ភ្នំពេញៈ រដ្ឋបាលរាជធានីភ្នំពេញ កាលពីម្សិលមិញបានរៀបចំវេទិកាពិគ្រោះយោបល់ស្ដីពីភាពជាដៃគូជាមួយអង្គការសង្គមស៊ីវិល (NGOs) ដែលជាជំនួបលើកទី១ នៅដើមឆ្នាំនេះ ដោយមានអ្នកចូលរួមប្រមាណ ៧០០ នាក់មកពីគ្រប់ស្ថាប័នក្នុងរាជធានីភ្នំពេញនិង NGO ប្រមាណ ៥០ អង្គការ/សមាគម ស្របពេលសង្គមស៊ីវិលដែលធ្វើការសកម្មលើបញ្ហាសិទ្ធិមនុស្ស ការបោះឆ្នោត និងការតស៊ូមតិមួយចំនួន មិនមានវត្តមាន។
អភិបាលរាជធានីភ្នំពេញ លោក ឃួង ស្រេង អះអាងថា វេទិកាពិគ្រោះយោបល់ស្ដីពីភាពជាដៃគូនេះគឺជាយន្តការដោះស្រាយបញ្ហាមិនស្របគ្នារវាងអាជ្ញាធរ និងសង្គមស៊ីវិល ខណៈដែលសង្គមស៊ីវិលក៏បានរំពឹងដែរថាបញ្ហាដែលពួកគេបានលើកឡើងនឹងត្រូវបានដោះស្រាយប្រកបដោយប្រសិទ្ធភាព។
លោក ឃួង ស្រេង បានថ្លែងថា អង្គការសង្គមស៊ីវិល បានចូលរួមចំណែកជាអាទិភាពក្នុងការអភិវឌ្ឍស្ទើរគ្រប់វិស័យជាមួយរដ្ឋាភិបាល ដូច្នេះអាជ្ញាធរគ្មានចេតនាណាមួយក្នុងការរឹតត្បិត គាបសង្កាត់ សិទ្ធិសេរីភាព ការបញ្ចេញមតិពួកគេឡើយ។ លើសពីនេះ លោកបានណែនាំឲ្យអាជ្ញាធរគ្រប់ជាន់ថ្នាក់ទាំង ១២ ខណ្ឌ ត្រូវតែជួយសម្របសម្រួលនិងបង្កលក្ខណៈងាយស្រួលដល់សង្គមស៊ីវិលក្នុងការធ្វើសកម្មភាពដោយសេរី និងគ្មានការគំរាមកំហែងទៀតផង។
លោកបញ្ជាក់ថា៖ «អង្គការ ៧២៩ អង្គភាព ក្នុងរាជធានីភ្នំពេញ បាននិងកំពុងប្រតិបត្តិការសកម្មភាពរបស់ខ្លួនដោយគ្មានការហាមឃាត់ឬការរារាំងណាមួយឡើយ។ ជាមួយគ្នានេះ តាមរយៈតួលេខនេះបានបង្ហាញថា ចំនួនសមាគម អង្គការមិនមែនរដ្ឋាភិបាល គ្មានការថយចុះដូចការព្រួយបារម្ភរបស់បុគ្គលមួយចំនួនដែលតែងតែចោទប្រកាន់មករដ្ឋាភិបាលកម្ពុជា និងអាជ្ញាធរមូលដ្ឋាន»។
យ៉ាងណា លោក ឃួង ស្រេង ទទួលស្គាល់ថា ការដែលកើតមានបញ្ហាកន្លងមក ព្រោះតែមិនមានការយល់គ្នា ដូច្នេះ វេទិកានេះនឹងចូលរួមដោះស្រាយឲ្យអាជ្ញាធរគ្រប់ជាន់ថ្នាក់ កាន់តែយល់គ្នាថែមទៀតជាមួយក្រុមសង្គមស៊ីវិល ក្នុងការចូលរួមអភិវឌ្ឍប្រទេសប្រកបដោយភាពស្មោះត្រង់។
តាមការជជែកដេញដោលពេញមួយព្រឹក មានមន្ត្រីសង្គមស៊ីវិលចំនួន ៨ រូប បានលើកឡើងពីបញ្ហាប្រឈម និងកង្វល់របស់ពួកគេរៀងៗខ្លួន ដែលភាគច្រើន គឺបញ្ហាទាក់ទងនឹងភាពស្មុគស្មាញផ្នែករដ្ឋបាល បញ្ហារឹតត្បិតសិទ្ធិសេរីភាព និងបញ្ហានានាទាក់ទងនឹងតថភាពសង្គមជាដើមហើយក្នុងចំណោមការលើកឡើងទាំងនេះក៏មានការឆ្លើយតបភ្លាមៗនៅក្នុងអង្គប្រជុំដោយបញ្ហាខ្លះ ត្រូវបានដោះស្រាយ និងបញ្ហាខ្លះទៀត ត្រូវបានអាជ្ញាធរសន្យាថានឹងពិនិត្យដោះស្រាយនៅពេលក្រោយ។
