The Phnom Penh Post Search

Search form

Logo of Phnom Penh Post newspaper Phnom Penh Post - សាលា​ដំបូង​សាកសួរ​សកម្មជន​ដីធ្លី​ពី​រឿង​ហិង្សា

សាលា​ដំបូង​សាកសួរ​សកម្មជន​ដីធ្លី​ពី​រឿង​ហិង្សា

Content image - Phnom Penh Post
លោកយាយ ង៉ែត ឃុន និង​សកម្មជន​ដីធ្លី​នៅ​សាលា​ដំបូង​ពី​ម្សិលមិញ។ ហុង មិនា

សាលា​ដំបូង​សាកសួរ​សកម្មជន​ដីធ្លី​ពី​រឿង​ហិង្សា

ភ្នំពេញៈ សាលា​ដំបូង​រាជធានី​ភ្នំពេញ​បាន​ចាប់ផ្ដើម​សាកសួរ​ស្ត្រី​សកម្មជន​ដីធ្លី​ចំនួន ៣ រូប​បន្ទាប់​ពី​ចេញ​ដីកា​ឱ្យ​ចូល​បំភ្លឺ​កាលពី​ចុង​ខែ​មុន​ពាក់ព័ន្ធ​នឹង​ដំណើរ​រឿង​ហិង្សា​ដោយ​ចេតនា​មាន​ស្ថាន​ទម្ងន់​ទោស​ដែល​ប្រព្រឹត្ត​នៅ​ចំណុច​ខាង​កើត​វិមាន​ឯករាជ្យ​កាលពី​ឆ្នាំ ២០១៣ ខណៈ​ពេល​ពួកគេ​បាន​ទៅ​ស្វែងរក​កិច្ចអន្តរាគមន៍​ពី​លោក​នាយក​រដ្ឋមន្ត្រី ហ៊ុន សែន និង​ក្រសួង​យុត្តិធម៌​ឱ្យ​ដោះលែង​អ្នកស្រី យ៉ោម បុប្ផា។

ក្នុង​ដីកា​កោះ​ចុះ​ហត្ថលេខា​ដោយ​ចៅក្រម​ស៊ើបសួរ​សាលា​ដំបូង​រាជធានី​ភ្នំពេញ​លោក នូ វាសនា ចុះ​ថ្ងៃ​ទី ២៥ វិច្ឆិកា បាន​អញ្ជើញ​អ្នកស្រី គង់ ចន្ថា អាយុ ៤៥ ឆ្នាំ​ចូល​បំភ្លឺ​វេលា​ម៉ោង ៩ ព្រឹក និង​អ្នកស្រី ប៊ូ ឆវី ចូល​បំភ្លឺ​នៅ​វេលា​ម៉ោង​ ៣ រសៀល​កាលពី​ម្សិលមិញ​ខណៈ​លោកយាយ ង៉ែត ឃុន បង្គាប់​ឱ្យ​ចូល​បំភ្លឺ​នៅ​ថ្ងៃ​នេះ​វេលា​ម៉ោង ៣ ព្រឹក។ នេះ​បើ​យោង​តាម​ដីកា​កោះ។

ក្នុង​ដីកា​អញ្ជើញ​ឱ្យ​ចូល​បំភ្លឺ «ពី​ដំណើរ​រឿង​ហិង្សា​ដោយ​ចេតនា​មាន​ស្ថាន​ទម្ងន់​ទោស​នៅ​សង្កាត់​ទន្លេ​បាសាក់​ខណ្ឌ​ចំការមន​កាល​ពី​ថ្ងៃ​ទី ១៣ ខែ មីនា ឆ្នាំ ២០១៣»។

