កណ្ដាល៖ សាលាខេត្តកណ្តាលបានរៀបចំទីលានកីឡដ្ឋានខេត្តកណ្តាល ទៅជាផ្សារលក់ដូរបណ្តោះអាសន្ន សម្រាប់អាជីវករ និងប្រជាពលរដ្ឋ ដោយសារទីតាំងនេះមានទំហំធំ សម្រាប់អ្នកលក់ និងអ្នកទិញ ដោយអាចរក្សាគម្លាតសុវត្ថិភាពបានត្រឹមត្រូវ ប៉ុន្តែអ្នកទិញអាចចូលទិញបានតែពី ១០ ទៅ ១៥ នាទីប៉ុណ្ណោះ។
តាមការផ្សាយផ្ទាល់ នៅកន្លែងកីឡដ្ឋានខេត្តកណ្តាលនៅព្រឹកថ្ងៃចន្ទនេះ អាជ្ញាធរបានអនុញ្ញាតឱ្យអតិថិជនអាចចូលទិញម្ហូបអាហារ នៅក្នុងផ្សារបណ្តោះអាសន្ននេះបានហើយ ប៉ុន្តែមុននឹងចូលត្រូវបានក្រុមយុវជននៃសហភាពសហព័ន្ធយុវជនកម្ពុជា រួមទាំងសមត្ថកិច្ច បានជួយសម្រួលក្នុងវាស់កម្ដៅ បាញ់អាល់កុល និងតម្រូវឱ្យរក្សាគម្លាតគ្នាផងដែរ។
អភិបាលខេត្តកណ្តាល លោក គង់ សោភណ្ឌ បានសម្រេចរៀបចំទីតាំងក្នុងកីឡដ្ឋានខេត្តកណ្តាលនេះ ធ្វើជាផ្សារបណ្តោះអាសន្នបន្ទាប់ពីផ្សារមួយចំនួនក្នុងក្រុងតាខ្មៅ ខេត្តកណ្តាល បានបិទជាបណ្តោះអាសន្ន។ ផ្សារដែលបានបិទនោះមាន ផ្សារព្រែកហូរ ផ្សារតាខ្មៅថ្មី ផ្សារតាខ្មៅចាស់ និងផ្សារដើមអំពិលជាដើម ដែលត្រូវបានបិទរយៈពេល ១៤ ថ្ងៃ ដោយសារភាពចង្អៀតណែន និងដើម្បីរក្សាគម្លាតរវាងអ្នកលក់ និងអ្នកទិញ។
លោក ជៀម ខូយ ចៅសង្កាត់តាខ្មៅ បានប្រកាសប្រាប់អ្នកទិញទាំងអស់ដែលបានចូលទិញរួចហើយមិនត្រូវនៅនិយាយលេង ឬអូសបន្លាយពេលវេលាយូរនៅក្នុងផ្សារនោះទេ គឺត្រូវតែប្រញាប់ចាកចេញពីផ្សារនេះ ដើម្បីកាត់បន្ថយចំនួនមនុស្សច្រើន។
លោកបានថ្លែងថា៖ «អ្នកដែលបានទិញរួចហើយ ត្រូវប្រញាប់ចាកចេញទៅវិញ ដើម្បីឱ្យអ្នកថ្មីអាចចូលទិញជាបន្តបន្ទាប់ទៀត។ ត្រូវទិញឱ្យបានលឿន មិនត្រូវនៅនិយាយគ្នាលេងនោះទេ។ ម្នាក់ចំណាយតែ ១០ ទៅ ១៥ នាទី បានហើយសម្រាប់ដើរទិញអីវ៉ាន់នេះ»។
លោក ជៀម ខូយ បានបញ្ជាក់ ការធ្វើបែបនេះ គឺដើម្បីការពារនូវការចម្លងនៃវីរុសកូវីដ ១៩ ទៅដល់ប្រជាពលរដ្ឋ។
គួរបញ្ជាក់ផងដែរថា ទីតាំងក្នុងកីឡដ្ឋានខេត្តកណ្តាលនេះ អាចរៀបចំដាក់ស្តង់លក់ដូរបានប្រមាណជាជាង ១០០ តូបតូចៗ និងមានគម្លាតគ្នាផងដែរ៕