.jpg)
ក្រុមពលរដ្ឋពេលសមត្ថកិច្ចឃាត់ខ្លួនពីរឿងបោះជំរំរានយកដី។ រូបថតៈ ហ្វេសប៊ុក
មណ្ឌលគិរីៈ ព្រះរាជអាជ្ញាអមសាលាដំបូងខេត្តមណ្ឌលគិរីកាលពីម្សិលមិញបានចោទប្រកាន់មនុស្ស ៦ នាក់ បន្ទាប់ពីសមត្ថកិច្ចឃាត់ខ្លួនរឿងបោះជំរំជាង ១០ ដើម្បីកាប់ឆ្ការទន្ទ្រានយកដីព្រៃកាបូនជាទីតាំងដែលត្រូវបានលក់ទៅឲ្យក្រុមហ៊ុន Disney របស់សហរដ្ឋអាមេរិក។
ក្រោយឃាត់ខ្លួនសាកសួរជាច្រើនថ្ងៃ បុរសជាជនចំណាកស្រុក ៥ នាក់ និងស្ត្រីម្នាក់ត្រូវបានតំណាងអយ្យការខេត្តចោទប្រកាន់ និងបញ្ជូនទៅឲ្យចៅក្រមស៊ើបអង្កេតពាក់ព័ន្ធនឹងការដាក់ស្លាកសញ្ញាដើម្បីទន្ទ្រានយកដីព្រៃនៅភូមិពូគង់ ឃុំស្រែព្រះ ស្រុកកែវសីមា ក្នុងដែនជម្រកសត្វព្រៃកែវសីមាជាកន្លែងក្រុមហ៊ុន Disney អាមេរិកទិញយកកាបូនក្នុងតម្លៃជាង ២ លានដុល្លារកាលពីឆ្នាំ ២០១៦។ នេះបើតាមលោក ឌិន ប៊ុនធឿន នាយកដែនជម្រក។
លោក ប៊ុនធឿន បានបញ្ជាក់ថា៖ «ពួកគេបាននាំគ្នាទៅបោះតង់ជំរំច្រើនដែរគឺ ១០ នៅក្នុងព្រៃ ហើយត្រូវព្រះរាជអាជ្ញាចោទប្រកាន់ពីបទដាក់សញ្ញាសម្គាល់ដើម្បីកាប់យកដីដែលមានចែងក្នុងច្បាប់តំបន់ការពារ»។
លោកបានបន្ថែមថាពលរដ្ឋទាំង ៦ នាក់បានសារភាពថាពួកគេចូលទៅបោះជំរំដើម្បីទន្ទ្រានយកដីនោះគឺធ្វើឡើងក្រោមការដឹកនាំរបស់បុគ្គលម្នាក់ឈ្មោះ ប៉ាង ឈួន ជាប្រធានអង្គការជនពិការ និងសង្គ្រោះការពារកុមារកំព្រា ដែលស្ថិតនៅភូមិពូចារ ឃុំស្រែព្រះ ស្រុកកែវសីមា។
លោក គង់ ពុទ្ធីរ៉ា មន្ត្រីគម្រោង RED+ នៃដែនជម្រកសត្វព្រៃកែវសីមារបស់ក្រសួងបរិស្ថានបានឲ្យដឹងថា ប្រជាសហគមន៍ពូគង់ និងមន្ត្រីឧទ្យានុរក្សបានដើរល្បាតព្រៃ ហើយបានប្រទះឃើញតង់ទាំងនោះនៅក្នុងព្រៃ និងបានចាត់វិធានការបង្ក្រាបកាលពីថ្ងៃសៅរ៍ចុងសប្តាហ៍មុនដោយបានឃាត់ខ្លួនមនុស្សទាំង ៦ នាក់នោះ ដែលពួកគេមកពីខេត្តព្រៃវែង ក្រចេះ ត្បូងឃ្មុំ ជាដើម។
តាមការរាយការណ៍ប្រាប់លោកថាពួកគេបានអះអាងថាមានមេខ្យល់ និងប្រធានអង្គការឈ្មោះ ប៉ាង ឈួន ជាអ្នកអូសទាញពួកគេឲ្យទៅកាប់ព្រៃការពារដែលស្ថិតក្នុងគម្រោង RED+ ដែលក្រុមហ៊ុនផលិតភាពយន្តដ៏ល្បីល្បាញអាមេរិកឈ្មោះ Disney បានទិញយកកាបូននៅទីនោះ។