ក្រោយ​ពី​បញ្ចប់​ការ​សាកសួរ​រយៈពេល ១ ម៉ោង និង ៣០ នាទី​អ្នកស្រី គង់ ចន្ថា បាន​ដាក់​ចម្ងល់​ថា​ហេតុអ្វី​បាន​ជា​ចៅក្រម​ហៅ​គាត់​ក្នុង​នាម​សាក្សី​ឱ្យ​អ្នកស្រី​ ទេព វន្នី ទៅ​វិញ។ អ្នកស្រី​ថា៖ «នៅ​ក្នុង​ដីកា​គេ​ដាក់​ថា​ជន​ជាប់ចោទ​នៅ​ឆ្នាំ ២០១៣ តែ​ពេល​មក​ដល់​តុលាការ​បែរ​ជា​គេ​ថា​អញ្ជើញ​ខ្ញុំ​ធ្វើ​ជា​សាក្សី​ដ៏សំខាន់​ហើយ​សួរ​ថា​ តើ​អ្នកស្រី ទេព វន្នី មាន​ប្រើ​អំពើ​ហិង្សា ឬ​បញ្ជា​អ្នក​ផ្សេង​ឱ្យ​ប្រព្រឹត្ត​នៅ​មុខ​ផ្ទះ​សម្តេច​អត់»។ បើ​តាម​អ្នកស្រី គង់ ចន្ថា បាន​ឆ្លើយ​ទៅ​វិញ​ក្នុង​នាម​ជា​សាក្សី​ថា​អ្នកស្រី ទេព វន្នី គឺជា​ស្រី្ត​ទន់​ខ្សោយ​មិន​អាច​បង្ក​ហិង្សា​លើ​សមត្ថកិច្ច​ដូច​ការ​ចោទប្រកាន់​នោះ​ទេ។ អ្នកស្រី​បញ្ជាក់​ថា៖ «ព្រោះ​ ទេព វន្នី អត់​ដែល​ប្រើ​អំពើ​ហិង្សា​លើ​អ្នកដទៃ​ទេ​មាន​តែ​សមត្ថកិច្ច​ខណ្ឌ​ដូនពេញ​ទេ​ព្រោះ​ពេល​នោះ​ពួកខ្ញុំ​បាន​ទៅ​ក្រសួង​យុត្តិធម៌​ដើម្បី​ឱ្យ​ដោះលែង​អ្នកស្រី យ៉ោម បុប្ផា ហើយ​ពួក​ខ្ញុំ​ក៏​ឆៀង​មក​ផ្ទះ​សម្តេច​ដើម្បី​ឱ្យ​ជួយ​អន្តរាគមន៍​ប៉ុន្តែ​គេ​យក​ករណី​នេះ​ធ្វើការ​ចោទប្រកាន់​ពួកយើង​ប្រើ​កម្លាំង​ទៅ​លើ​សមត្ថកិច្ច»។ យ៉ាង​ណា​ក៏​អ្នកស្រី​ចាត់​ទុក​ការ​កោះ​ហៅ​ពួកគាត់​ជា​រឿង​អយុត្តិធម៌​ និង​ជា​តុលាការ​ដែល​គេ​បញ្ជា​ពី​ថ្នាក់​លើ។

អ្នកស្រី ប៊ូ ឆវី ដែល​បាន​ចូល​បំភ្លឺ​នៅ​តុលាការ​ជាង​មួយ​ម៉ោង​បាន​ថ្លែង​ថា​រូបគាត់​ត្រូវ​បាន​ចៅក្រម​កោះ​ហៅ​ទៅ​សាកសួរ​ក្នុង​នាម​ជា​សាក្សី​ដូច​គ្នា​ផ្ទុយ​ពី​ក្នុង​ដីកា​កោះ។ តែ​អ្នកស្រី​សង្កេត​ឃើញ​ថា​សំណួរ​ចៅ​ក្រម​ហាក់បី​ដូច​ចង់​ដាក់​បន្ទុក​លើ​អ្នកស្រី ទេព វន្នី។ អ្នកស្រី​បញ្ជាក់​ថា៖ «គេ​ថា​មាន​សំឡេង​អ្នកស្រី ទេព វន្នី បញ្ជា​ថា​ឱ្យ​ពួកខ្ញុំ​រើស​ដុំថ្ម​ដាក់​ក្នុង​កាបូប​ដើម្បី​គប់​ចូល​ទៅ​ក្រសួង​យុត្តិធម៌​ខ្ញុំ​សុំ​អះអាង​ថា​គឺ​អត់​មាន​ទេ​ពួក​ខ្ញុំ​ទាំងអស់​គ្នា​តវ៉ា​ដោយ​សន្តិវិធី​ហើយ​ពួក​ខ្ញុំ​មាន​តែ​សុំ​អង្វរ​យំ​សំពះ​សមត្ថកិច្ច​កុំ​ឱ្យ​ប្រើ​ហិង្សា​លើ​យើង​វិញ»។ អ្នកស្រី​សង្កត់​ធ្ងន់​ថា​តុលាការ​អាច​កាត់​ទោស​គាត់​តាម​ចិត្ត​ប្រសិន​បើ​តុលាការ​មាន​ភ័ស្តុតាង​ពួកគាត់​កាន់​ដំបង ឬ​ប្រើ​ហិង្សា​ពិត​មែន​ខណៈ​អ្នកស្រី​ស្នើ​តុលាការ​ទម្លាក់​ការ​ចោទប្រកាន់​លើ​ពួកគាត់ និង​ផ្តល់​យុត្តិធម៌​ដោះ​លែង​អ្នកស្រី ទេព វន្នី។ អ្នកស្រី​ក៏​ស្នើ​ឱ្យ​តុលាការ​កោះ​ហៅ​សមត្ថកិច្ច​ដែល​ប្រើ​ហិង្សា​មក​សាកសួរ​ដូច​ពួកគាត់​ដែរ​ខណៈ​គ្រា​នោះ​ស្រ្តី​ជាច្រើន​បាន​រងគ្រោះ។ អ្នកស្រី​ថា៖ «ទោះបី​ជា​តុលាការ​គ្មាន​ភ័ស្តុតាង​គ្រប់គ្រាន់​តែ​ចាប់​ដាក់​ពន្ធនាគារ​ហើយ​ចំពោះ​សមត្ថកិច្ច​ដែល​ប្រើ​ហិង្សា​គេ​មិន​ចាត់​វិធានការ​ទេ​ទោះ​យើង​មាន​វីដេអូ និង​សាក្សី​គ្រប់​បែប​យ៉ាង​ក៏ដោយ»។

