ភ្នំពេញៈ សាលាដំបូងរាជធានីភ្នំពេញកាលពីម្សិលមិញបានចេញសេចក្ដីប្រកាសព័ត៌មានដោយបានឲ្យដឹងថា សាលាដំបូងបានសម្រេចកំណត់កាលបរិច្ឆេទជំនុំជម្រះលើជនជាប់ចោទលោក កឹម សុខា នៅថ្ងៃទី ១៥ ខែ មករា ឆ្នាំ ២០២០ នៅវេលាម៉ោង ០៨ និង ៣០ នាទីព្រឹក ដែលជាប់ចោទពីបទសន្និដ្ឋិភាពជាមួយបរទេសតាមមាត្រា ៤៤៣ នៃក្រមព្រហ្មទណ្ឌ។ សេចក្ដីប្រកាសព័ត៌មានបានឲ្យដឹងថា៖ «ក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញដែលទទួលបន្ទុកចាត់ការលើសំណុំរឿងព្រហ្មទណ្ឌលេខ ៤៧៧៧ ចុះថ្ងៃទី ០៣ ខែ ធ្នូ ឆ្នាំ ២០១៩ ដែលមានជនជាប់ចោទឈ្មោះ កឹម សុខា ភេទប្រុស សញ្ជាតិខ្មែរកើតថ្ងៃទី ២៧ ខែ មិថុនា ឆ្នាំ ១៩៥៣»។
សេចក្ដីសម្រេចសាលាដំបូងរាជធានីភ្នំពេញបានធ្វើឡើងបន្ទាប់ពីសភាស៊ើបសួរសាលាឧទ្ធរណ៍ភ្នំពេញបានបើកសវនាការលើបណ្ដឹងឧទ្ធរណ៍កាលពីម្សិលមិញដោយបានសម្រេចបន្តរក្សាទុកជនជាប់ចោទឲ្យស្ថិតក្រោមការត្រួតពិនិត្យតាមផ្លូវតុលាការ។
សវនាការសភាស៊ើបសួរសាលាឧទ្ធរណ៍ភ្នំពេញបានធ្វើឡើងដោយបិទទ្វារដែលមានរយៈពេល ២ ម៉ោង ដែលមានលោក ឃុន លាងម៉េង ជាប្រធានក្រុមប្រឹក្សាចៅក្រមជំនុំជម្រះលោក សួស សំអាត និងលោក យូ ប៊ុនណា ជាចៅក្រមប្រឹក្សាដោយមានការចូលរួមដោយក្រុមមេធាវីរបស់លោក កឹម សុខា គឺលោក ចាន់ ចេន អ្នកស្រី ម៉េងសុភារី លោក ផែន ហេង លោក ផាន់ច័ន្ទស័ក្តិ និងមេធាវីរបស់រាជរដ្ឋាភិបាល តំណាងដោយ លោក គី តិច ផងដែរ។
សភាស៊ើបសួរសាលាឧទ្ធរណ៍ភ្នំពេញក៏បានសម្រេចផងដែរលើបណ្ដឹងឧទ្ធរណ៍លើដីកាដំណោះស្រាយរបស់មេធាវីជនជាប់ចោទមិនអាចទទួលយកបានដោយយោងតាមមាត្រា ២៤៩ និងមាត្រា ២៦៧ និងមាត្រា ៤០៤ នៃក្រមនីតិវិធីព្រហ្មទណ្ឌដែលមិនអនុញ្ញាតឲ្យធ្វើបណ្ដឹងឧទ្ធរណ៍ និងដីកាដំណោះស្រាយបញ្ជូនជនជាប់ចោទទៅតុលាការជំនុំជម្រះបានឡើយ។
ទី២- បណ្ដឹងឧទ្ធរណ៍ពីការសម្រេចបន្តការដាក់ស្ថិតក្រោមការត្រួតពិនិត្យតាមផ្លូវតុលាការ សភាស៊ើបសួរបានបដិសេធចោលដោយមានហេតុផលពាក់ព័ន្ធនឹងបទល្មើសមានលក្ខណៈធ្ងន់ធ្ងរដល់សង្គមជាតិ និងជាពិសេសសម្រាប់ធានាវត្តមាននៃដំណើរការនីតិវិធីបន្ត។ ការសម្រេចបើកសវនាការរបស់សភាស៊ើបសួរសាលាឧទ្ធរណ៍ភ្នំពេញបានធ្វើឡើងក្រោយពីមេធាវីជនជាប់ចោទបានដាក់បណ្ដឹងជាលាយលក្ខណ៍អក្សរ ប្ដឹងឧទ្ធរណ៍ ២ ចំណុចក្នុងនោះមានទាំងដីកាដំណោះស្រាយ និងការសម្រេចបន្តការដាក់ឲ្យស្ថិតក្រោមការត្រួតពិនិត្យតាមផ្លូវតុលាការ។