លោកបញ្ជាក់ថា៖ «អ្នក ៦ នាក់ហ្នឹងបានឆ្លើយថាគេមកតាមប្រធានអង្គការជនពិការ និងសង្គ្រោះកុមារកំព្រាឲ្យមកកាប់រានព្រៃដែលរដ្ឋាភិបាលលក់កាបូនឲ្យក្រុមហ៊ុនហ្នឹង។ គេធ្វើគ្មានច្បាប់គ្មានទម្លាប់ទេគឺតាមតែខ្សែរយៈការកេណ្ឌរបស់ប្រធានអង្គការ»។
លោកបានបន្តថាប្រធានអង្គការនេះបានប្រើឈ្មោះសង្គ្រោះកុមារកំព្រាដើម្បីជាលេសក្នុងសកម្មភាពនេះដែលជាទង្វើមួយមិនគប្បី។ លោកថា ពួកគេបានចាប់ផ្តើមធ្វើសកម្មភាពជាច្រើនសប្តាហ៍មកហើយ ដោយនាំគ្នាបោះជំរំតង់ កាប់ឆ្ការព្រៃចូលវាស់វែងដីដើម្បីចែកគ្នា និងបានចាប់ផ្តើមកាប់ឆ្ការព្រៃបានខ្លះហើយ។ បើគ្មានការទប់ស្កាត់ទេ ពេលកាប់ហើយ ពួកគេអាចនឹងលក់ដីនោះ។
លោក ពុទ្ធីរ៉ា ក៏បានឲ្យដឹងផងដែរថាតាមសេចក្តីរាយការណ៍ពីអាជ្ញាធរមូលដ្ឋានថា មានពលរដ្ឋប្រមាណជា ៨០០ នាក់ត្រូវបានកេណ្ឌយកមកកាប់ព្រៃនេះតាមប្រធានអង្គការនេះ។ ប៉ុន្តែតាមការបំភ្លឺរបស់ប្រធានអង្គការនេះថា មានតែ ១០០ នាក់ប៉ុណ្ណោះ។
លោកបានបញ្ជាក់ថា៖ «ជាសកម្មភាពមួយធ្វើដោយចិត្តឯងមកបំផ្លាញព្រៃ។ អាចកាប់ហើយវាលក់ដូរគ្មានច្បាប់ទម្លាប់។ យើងកំពុងស្រាវជ្រាវទៀត ព្រោះថាមានមនុស្សច្រើនណាស់ត្រូវបានកេណ្ឌទៅកាប់ទីនោះ...៨០០ នាក់គឺខ្ទេចខ្ទីគ្មានសល់ទេ បើគ្រប់គ្រងមិនបានល្អ»។
លោក មាស ប្រុស អ្នកនាំពាក្យសាលាដំបូងខេត្តមណ្ឌលគិរីបានថ្លែងកាលពីម្សិលមិញថាលោកមិនទាន់បានដឹងពីការបញ្ជូនអ្នកកាប់ព្រៃទាំង ៦ នាក់ទៅចៅក្រមស៊ើបសួរទេ ដោយសារជាប់រវល់ប្រជុំនៅភ្នំពេញ។
ទោះយ៉ាងណានាយកដែនជម្រកលោក ឌិន ប៊ុនធឿន បានឲ្យដឹងថាចៅក្រមម្នាក់បានសម្រេចដោះលែងពលរដ្ឋទាំង ៦ នាក់ឲ្យនៅក្រៅឃុំវិញ។ ក៏ប៉ុន្តែនៅតែស្ថិតក្រោមការតាមដានតាមនីតិវិធីដើម្បីចាប់មេខ្លោងនៃបទល្មើសនេះ។
លោកបានបញ្ជាក់ថា៖ «ពួកគាត់ត្រូវអនុញ្ញាតឲ្យនៅក្រៅឃុំ។ ពួកគាត់ក៏ជាជនរងគ្រោះដែរ ដោយសារមកតាមគេតាមឯងថាបានដីបានអីហ្នឹង»។ លោកបានបន្ថែមថា លោកនឹងធ្វើរបាយការណ៍ជូនព្រះរាជអាជ្ញាដើម្បីបន្តការស៊ើបអង្កេត និងកោះហៅអ្នកពាក់ព័ន្ធបន្តទៀត។
ភ្នំពេញ ប៉ុស្តិ៍ មិនអាចទាក់ទងលោក ប៉ាង ឈួន ដែលរងការចោទប្រកាន់បានទេកាលពីថ្ងៃម្សិលមិញ៕