លោក យាយ ង៉ែត ឃុន បាន​បដិសេធ​ការ​ចោទប្រកាន់​របស់​តុលាការ​ដែល​ថា​ខ្លួន​បាន​ប្រើ​ហិង្សា​លើ​សមត្ថកិច្ច។ លោក​យាយ​ថា៖ «ពួកខ្ញុំ​មិន​ទាន់​ទៅ​ដល់​ផ្ទះ​សម្តេច​ផង​មាន​កម្លាំង​សមត្ថកិច្ច​បាន​ដាក់​ពង្រាយ​ហើយ​ប្រើ​អំពើ​ហិង្សា​មក​វាយ​ខ្ញុំ ញាត់​ដាក់​ឡាន​ហើយ​ខ្ញុំ​សន្លប់​ទៀត​ផង»។ យ៉ាង​ណា​ក៏ដោយ​លោកយាយ​បដិសេធ​ចូល​បំភ្លឺ​នៅ​ម៉ោង ៣ ទៀបភ្លឺ។ លោកយាយ​ថា៖ «គាត់​ចៅក្រម​កោះ​ហៅ​ខ្ញុំ​ឱ្យ​ចូល​ម៉ោង ៣ ព្រឹក​គឺ​ខ្ញុំ​សូម​បដិសេធ​បើ​សម័យ​មុន​ជំនាន់​ ប៉ុលពត គេ​ហៅ​ទៅ​ម៉ោង ៣​ទៀប​ភ្លឺ​គឺ​គេ​យក​ទៅ​សម្លាប់​ចោល​តែ​ដល់​សម័យ​ឥឡូវ​គេ​កោះ​ហៅ​ខ្ញុំ​ឱ្យ​ចូល​ម៉ោង ៣ ខ្ញុំ​មិន​អាច​ទុក​ចិត្ត​ទេ​ខ្ញុំ​អត់​ចូល​ទេ​ទាល់​តែ​ម៉ោង ៣ ពេល​រសៀល​បាន​ខ្ញុំ​ចូល»។

ករណី​នេះ​ភ្នំពេញ​ប៉ុស្តិ៍​បាន​ព្យាយាម​ទាក់ទង​អ្នក​នាំ​ពាក្យ​សាលា​ដំបូង​រាជធានី​ភ្នំពេញ​លោក លី សុផាណា ដើម្បី​បញ្ជាក់​ព័ត៌មាន​លម្អិត​ដែរ​តែ​លោក​មិន​ទាន់​ឆ្លើយតប​ទេ។

នៅ​ពេល​សាកសួរ​មាន​ស្រី្ត​សកម្មជន​ដីធ្លី​ប្រមាណ​ជា ១០ នាក់​បាន​ឈរ​ស្រែក​នៅ​មុខ​តុលាការ​ថា​ជា​រឿង​អយុត្តិធម៌ និង​ទាមទារ​ឱ្យ​ដោះ​លែង​តំណាង​របស់​ខ្លួន​អ្នកស្រី ទេព វន្នី ដែល​កំពុង​ជាប់​ឃុំ​ពាក់ព័ន្ធ​នឹង​ករណី​នេះ៕

អត្ថបទគួរចាប់អារម្មណ៍