រតនគិរី៖ គណៈអភិបាលខេត្តរតនគិរី បានសម្រេចដកអ្នកបើកបររថយន្តគិលានសង្គ្រោះរបស់មន្ទីរពេទ្យបង្អែកខេត្តរតនគិរីចេញពីក្របខ័ណ្ឌ បន្ទាប់ពីបានរកឃើញកំហុសរបស់បុរសរូបនេះ បំពេញការងារមិនបានល្អជុំវិញករណីសម្រេចចិត្តដោយខ្លួនឯងក្នុងដាក់ចុះសពស្ត្រីម្នាក់នៅពាក់កណ្តាលផ្លូវ ដោយមិនព្រមដឹកឱ្យដល់លំនៅឋាន។
លោក ញ៉ែម សំអឿន អភិបាលរង និងជាអ្នកនាំពាក្យរដ្ឋបាលខេត្តរតនគិរី បានថ្លែងកាលពីម្សិលមិញថា បន្ទាប់ពីបានដឹងថា មានអ្នកបើកបររថយន្តគិលានសង្គ្រោះរបស់មន្ទីរពេទ្យបង្អែកដឹកសពមិនដល់ផ្ទះ ដោយដាក់ចុះនៅកណ្តាលផ្លូវ លោកបានឱ្យមន្ត្រីធ្វើការស្រាវជ្រាវឱ្យបានច្បាស់។ ក្រោយមកក៏បានរកឃើញថា នេះមិនមែនជាកំហុសស្ថាប័នមន្ទីរពេទ្យបង្អែកនោះទេ តែគឺជាកំហុសបុគ្គលផ្ទាល់ដែលជាអ្នកបើកបរ។
លោកបានបន្តថា អ្នកបើកបរនោះជាមន្ត្រីជាប់កិច្ចសន្យា តែបំពេញការងារមិនបានល្អ ហើយក៏មានការរិះគន់ពីអ្នកជំងឺជាច្រើនក្នុងពេលកន្លងមកដែរ បូករួមជាមួយកំហុសលើកនេះទៀត គណៈអភិបាលខេត្តក៏បានប្រជុំ និងសម្រេចថា នឹងបញ្ឈប់តែម្តង។ «ស្មារតីនៃអង្គប្រជុំគណៈអភិបាលខេត្តក្នុងរឿងនេះយើងសម្រេចថា នឹងដកគាត់ចេញ ប៉ុន្តែពេលនេះមិនទាន់បានចេញលិខិតជាផ្លូវការនៅឡើយទេ»។ លោក អ៊ុង រតនា ប្រធានមន្ទីរសុខាភិបាលខេត្តរតនគិរីថ្លែងថា មន្ទីរបានចេញសេចក្តីបំភ្លឺរួចហើយ លោកមិនមានអ្វីបញ្ជាក់បន្ថែមទៀតទេ ព្រោះការចេញសេចក្តីបំភ្លឺនេះ មិនមែនធ្វើឡើងដោយមន្ទីរតែឯងនោះទេ គឺសុទ្ធតែមានការប្រជុំគណៈអភិបាលខេត្តត្រឹមត្រូវមុននឹងចេញ។
លោកបានបញ្ជាក់ថា៖«មិនមែនសម្រេចតែខ្ញុំទេណា គឺប្រជុំគណៈអភិបាលខេត្ត ដើម្បីពិនិត្យមើលថាតើវាត្រឹមត្រូវ ឬអត់ហើយទណ្ឌកម្មរបៀបម៉េចក៏ស្ថិតលើគណៈអភិបាលខេត្តដែរ»។
