ភ្នំពេញៈ ស្ត្រីជនជាប់ចោទម្នាក់ និងបុរសជនជាប់ចោទ ១២ នាក់ ត្រូវបាននាំខ្លួនមកកាន់សាលាដំបូងរាជធានីភ្នំពេញកាលពីម្សិលមិញដើម្បីបន្តការជំនុំជម្រះលើសំណុំរឿងប៉ុនប៉ងលួចប្រមូលកម្លាំងប្រដាប់អាវុធផ្តួលរំលំរាជរដ្ឋាភិបាលកម្ពុជាដែលប្រព្រឹត្តនៅរាជធានីភ្នំពេញ,ខេត្តកំពត និងខេត្តពោធិ៍សាត់កាលពីឆ្នាំ ២០១៨។
នៅក្នុងបន្ទប់សវនាការជំនុំជម្រះមានសមាសភាព ចៅក្រម ៣ រូបដែលមានលោកស្រីចៅក្រម ស៊ លីនណា និង មាន លោកស្រី កែវ សុគន្ធា ជា តំណាងអយ្យការរីឯមេធាវីការពារសិទ្ធិឲ្យជនជាប់ចោទចំនួន ៨ រូប និងមានវត្តមានជនជាប់ចោទទាំង ១៣ នាក់ផង។ ជនជាប់ចោទឈ្មោះ ហុង គឹមអេង អាយុ ៥៤ ឆ្នាំបានឆ្លើយប្រាប់ទៅចៅក្រមនៅក្នុងអង្គជំនុំជម្រះថា៖ «ខ្ញុំជាអ្នកធ្វើចម្ការរស់នៅខេត្តប៉ៃលិន ហើយខ្ញុំទៅប្រទេសថៃតាមរយៈបុរសម្នាក់ឈ្មោះ សំ តាំង ដែលបុរសម្នាក់នេះបានណែនាំខ្ញុំឲ្យទៅស្គាល់បុរសខ្មែរម្នាក់ទៀតនៅប្រទេសថៃឈ្មោះអាចារ្យឯក»។
លោក ហុង គឹមអេង និយាយថាបំណងរបស់គាត់ដែលទៅប្រទេសថៃនោះដើម្បីខ្ចីលុយព្រោះឈ្មោះ សំ តាំង ប្រាប់គាត់ថា បុរសឈ្មោះ អាចារ្យឯក នោះជាអ្នកមានលុយច្រើនហើយអាចឲ្យគាត់ (ហុង គឹមអេង) ខ្ចីលុយបាន។ ពេលគាត់ទៅដល់ប្រទេសថៃនៅឆ្នាំ ២០១៨ ហើយលោក អាចារ្យឯក រូបនោះបានបំបែកឲ្យគាត់នៅឆ្ងាយពីលោក សំ តាំង។ គាត់បានទៅជួបបុរសឈ្មោះ អាចារ្យឯក លើកទី ៣ ដែលបុរសនោះសន្យាជាមួយគាត់ថាគេនឹងឲ្យលុយគាត់ខ្ចី ប៉ុន្តែពេលទៅដល់បុរសឈ្មោះ អាចារ្យឯក នោះបាននិយាយណែនាំឲ្យគាត់ដើរប្រមូលមនុស្ស បង្កើតជាកម្លាំងប្រដាប់អាវុធដើម្បីផ្តួលរំលំរដ្ឋាភិបាលកម្ពុជាទៅវិញ។
លោក ហុង គឹមអេង និយាយប្រាប់ចៅក្រមថា តាមពិតទៅគាត់ទៅជួបបុរសឈ្មោះ អាចារ្យឯក នោះបំណងទៅខ្ចីលុយទេ ប៉ុន្តែពេលគាត់ទៅជួបទាំង ៣ លើកគឺឈ្មោះ អាចារ្យឯក រូបនោះមិនបាននិយាយរឿងលុយកាក់ទេ តែបែរជានិយាយពីរឿងនយោបាយ និងប៉ុនប៉ងផ្តួលរំលំរដ្ឋាភិបាលកម្ពុជាទៅវិញ។ ប៉ុន្តែគាត់បដិសេធរហូតនឹងការណែនាំរបស់បុរសនោះ។ គាត់រស់នៅក្រុងប៉ៃលិន ក្រៅពីធ្វើចម្ការគឺគាត់ជាអនុប្រធានសមាគមមួយឈ្មោះថា សមាគមបៃតង ដែលសមាគមនេះធ្វើការងារផ្តោតទៅលើការដាំកូនឈើ មិនពាក់ព័ន្ធនឹងរឿងនយោបាយទេ។ បន្ទាប់ពីខ្ចីលុយឈ្មោះ អាចារ្យឯក មិនបានគាត់បានស្គាល់ព្រះសង្ឃ ១ អង្គព្រះនាម វន សាវ៉ាន់ ហើយខ្ចីលុយព្រះសង្ឃអង្គនោះបាន ៥ ពាន់ដុល្លារដើម្បីធ្វើចម្ការ តែក្រោយមកលោកក៏ត្រូវសមត្ថកិច្ចឃាត់ខ្លួនដែរ។
