គ្រូពេទ្យកំពុងពិនិត្យអ្នកពុលស្រា នៅស្រុកកំពង់ត្រាច ខេត្តកំពត កាលពីថ្ងៃទី២៤ខែឧសភា ករណីដែលមានអ្នកពុលស្លាប់១០នាក់។ រូបថត សហការី
កំពតៈ សាលាដំបូងខេត្តកំពតនៅថ្ងៃទី២៧ ខែឧសភា ឆ្នាំ២០២១ បានសម្រេចឃុំខ្លួន អ្នកផលិតស្រាម្នាក់ក្នុងចំណោមគ្នា២នាក់ ដាក់ពន្ធនាគារជាបណ្ដោះអាសន្ន ក្រោយពីក្រសួងសុខាភិបាល បានរកឃើញថា សំណាកស្រា ដែលពួកគាត់ផលិតមានសារធាតុមេតាណុលខ្ពស់ហួសកម្រិត ដែលនាំឲ្យអ្នកបរិភោគពុលស្លាប់រហូតដល់១០នាក់។
លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានប្រាប់ភ្នំពេញប៉ុស្តិ៍ថា លោក គុយ សុខ អាយុ៤៨ឆ្នាំ និង អ្នកស្រី ជ័យ សុផល អាយុ៣៤ឆ្នាំ មានទីលំនៅភូមិរបងក្រាស់ ឃុំកំពង់ត្រាចខាងកើត ស្រុកកំពង់ត្រាច ត្រូវបានកម្លាំងការិយាល័យព្រហ្មទណ្ឌនៃស្នងការដ្ឋាននគរបាលខេត្តកំពត ឃាត់ខ្លួននៅថ្ងៃទី២៤ ខែឧសភា ឆ្នាំ២០២១ ដើម្បីសួរនាំជុំវិញករណីអ្នកភូមិ១០នាក់បានស្លាប់ និងជាច្រើននាក់ទៀត បានធ្លាក់ខ្លួនឈឺជាបន្តបន្ទាប់ ក្រោយពីអ្នកភូមិទាំងនោះ បាននាំគ្នាបរិភោគស្រាក្នុងពិធីបុណ្យសពរបស់លោក មុំ សាមុត កាលពីថ្ងៃទី២១ ខែឧសភា ឆ្នាំ២០២១ដែលស្រានោះ ត្រូវបានអ្នកភូមិអះអាងថា បានទិញពីសិប្បកម្មផលិតស្រារបស់ពួកគាត់។
លោក ច័ន្ទមធុរិទ្ធ បញ្ជាក់ថា៖«មន្ត្រីនគរបាលជំនាញយើង បានសម្រេចកសាងសំណុំរឿង និង បញ្ជូនពួកគាត់ទាំង២នាក់ទៅកាន់តុលាការ កាលពីល្ងាចថ្ងៃពុធ»។
ជុំវិញករណីនេះ លោកម៉ាន បូរេត អ្នកនាំពាក្យសាលាដំបូងខេត្តកំពត បានប្រាប់ភ្នំពេញប៉ុស្តិ៍នៅរសៀលថ្ងៃទី២៧ ខែឧសភាថា ក្រោយពីធ្វើការសាកសួរ និងពិនិត្យទៅលើរបាយការណ៍ របស់សមត្ថកិច្ចជំនាញបានល្អិតល្អន់ តុលាការបានសម្រេចឃុំខ្លួនបុរសជាប់សង្ស័យឈ្មោះ គុយ សុខ ដាក់ពន្ធនាគារជាបណ្ដោះអាសន្ន។
ចំណែកស្ត្រី ឈ្មោះ ជ័យ សុផល ត្រូវបានដោះលែងឲ្យត្រឡប់ទៅផ្ទះវិញ ដោយសារលទ្ធផលនៃការពិសោធន៍លើសំណាកស្រារបស់គាត់ ដែលសមត្ថកិច្ចជំនាញបានភ្ជាប់មកជាមួយនោះ បានបញ្ជាក់ថា «ពុំមានសារធាតុមេតាណុល» ។
លោក បូរេតបានបញ្ជាក់ថា៖«អ្នកផលិតស្រា ឈ្មោះ គុយ សុខ ត្រូវបានតុលាការ ចោទប្រកាន់ពីបទប្រព្រឹត្តអំពើមិនសុចរិតទាក់ទងនឹងទំនិញ សេវា ឬការអះអាងដោយបំភាន់ មានស្ថានទម្ងន់ទោស តាមបញ្ញតិមាត្រា៤៣នៃច្បាប់ស្ដីពីកិច្ចការពារអ្នកប្រើប្រាស់ និង បានបង្គាប់ឲ្យនាំយកទៅឃុំខ្លួនក្នុងពន្ធនាគារខេត្តកំពតជាបណ្ដោះអាសន្ន»។
យោងតាមបញ្ញតិមាត្រា៤៣នៃច្បាប់ស្ដីពីកិច្ចការពារអ្នកប្រើប្រាស់ ជនសង្ស័យក្នុងបទល្មើសខាងលើនេះ នឹងត្រូវប្រឈមការផ្ដន្ទាទោសជាប់ពន្ធនាគារពី ២ឆ្នាំ ទៅ៥ឆ្នាំ និងពិន័យជាប្រាក់ពី៤លានរៀលដល់១០លានរៀល។
