ភ្នំពេញៈ រដ្ឋបាលរាជធានីភ្នំពេញឲ្យជូនដំណឹងដល់សាធារណជនកុំឱ្យចាញ់បោកក្រុមជនដែលក្លែងបន្លំខ្លួនជាមន្ដ្រីរដ្ឋាករស្វយ័តគ្រប់គ្រងសំរាម និងសំណល់រឹងដែលឱ្យបង់ថ្លៃសេវាប្រមូលសំរាមតាមមូលប្បទានបត្រ (Cheque) ឬជាសាច់ប្រាក់ផ្ទាល់ ព្រោះការបង់ថ្លៃសេវានេះមានតែតាមប្រព័ន្ធអេឡិចត្រូនិក ឬតាមបញ្ជរធនាគារ និងមីក្រូហិរញ្ញវត្ថុជាដៃគូប៉ុណ្ណោះ។
លោក ម៉េត មាសភក្ដី អ្នកនាំពាក្យសាលារាជធានីថ្លែងប្រាប់ភ្នំពេញប៉ុស្ដិ៍ពីថ្ងៃ ១២ សីហា ថា ថ្មីៗនេះមានជនខិលខូចបានបន្លំខ្លួនធ្វើជាមន្ដ្រីរដ្ឋាករស្វយ័តគ្រប់គ្រងសំរាម និងសំណល់រឹងរាជធានីភ្នំពេញទៅយកថវិកាថ្លៃសំរាមពីពលរដ្ឋដោយផ្ទាល់។
លោកថា៖ «ជំហានដំបូងនេះ វិធានការរបស់យើងគឺជូនដំណឹងដល់ពលរដ្ឋឱ្យបានដឹងជាមុនសិន។ ករណីរកឃើញជនខិលខូចដែលឆបោកពលរដ្ឋ និងការអនុវត្ដវិធានការច្បាប់ចំពោះជនខិលខូចយើងនឹងជូនដំណឹងបន្តទៀតនៅពេលក្រោយ»។
តាមសេចក្ដីជូនដំណឹងរបស់រដ្ឋបាលរាជធានីភ្នំពេញចុះថ្ងៃទី ១១ សីហា បញ្ជាក់ថា៖ «ថ្មីៗនេះមានករណីជនខិលខូច ១ ក្រុមបានឆ្លៀតឱកាសក្លែងបន្លំខ្លួនជាមន្ដ្រីរដ្ឋាករស្វយ័តគ្រប់គ្រងសំរាម និងសំណល់រឹងរាជធានីភ្នំពេញធ្វើការឆបោកអតិថិជនឱ្យបង់ថ្លៃសេវាប្រមូលសំរាម និងសំណល់រឹងដោយចេញជាមូលប្បទានបត្រ (Cheque) ឬទូទាត់ជាសាច់ប្រាក់ដោយផ្ទាល់ជាមួយពួកគេ»។
រដ្ឋបាលរាជធានីភ្នំពេញបានរំឭកថា ចាប់ពីថ្ងៃទី ១ ខែ មករា ឆ្នាំ ២០២០ មកសេវាប្រមូលសំរាមមិនត្រូវបានដាក់ក្នុងវិក្កយបត្រអគ្គិសនីទៀតទេ គឺតម្រូវឱ្យអតិថិជនបង់ថ្លៃសេវានេះតាមមធ្យោបាយអេឡិចត្រូនិក (តាមទូរស័ព្ទដៃ) ឬបញ្ជរទូទាត់នៅធនាគារ មីក្រូហិរញ្ញវត្ថុ និងភ្នាក់ងារទូទាត់ជាដៃគូរបស់សាលាក្រុង។
បើតាមរដ្ឋបាលរាជធានីភ្នំពេញ មធ្យោបាយបង់ថ្លៃសេវាសំរាមបច្ចុប្បន្ន ធ្វើតាមធនាគារ ACLEDA,ABA,Wing,AMK,WbFinance,Prince Bank,ស្ថាបនា ឬតាមភ្នាក់ងារទូទាត់ប្រាក់ផ្សេងៗទៀត ដូចជា eMONEY, Lyhour Weiluy, Pi Pay, និង Dara Pay។
រដ្ឋបាលរាជធានីភ្នំពេញឲ្យដឹងដែរថា រាល់ការបង់ថ្លៃសេវាប្រមូលសំរាម មិនអនុញ្ញាតឱ្យទូទាត់ជាសាច់ប្រាក់ទេ។ ប៉ុន្ដែក្នុងករណីការចេញជាមូលប្បទានបត្រត្រូវសរសេរទៅឈ្មោះ «រដ្ឋាករស្វយ័តគ្រប់គ្រងសំរាម និងសំណល់រឹងរាជធានីភ្នំពេញ» ឬជាភាសាអង់គ្លេស «Phnom Penh Solid Waste Management Authority» ដោយផ្ទាល់តែម្ដង។
ជាមួយនេះដែរ រដ្ឋបាលរាជធានីភ្នំពេញបានបញ្ជាក់ថា ក្នុងករណីបងប្អូនពលរដ្ឋ ម្ចាស់អាជីវកម្ម សេវាកម្ម និងស្ថាប័នឯកជនជួបករណីដូចខាងលើមិនត្រូវធ្វើតាមការឆបោកនោះទេ។ ផ្ទុយទៅវិញត្រូវរាយការណ៍មកអាជ្ញាធរតាមរយៈទូរស័ព្ទលេខ ០៨៧ ២៥៨ ៨៣៥ ឬរាយការណ៍ទៅសមត្ថកិច្ចមូលដ្ឋានរបស់ពលរដ្ឋផ្ទាល់ ដើម្បីចាប់ខ្លួនក្រុមជនខិលខូចទាំងនោះមកផ្តន្ទាទោសតាមច្បាប់៕
វីដេអូ៖