លោក គឹមអេង ថា៖ «ពេលឈ្មោះ អាចារ្យឯក ប្រាប់ខ្ញុំឲ្យប្រមូលកម្លាំងសម្ងាត់នោះខ្ញុំប្រាប់គាត់ថា ខ្ញុំមកខ្ចីលុយលោក តែខ្ញុំមិនធ្វើតាមលោកប្រាប់ទេ»។
ចំពោះជនជាប់ចោទឈ្មោះ វន សាវ៉ាន់ និយាយប្រាប់ចៅក្រមក្នុងបន្ទប់សវនាការដែរថា គាត់ពិតជាបានឲ្យលុយទៅលោក ហុង គឹមអេង ខ្ចី ៥ ពាន់ដុល្លារពិតមែនតែគាត់មិនដឹងថា លោក ហុង គឹមអេង ខ្ចីលុយយកទៅធ្វើអ្វីទេ។
វន សាវ៉ាន់ ប្រាប់ចៅក្រមថា៖ «ខ្ញុំទាក់ទងលោក ហុង គឹមអេងដើម្បីធ្វើបដិវត្តន៍ផ្តួលរំលំរដ្ឋាភិបាល តែខ្ញុំគ្មានតួនាទីអីក្នុងក្រុមនោះទេ»។
ជនជាប់ចោទម្នាក់ទៀតឈ្មោះ រស់ សាម៉ុន បានថ្លែងទៅកាន់អង្គជំនុំជម្រះថា៖ «ខ្ញុំស្គាល់ឈ្មោះ ហុង គឹមអេង តាមរយៈបុរសឈ្មោះ អាចារ្យឯក នៅប្រទេសថៃ ហើយបុរសនោះប្រាប់ខ្ញុំថា ឈ្មោះ ហុង គឹមអេង ដែលរស់នៅខេត្តប៉ៃលិនជាអ្នករៀបចំអាវុធបាន ១០០ ដើម និងប្រមូលមនុស្សបាន ១ ពាន់នាក់ហើយ»។
ចំណែកឯឈ្មោះ សំ តាំង បានប្រាប់ចៅក្រមពីម្សិលមិញដែរថា គាត់បានស្គាល់អតីតសង្ឃឈ្មោះ វន សាវ៉ាន់ ជាយូរមកហើយ ហើយបានណែនាំឲ្យលោក ហុង គឹមអេង ស្គាល់ព្រះសង្ឃនោះក្នុងការធ្វើបុណ្យទាន និងណែនាំឲ្យខ្ចីលុយប៉ុណ្ណោះ។ ប៉ុន្តែគាត់បានទៅជួបលោក អាចារ្យឯក នោះដែរនៅប្រទេសថៃ។
ដោយសារតែការសួរដេញដោលពីសំណាក់ចៅក្រមទៅជនជាប់ចោទមិនទាន់អស់គ្នានោះ ចៅក្រមបានលើកទៅបន្តសវនាការនៅខែមីនាខាងមុខទៀត។ ជនជាប់ចោទ ១៣ នាក់នេះត្រូវបាននគរបាលនៃនាយកដ្ឋានព្រហ្មទណ្ឌក្រសួងមហាផ្ទៃស្រាវជ្រាវចាប់ខ្លួនបានជាបន្តបន្ទាប់អំឡុងខែកញ្ញា ឆ្នាំ ២០១៨ នៅរាជធានីភ្នំពេញ ខេត្តកំពត, ពោធិ៍សាត់ និងខេត្តកំពង់ចាម និងឆែកឆេរឃើញកាំភ្លើងអាកាចំនួន ២៥ ដើមរួមសម្ភារមួយចំនួនទៀត។ ចៅក្រមសាលាដំបូងរាជធានីភ្នំពេញ ចោទប្រកាន់ជនទាំង ១៣ នាក់ ពីបទរៀបចំចាត់តាំងក្រុមជនប្រដាប់អាវុធ និងបទធ្វើសន្និធិអាវុធដោយគ្មានការអនុញ្ញាត តាមមាត្រា ៤៨៥ មាត្រា ៤៨៦ និងមាត្រា ៤៨៨ នៃក្រមព្រហ្មទណ្ឌ៕