ករណីពុលស្រាក្នុងស្រុកកំពង់ត្រាចខេត្តកំពត បានកើតឡើងនៅថ្ងៃទី២១ ខែឧសភា ឆ្នាំ២០២១ ដោយផ្ដើមចេញពីបុរសវ័យចំណាស់ម្នាក់ ឈ្មោះ មុំ សាមុត មានទីលំនៅភូមិធ្នុង ឃុំឫស្សីស្រុកខាងកើតបានស្លាប់ ក្រោយពីគាត់បានបរិភោគស្រា។
បន្ទាប់មកអ្នកភូមិជាច្រើននាក់ ដែលបានទៅចូលរួមក្នុងពិធីបុណ្យសពរបស់គាត់ ហើយបានទទួលទានស្រាបានធ្លាក់ខ្លួនឈឺនិងស្លាប់ជាបន្តបន្ទាប់ ដែលគិតចាប់ពីថ្ងៃទី២៤ ខែឧសភា មានអ្នកឈឺសរុប៥៦នាក់ ក្នុងនោះស្លាប់១០នាក់។ នេះបើយោងសេចក្ដីជូនដំណឹងរបស់ក្រសួងសុខាភិបាល កាលពីល្ងាចថ្ងៃទី២៥ ខែឧសភាឆ្នាំ ២០២១។
បើតាមក្រសួងសុខាភិបាល ក្នុងចំណោមសំណាកស្រាចំនួន១១ ដែលប្រមូលមកពីភូមិឃុំកើតហេតុនៃខេត្តកំពត មាន៦សំណាក មានសារធាតុមេតាណុលលើពីកម្រិត ០,២ភាគរយ ដល់១១,៩ភាគរយ ដែលធ្វើឲ្យពុល ដែលជាទូទៅកម្រិតសារធាតុមេតាណុល នៅក្នុងស្រាគឺត្រឹមតែ ០,១ភាគរយប៉ុណ្ណោះ ដែលមិនបង្កឲ្យពុល។
ក្រសួងសុខាភិបាលបានសន្និដ្ឋានថា៖«ករណីស្លាប់នៅស្រុកកំពង់ត្រាចខេត្តកំពត និងករណីស្លាប់នៅស្រុកល្វាឯម ខេត្តកណ្តាល គឺបណ្ដាលមកពីអ្នកភូមិបានពិសាស្រាស ឬ ស្រាត្រាំថ្នាំ ដែលមានសារធាតុមេតាណុលខ្ពស់»។
ករណីពុលស្រានៅស្រុកល្វាឯម ខេត្តកណ្ដាល បានកើតឡើងពីថ្ងៃទី ៨-១៩ ខែឧសភា ឆ្នាំ ២០២១ ដោយមានជនរងគ្រោះសរុប២៣នាក់ ក្នុងនោះ១២នាក់បានស្លាប់ និង១១នាក់ធ្លាក់ខ្លួនឈឺ។
ក្នុងករណីនេះ អ្នកផលិតនិងអ្នកលក់ចែកចាយបន្តសរុបចំនួន១៣នាក់ ត្រូវបានតុលាការខេត្តកណ្ដាល បានសម្រេចឃុំខ្លួនពួកគេដាក់ពន្ធនាគារជាបណ្ដោះអាសន្ន ដោយចោទប្រកាន់ពីបទ«អំពើមិនសុចរិត ទាក់ទងនឹងទំនិញ សេវា ឬការអះអាងដោយបំភាន់ មានស្ថានទម្ងន់ទោស» តាមបញ្ញតិមាត្រា៤៣នៃច្បាប់ស្ដីពីកិច្ចការពារអ្នកប្រើប្រាស់ ផងដែរ។ នេះបើតាម លោក សូ សារិនអ្នកនាំពាក្យសាលាដំបូងខេត្តកណ្ដាល។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានកត់សម្គាល់ឃើញថា ករណីពុលស្រាសនេះ គឺជារឿងដដែលៗ ដែលធ្លាប់កើតមានឡើងនៅក្នុងខេត្តកំពង់ឆ្នាំង ក្រចេះ បាត់ដំបង បន្ទាយមានជ័យ កណ្ដាល ហើយចុងក្រោយនេះ បានកើតមានឡើងនៅក្នុងខេត្តកំពត។
លោក បានក្រើនរំឭកសាជាថ្មីម្ដងទៀត ដល់ប្រជាពលរដ្ឋ សូមកុំពិសាស្រាបិតឬលាយគ្មានបច្ចេកទេសត្រឹមត្រូវ និងគ្មានការត្រួតពិនិត្យ។ ចំពោះអ្នកប្រកបអាជីវកម្ម ហាមដាច់ខាត កុំយកសារធាតុមេតាណុល មកលាយធ្វើស្រាស ដែលបង្កឱ្យពុលនិងស្លាប់។
ចំណែកអាជ្ញាធរខេត្ត ស្រុក ក្រុង ខណ្ឌរដ្ឋបាលឃុំ/សង្កាត់ ត្រូវចាត់តាំងកម្លាំងគ្រប់គ្រង ឃ្លាំមើល និងទប់ស្កាត់ការលក់ស្រាបិត ឬលាយគ្មានបច្ចេកទេសត្រឹមត្រូវ និងណែនាំប្រជាពលរដ្ឋឱ្យចៀសវាង យកសារធាតុ មេតាណុលលាយធ្វើស្រា ស ដែលបង្កឱ្យពុលនិងស្លាប់៕