តាមសេចក្តីបំភ្លឺព័ត៌មានរបស់មន្ទីរសុខាភិបាលខេត្តរតនគិរីចេញថ្ងៃទី ១៧ ខែមីនា ដែល ភ្នំពេញ ប៉ុស្តិ៍ ទើបទទួលបានកាលពីម្សិលមិញឱ្យដឹងថា នៅថ្ងៃទី ២ ខែកុម្កៈ ឆ្នាំ ២០២១ មន្ទីរពេទ្យបង្អែកខេត្ត បានអនុញ្ញាតឱ្យរថយន្តគិលានសង្គ្រោះម៉ាកឡង់គ្រីស័រស្លាកលេខរដ្ឋ 12-2-0129 បើកបរដោយឈ្មោះ អ៊ន ប៊ុនឡេង បានដឹកជញ្ជូនសពស្ត្រីម្នាក់ឈ្មោះ គ្វីម ម៉ក់ អាយុ ៣១ ឆ្នាំ ទៅលំនៅឋាន ដែលស្ថិតនៅក្នុងភូមិផាក់ណាម ឃុំកោះពាក្យ ស្រុកវើនសៃ ខេត្តរតនគិរី។
លុះដល់ចំណុចត្រង់ស្ពានអូរលីង ស្ថិតនៅក្បែរភូមិឃួន ឃុំកោះពាក្យ ស្រុកវើនសៃ អ្នកបើកបររថយន្តឈ្មោះ អ៊ន ប៊ុនឡេង បានសម្រេចចិត្តដាក់សពស្ត្រីនោះចុះដោយឯកឯង ហើយបន្ទាប់មកសពរបស់ស្ត្រីនោះ ត្រូវបានក្រុមគ្រួសារដឹកជញ្ជូនបន្តដោយម៉ូតូទៅលំនៅឋានរបស់ខ្លួន។
នៅក្នុងលិខិតនោះបន្ថែមថា៖ «ករណីនេះវាជាទង្វើផ្ទាល់របស់សាមីខ្លួនអ្នកបើកបរដែលបានប្រព្រឹតខុសឆ្គងទៅនឹងវិជ្ជាជីវៈសុខាភិបាល និងមិនបានអនុវត្តតាមការណែនាំរបស់អង្គភាព។ មន្ទីរសុខាភិបាលនៃរដ្ឋបាលខេត្តរតនគិរី ពិតជាមានការសោកស្តាយចំពោះហេតុការណ៍ដែលបានកើតឡើង»។
ក្នុងសេចក្តីបំភ្លឺនោះបញ្ជាក់ថា ករណីនេះមន្ទីរសុខាភិបាលខេត្តក៏បានចូលរួមរំលែកទុក្ខដ៏ក្រៀមក្រំដល់គ្រួសារសព្វផងដែរ ចំពោះទង្វើមិនសមរម្យរបស់អ្នកបើកបររថយន្តគិលានសង្គ្រោះឈ្មោះ អ៊ន ប៊ុនឡេង នេះ។
លោក ម៉ង វិចិត្ត នាយកប្រតិបត្តិស្តីទីអង្គការសមាគមខ្មែរលើបានថ្លែងថា ការធ្វើបែបនេះជារឿងមិនគួរឡើយ ទោះបីមនុស្សស្លាប់ក្លាយជាសាកសពក៏ដោយ ក៏គាត់នៅតែអាចមានសិទ្ធិថ្លៃថ្នូរដដែល។ ទោះបីជាមានប្រពៃណីទំនៀមទម្លាប់ជនជាតិដើមភាគតិចរារាំងមិនឱ្យអ្នកស្លាប់តៃហោង ឬស្លាប់ដោយមានផ្ទៃពោះចូលភូមិយ៉ាងណាក៏ដោយ។
លោកបានថ្លែងថា៖ «ខ្ញុំគិតថា ប្រហែលជាតៃកុងឡានគាត់យល់ខុសពីអត្ថន័យនៃការផាកហ្នឹង អ៊ីចឹងទើបគាត់ដាក់សពចុះត្រឹមពាក់កណ្តាលផ្លូវអ៊ីចឹងទៅ។ នៅទីនេះពិតជាមានប្រពៃណីតាមភូមិមែន ប៉ុន្តែគេមិនមែនផាកអ្នកបើកបរជូនសពទៅនោះទេ គឺគេផាកគ្រួសារសព អាហ្នឹងបើតាមប្រពៃណីពួកខ្ញុំជាជនជាតិដើមភាគតិច»៕