លោក ដេត ប៊ុនថុន អគ្គលេខាធិការអង្គការសមាគមយុវជនគ្រិស្ទានកម្ពុជា បានថ្លែងថា បញ្ហាដែលលោក និងសង្គមស៊ីវិលដទៃទៀតលើកឡើងគឺសុទ្ធតែជាបញ្ហាប្រឈម ដែលចាំបាច់ត្រូវការការដោះស្រាយពី
អាជ្ញាធរ។លោកសង្ឃឹមថា អ្វីៗដែលបានលើកឡើងហើយបញ្ហាទាំងនោះនឹងត្រូវបានដោះស្រាយដោយមិនត្រូវគេចវេះ ឬអូសបន្លាយទៀតទេ។
លោកបានបញ្ជាក់ថា៖ «អ្វីដែលយើងបានស្នើសុំ ហើយអ្វីដែលយើងបានដាក់ជូនទៅ នឹងត្រូវបានដោះស្រាយ ព្រោះតែបញ្ហាផ្នែករដ្ឋបាលជាមួយថ្នាក់ក្រោមជាតិ ដូចជាសង្កាត់អីហ្នឹង គឺមានភាពពិបាកមែនទែន ដោយគ្រាន់តែចងក្រងក្រុមមនុស្សចាស់នៅក្នុងសហគមន៍ក៏មានការបដិសេធ។ ដូច្នេះនៅពេលលើកឡើងហើយ អាជ្ញាធរថ្នាក់ក្រោមនឹងចូលរួមសហការ»។
លោក ស៊ឹង សែនករុណា អ្នកនាំពាក្យសមាគមសិទ្ធិមនុស្សអាដហុក ដែលអវត្តមានក្នុងវេទិកាបានថ្លែងថា វាជារឿងល្អមួយដែលកន្លងមកមិនសូវឃើញមានធ្វើវេទិកាបែបនេះ។ ប៉ុន្តែលោកសោកស្តាយ ដែលអង្គការលោកក៏ដូចជាអង្គការធ្វើលើការតស៊ូមតិនិងសិទ្ធិមនុស្សខ្លះទៀតមិនត្រូវបានអញ្ជើញឲ្យចូលរួម។
លោកបញ្ជាក់ថា៖ «ការកត់សម្គាល់ចំពោះការរៀបចំនេះវិញ មិនទាន់បានល្អប្រសើរនោះទេ ជាពិសេសមិនបានអញ្ជើញអង្គការដែលធ្វើលើវិស័យសិទ្ធិមនុស្ស វិស័យឃ្លាំមើលការបោះឆ្នោត និងតស៊ូមតិផ្សេងៗ ដោយសារក្រុមអង្គការខាងលើនេះ សកម្មហ៊ានរិះគន់ទៅលើរដ្ឋាភិបាល។ ការរៀបចំរបៀបនេះ ខ្ញុំមើលឃើញមិនទាន់បានធ្វើឡើងដោយកើតចេញពីឆន្ទៈ និងមានភាពស្មោះត្រង់ ពីសំណាក់ខាងសាលាក្រុងនៅឡើយទេ»។
យ៉ាងណាក្ដី អភិបាលរងសាលារាជធានីភ្នំពេញ លោក កើត ឆែ បានបដិសេធ និងអះអាងថា ការរៀបចំវេទិកានេះគ្មានបែងចែកបក្ខពួកនិន្នាការនយោបាយ ឬរើសអើងឡើយឲ្យតែសង្គមស៊ីវិលអាចចុះឈ្មោះចូលរួមបាន។
លោកបន្តថា ការមិនបានចូលរួមរបស់អង្គការទាំងនេះ ព្រោះតែពួកគេមិនព្រមចុះឈ្មោះដោយខ្លួនឯង តែយ៉ាងណាក្នុងឱកាសក្រោយៗ សាលារាជធានីភ្នំពេញនឹងទុកពេលវេលានៃការចុះឈ្មោះឲ្យបានយូរជាងនេះដើម្បីសម្រួលឲ្យក្រុមអង្គការមិនមែនរដ្ឋាភិបាលទាំងនោះបានចូលរួមឲ្យបានគ្រប់ៗគ្នា ចៀសវាងចោទប្រកាន់មកលើអាជ្ញាធរថា រើសអើង៕