សៀមរាប៖ សាលាដំបូងខេត្តសៀមរាបសម្រេចឃុំខ្លួនឈ្មោះ អ៊ឹង ថៃលី ភេទប្រុស អាយុ ២២ ឆ្នាំ ទីលំនៅបច្ចុប្បន្នភូមិកក្រាញ់ សង្កាត់សៀមរាប ក្រុងសៀមរាប ដាក់ ពន្ធនាគារខេត្តសៀមរាបពីបទគេចវេះពីការធ្វើចត្តាឡីស័ក ឬគេចចេញពីទីកន្លែងធ្វើចត្តាឡីស័ក។
យោងតាមដីការបង្គាប់ឱ្យឃុំខ្លួនលេខ ៣១២ ឃខ/ដ ចុះហត្ថលេខាដោយលោក ស៊ិន សង្ហា ចៅក្រមស៊ើបសួរនៃសាលាដំបូងខេត្តសៀមរាបកាលពីថ្ងៃទី ៧ ខែឧសភា បានបង្គាប់ឱ្យភ្នាក់ងារមានសមត្ថកិច្ចនៃកងកម្លាំងសាធារណៈធ្វើការនាំខ្លួនជនត្រូវចោទដែលមានឈ្មោះខាងលើ ទៅពន្ធនាគារខេត្តសៀមរាប ដោយអនុវត្តឱ្យបានត្រឹមត្រូវតាមច្បាប់ រហូតដល់មានបទបញ្ជាថ្មីសម្រេចផ្សេងពីនេះ។
បើតាមដីកាបង្គាប់ ជននេះត្រូវបានដាក់ឱ្យស្ថិតនៅក្រោមការពិនិត្យពីបទគេចវះពីការធ្វើ ចត្តាឡីស័ក ឬគេចចេញពីទីកន្លែងធ្វើចត្តាឡីស័ក ប្រព្រឹត្តនៅភូមិក្រាញ់ សង្កាត់សៀមរាប ក្រុងសៀមរាប ខេត្តសៀមរាប។
យោងតាមច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ត្រង់មាត្រា ៧ ចែងថា បទគេចវេះពីការធ្វើចត្តាឡីស័ក ឬគេចចេញពីទីកន្លែងធ្វើចត្តាឡីស័ក ត្រូវផ្ដន្ទាទោសដាក់ពន្ធនាគារពី ៦ ខែទៅ ៣ ឆ្នាំ និង ពិន័យជាប្រាក់ពី ២ លានរៀលទៅ ១០ លានរៀល៕