង ដែលជាបណ្ដាញពិភពលោកដ៏ល្បីល្បាញនៃទីក្រុងចំនួន ៧០ ដែលប្ដេជ្ញាសង្គ្រោះជីវិតដោយការទប់ស្កាត់ជំងឺមិនឆ្លងដូចជាជំងឺមហារីក ឬជំងឺទឹកនោមផ្អែម និងរបួស»។
ភាពជាដៃគូដើម្បីសុខុមាលភាពទីក្រុងទាំង ៧០ នេះគឺមានពលរដ្ឋសរុបជាង ៣០០ លាននាក់ នៅជុំវិញពិភពលោកដែលត្រូវបានគាំទ្រដោយមូលនិធិ Bloomberg Philanthropies ដែលជាដៃគូជាមួយអង្គការសុខភាពពិភពលោក និងអង្គការ Vital Strategies។
មិនអាចទាក់ទងលោក ឃួង ស្រេង និងលោក ម៉េត មាសភក្ដី អ្នកនាំពាក្យសាលារាជធានីភ្នំពេញបានទេកាលពីថ្ងៃម្សិលមិញ។
លោក ហែម ស៊ីណារ៉េត ប្រធានមន្ទីរអប់រំរាជធានីភ្នំពេញបានថ្លែងថា លោកមិនអាចបញ្ជាក់អំពីផែនការថ្មីរបស់សាលារាជធានីនេះបានទេ ប៉ុន្តែលោកថា ខាងក្រសួងអប់រំបានដាក់ផែនការហាមលក់ចំណីអាហារ និងគ្រឿងភេសជ្ជៈមួយចំនួននៅតាមគ្រឹះស្ថានសិក្សាអស់រយៈពេលជាច្រើនខែមកហើយ។
លោកថា៖ «អ្វីដែលខ្ញុំជម្រាបជូនគឺមន្ទីរអប់រំរាជធានី-ខេត្តគឺអនុវត្តតាមសេចក្ដីណែនាំរបស់ក្រសួងអប់រំស្ដីពីការលក់ចំណីអាហារតាមគ្រឹះស្ថានសិក្សាដែលត្រូវហាមឃាត់»។
កាលពីខែឧសភាក្រសួងអប់រំបានប្រកាសហាមលក់ចំណី ៦ ប្រភេទ នៅតាមគ្រឹះស្ថានសិក្សាដើម្បីសុខភាព ដូចជា ចំណីហួសកាលកំណត់ប្រើប្រាស់ គ្រឿងស្រវឹង និងផលិតផលថ្នាំជក់គ្រប់ប្រភេទ ចំណីអាហារគ្មានប្រភពច្បាស់លាស់ ភេសជ្ជៈប៉ូវកម្លាំង ភេសជ្ជៈផ្អែម កាហ្វេការ៉េម និងទឹកស៊ីរ៉ូគ្រប់ប្រភេទ ស្ករសូកូឡា ស្ករគ្រាប់ និងស្ករកៅស៊ូ ព្រមទាំងចាហួយគ្រប់ប្រភេទ នំដូណាត់ និងនំផ្អែម។
លោក ហែម ស៊ីណារ៉េត បន្ថែមថា កន្លងមកមន្ទីរអប់រំបានចុះធ្វើអធិការកិច្ចតាមសាលារៀនមួយចំនួន ដើម្បីពិនិត្យការលក់ចំណីរបស់អាជីវករខ្លះដែលមិនគោរពតាមសេចក្ដីណែនាំរបស់ក្រសួងអប់រំ និងបានឱ្យពួកគេធ្វើកិច្ចសន្យាបញ្ចប់ការលក់ចំណីហាមឃាត់ទាំងនោះ។
ចំណែកលោក ងី មានហេង ប្រធានមន្ទីរសុខាភិបាលរាជធានីភ្នំពេញបានលើកឡើងដែរថា ការប្រកាសពីផែនការថ្មីរបស់រដ្ឋបាលរាជធានីភ្នំពេញនេះគឺជាការពង្រឹងបន្ថែមនូវសេចក្ដីណែនាំរបស់ក្រសួងអប់រំ។
លោកបន្តថាចាប់ពីចុងឆ្នាំ ២០១៨ ដល់ដើមឆ្នាំ ២០១៩ មន្ទីរសុខាភិបាល មន្ទីរអប់រំ និងរដ្ឋបាលរាជធានីភ្នំពេញបានរៀបចំសិក្ខាសាលាសិក្សាចំនួន ៧ ដង ដោយមានការចូលរួមពីនាយកសាលា សមាជិកក្រុមប្រឹក្សាសង្កាត់ទាំង ១០៥ គណៈអភិបាលខណ្ឌទាំង ១២ និងប្រធានភូមិមួយចំនួនហើយបានធ្វើយុទ្ធនាការផ្សព្វផ្សាយរយៈពេល ១ ខែ តាមម៉ូតូកង់៣ និងស្ថានីយទូរទស្សន៍ វិទ្យុ ដើម្បីបញ្ជ្រាបចំណេះដឹងទៅកាន់ពលរដ្ឋ។
លោក ងី មានហេង បន្ថែមថានៅខែមករា និងខែកុម្ភៈឆ្នាំ ២០២០ ខាងមុខនេះក៏នឹងមានការធ្វើយុទ្ធនាការ និងការរៀបចំសិក្ខាសាលា ៤ លើកបន្ថែមទៀតដោយត្រូវអញ្ជើញគ្រូ ២ នាក់ពីសាលារៀននីមួយៗនៃសាលាចំនួន ៤០ មាតាបិតាសិស្ស និងអាជីវករលក់ចំណីតាមសាលាមួយចំនួនដើម្បីបញ្ជ្រាបចំណេះដឹងបន្ថែមលើការណែនាំឲ្យឈប់ប្រើប្រាស់ភេសជ្ជៈផ្អែមនៅតាមសាលារៀននេះ៕