លោក ផែន ហេង មេធាវី ១ រូបក្នុងចំណោមមេធាវី ៤ រូបដែលការពារក្តីឲ្យលោក កឹម សុខា បានថ្លែងប្រាប់កាសែតភ្នំពេញប៉ុស្តិ៍ថា ក្រុមមេធាវីគ្មានជម្រើសមានតែធ្វើតាមដំណើរការនីតិវិធីរបស់តុលាការ។
លោកមេធាវីថ្លែងថា៖ «ប្រសិនបើតុលាការនៅតែបន្តនីតិវិធី យើងមានតែដើរទៅតាមនីតិវិធីហ្នឹង។ សម្រាប់មេធាវីយើងនៅតែកត់សម្គាល់ឃើញថារឿងហ្នឹង ការចោទនេះមិនមានភ័ស្ដុតាងគ្រប់គ្រាន់ទេដូច្នេះហើយយើងសង្ឃឹមថាចៅក្រមនឹងទម្លាក់ការចោទប្រកាន់។ អាជ្ញាធរយកតែឃ្លីបវីដេអូយកមកសំអាងដែលនាំឲ្យមានការស៊ើបអង្កេតតែភ័ស្ដុតាងរឹងមាំសម្រាប់ការគាំទ្រវីដេអូឃ្លីបនោះវាមិនមាន។ មែនទែនសាក្សីដែលចៅក្រមបានហៅនាពេលកន្លងមកគឺមិនបានឆ្លើយដាក់បន្ទុកទៅលើឯកឧត្តម កឹម សុខា នោះទេ»។
លោក ចាន់ ចេន មេធាវី ១ រូបក្នុងចំណោមមេធាវី ៤ រូបដែលការពារក្តីឲ្យលោក កឹម សុខា បានថ្លែងប្រាប់អ្នកសារព័ត៌មានបន្ទាប់ពីសវនាការថាក្រុមមេធាវីមានការសោកស្តាយជាខ្លាំងចំពោះការសម្រេចរបស់ប្រធានក្រុមប្រឹក្សាចៅក្រមជំនុំជម្រះដែលបានបដិសេធបណ្តឹងរបស់ពួកគេដោយអះអាងថា វាជារឿងអយុត្តិធម៌។
លោកបានថ្លែងថា៖ «យើងមានការសោកស្តាយជាខ្លាំងដែលសភាស៊ើបសួរឧទ្ធរណ៍មិនបានផ្តល់ភាពយុត្តិធម៌ឲ្យកូនក្តីខ្ញុំបាទក៏ដូចជាតាមសំណូមពរប្តឹងរបស់មេធាវី»។
លោកបានបន្តថា៖ «ក្រុមមេធាវីនឹងបន្តតស៊ូលើសមរភូមិផ្នែកច្បាប់ ហើយលោកសង្ឃឹមថានឹងមានការជជែកគ្នារវាងអ្នកនយោបាយដើម្បីដោះស្រាយ ករណីលោក កឹម សុខា ដើម្បីការផ្សះផ្សាជាតិ និងផលប្រយោជន៍ប្រជាពលរដ្ឋ និងប្រទេសជាតិ និងបង្រួបបង្រួមអ្នកនយោបាយ»។
កាលពីថ្ងៃទី ១០ ខែ វិច្ឆិកា ឆ្នាំ ២០១៩ សាលាដំបូងរាជធានីភ្នំពេញបានសម្រេចដាក់លោក កឹម សុខា ឲ្យស្ថិតក្រោមការត្រួតពិនិត្យតាមផ្លូវតុលាការដដែល ប៉ុន្តែទទួលបានការបន្ធូរបន្ថយលក្ខខណ្ឌត្រួតពិនិត្យតាមផ្លូវការ។ ការទទួលបានការបន្ធូរបន្ថយកាតព្វកិច្ចនៅពេលនេះដោយសារជនត្រូវចោទលោក កឹម សុខា នាពេលកន្លងមកបានគោរពត្រឹមត្រូវតាមកាតព្វកិច្ចនៃការដាក់ឲ្យស្ថិតក្រោមការត្រួតពិនិត្យតាមផ្លូវតុលាការ ព្រមទាំងមានកិច្ចសហការល្អក្នុងដំណើរការនីតិវិធីតុលាការ ជាពិសេសបញ្ហាសុខភាពរបស់ជនត្រូវចោទដែលចាំបាច់ត្រូវពិនិត្យ និងព្យាបាល។ លោក កឹម សុខា ត្រូវបានតុលាការបញ្ជូនទៅឃុំក្នុងពន្ធនាគារជាង ១ ឆ្នាំនៅខេត្តត្បូងឃ្មុំ៕
វីដេអូ៖