កំពង់ធំៈ សាលាដំបូងខេត្តកំពង់ធំបានសម្រេចចោទប្រកាន់លោកស្រី ម៉ែន សុភ័ណ្ឌ ពីបទចេញសែកស្អុយ និងដោះលែងឲ្យនៅក្រៅឃុំបន្ទាប់ពីបានដាក់ប្រាក់តម្កល់ ៥ ម៉ឺនដុល្លារក្រោយពីបានធ្វើការសាកសួរអស់រយៈពេលពេញមួយថ្ងៃកាលពីថ្ងៃទី ២៧ ខែកញ្ញា ឆ្នាំ ២០១៥ ទាក់ទងនឹងករណីចេញសែកស្អុយ។
លោក សាយ ណារ៉ា ព្រះរាជអាជ្ញាអមសាលាដំបូងខេត្តកំពង់ធំថ្លែងឲ្យដឹងថាតុលាការបានសម្រេចចោទប្រកាន់លោកស្រី ម៉ែន សុភ័ណ្ឌ ពីបទផ្តល់សិទ្ធិអំណាចឲ្យធ្វើការផ្ទេរប្រាក់ចេញពីគណនីរបស់ខ្លួនដោយមានបំណងឲ្យមូលប្បទានបត្រនោះមិនត្រូវបានទូទាត់សងដែលពាក្យសាមញ្ញថា «ចេញសែកស្អុយ»។ ប៉ុន្តែ តុលាការមិនឃុំខ្លួនទេដោយបង្គាប់ឲ្យដាក់ប្រាក់តម្កល់ ៥ ម៉ឺនដុល្លារដូចដែលគាត់បានចេញនៅក្នុងសែកអត់លុយរបស់គាត់។
លោកថា៖ «គាត់ត្រូវបង្ហាញខ្លួនតាមការបង្គាប់របស់តុលាការគ្រប់ពេលបើគាត់មិនបង្ហាញខ្លួននឹងត្រូវចាប់ខ្លួនវិញ»។
លោកបានថ្លែងឲ្យដឹងថាបើទោះបីជាគាត់ត្រូវបានឲ្យនៅក្រៅឃុំប៉ុន្តែតុលាការបានបង្គាប់ឲ្យគាត់បង្ហាញខ្លួនមួយខែម្តងនៅប៉ុស្តិ៍ប៉ូលិស។ ហាមមិនឲ្យដូរអាសយដ្ឋានហាមមិនឲ្យចាកចេញពីប្រទេសកម្ពុជាចូលបង្ហាញខ្លួនតាមការបង្គាប់របស់តុលាការគ្រប់ពេល។
លោក កែ ខាន់ណារ៉ា ស្នងការរងនគរបាលខេត្តកំពង់ធំបានឲ្យដឹងថាអ្នកស្រី ម៉ែន សុភ័ណ្ឌ ត្រូវបានឃាត់ខ្លួនកាលពីថ្ងៃទី ២៦ ខែកញ្ញា ឆ្នាំ ២០១៥ នៅឯទីក្រុងភ្នំពេញហើយបញ្ជូនមកខេត្តកំពង់ធំកាលពីវេលាម៉ោងប្រមាណ ៦ ល្ងាចថ្ងៃដដែល។
លោកបានថ្លែងថា៖ «គាត់ត្រូវបានឃាត់ខ្លួនទាក់ទងទៅនឹងចេញសែកស្អុយឲ្យទៅពលរដ្ឋដែលគាត់ទិញដីនៅពេលដែលពលរដ្ឋទារលុយពីគាត់ខ្លាំង»។
លោក សូ ឈិន មេឃុំស្រឡៅបានថ្លែងឲ្យដឹងថាអ្នកស្រី ម៉ែន សុភ័ណ្ឌ បានដើរទិញដីប្រជាពលរដ្ឋនៅក្នុងឃុំស្រឡៅរបស់លោក និងនៅឃុំផ្សេងៗទៀតដូចជាឃុំទ្រៀល ឃុំបារាយណ៍ ស្រុកបារាយណ៍ដែលគាត់បានទិញ ២ ទៅ ៣ ឆ្នាំមកហើយ។
លោកបានថ្លែងថា៖ «ខ្ញុំគ្រាន់តែចុះហត្ថលេខានៅពេលដែលគាត់ទិញលក់ដីប៉ុន្តែខ្ញុំមិនបានដឹងថាគេកក់ប៉ុន្មាននៅខ្វះប៉ុន្មាន និងលក់ក្នុងតម្លៃប៉ុន្មាននោះទេ»។
លោកបានថ្លែងឲ្យដឹងទៀតថាអ្នកស្រីបានឲ្យតំណាងប្រជាពលរដ្ឋប្រមូលទិញដីស្រែនៅពេលដែលមានប្រជាពលរដ្ឋជាង ២០០ គ្រួសារបានព្រមព្រៀងលក់ដីហើយលោកស្រី ម៉ែន សោភ័ណ បានបង្គាប់ឲ្យប្រជាពលរដ្ឋផ្តិតមេដៃដែលបានលក់ដីឲ្យហើយលោកស្រីបានកក់ប្រាក់ជូនប្រជាពលរដ្ឋ។
លោកបានថ្លែងថា៖ «គាត់បានចុះកិច្ចសន្យាជាមួយតំណាងប្រជាពលរដ្ឋថានឹងសងលុយឲ្យគ្រប់ចំនួននៅពេលដែលលោកស្រីបានទទួលប្លង់ដីពីប្រជាពលរដ្ឋ។ ក្រោយមកលោកស្រីបានទទួលប្លង់ដីហើយក៏មិនព្រមសងលុយមកឲ្យប្រជាពលរដ្ឋដោយសុំពន្យារពេលជាច្រើនដងហើយប្រជាពលរដ្ឋបានឡើងទៅប្តឹងនៅសាលាខេត្តកំពង់ធំដែរ»។
លោកស្រី ម៉ែន សោភ័ណ្ឌ ពុំអាចទាក់ទងដើម្បីធ្វើការអត្ថាធិប្បាយបានទេ។
គួរបញ្ជាក់ផងដែរថាកាលពីថ្ងៃទី ៨ ខែកញ្ញាកន្លងមកសាលាដំបូងរាជធានីបានបើកសវនាការកំបាំងមុខមន្ត្រីនគរបាលខេត្តកំពង់ធំម្នាក់ក្រោមការចោទប្រកាន់ពីបទ «ឆបោកប្រាក់» ចំនួន ១៤ ម៉ឺនដុល្លារពីអ្នកស្រី ម៉ែន សោភ័ណ្ឌ ជាឈ្មួញរកស៊ីដីជាប់ពាក់ព័ន្ធនឹងករណីយកប្រាក់ពីស្រ្តីរូបនេះទៅរត់ការធ្វើលិខិតផ្ទេរអចលនវត្ថុកាន់កាប់ដីធ្លី (ប្លង់ទន់) ឲ្យទៅជាប័ណ្ណកាន់កាប់អចលនវត្ថុ (ប្លង់រឹង) នូវដីចំនួន ១ ម៉ឺនហិកតាដែលមានទីតាំងស្ថិតនៅក្នុងឃុំចុងដូង ឃុំបឹង ឃុំបារាយណ៍ ឃុំស្រឡៅ ឃុំពង្រ ឃុំសូយោង និង ឃុំទ្រៀល ស្រុកបារាយណ៍ ខេត្តកំពង់ធំកាលពីឆ្នាំ ២០១៤ ៕
