.jpg)
អាជ្ញាធររាជធានីភ្នំពេញចុះផ្សព្វផ្សាយពីវិធានការ ដើម្បីទប់ស្កាត់ជំងឺកូវីដ ១៩ កាលពីខែមីនា ឆ្នាំ ២០២០។ ហុង មិនា
ភ្នំពេញ៖ សាលារាជធានីភ្នំពេញបានចេញសេចក្ដីណែនាំចំនួន ៧ ចំណុច ទៅដល់អាជ្ញាធរក្នុងខណ្ឌទាំង ១៤ ឱ្យចុះអប់រំប្រជាពលរដ្ឋឱ្យបន្តអនុវត្តតាមវិធានការនានារបស់ក្រសួងសុខាភិបាល ក្នុងការការពាររលកទីពីរ នៃជំងឺកូវីដ ១៩។
សេចក្ដីណែនាំរបស់សាលារាជធានីភ្នំពេញ ចុះថ្ងៃទី ២៥ ខែឧសភា គឺបានបញ្ជាឱ្យរដ្ឋបាលខណ្ឌទាំង ១៤ រួមទាំងមន្ទីរ និងអង្គភាពចំណុះ ត្រូវតែបន្តចាត់កម្លាំងចុះអប់រំ និងណែនាំពលរដ្ឋ ឱ្យកែប្រែឥរិយាបថនៃការរស់នៅប្រចាំថ្ងៃ ដូចជា សម្អាតដៃជាប្រចាំ ពាក់ម៉ាស់ និងក្រមា នៅពេលកណ្ដាស់ឬក្អក និងត្រូវអនុវត្តគន្លាតសង្គមជាចាំបាច់។
សាលារាជធានីភ្នំពេញក៏បានឱ្យអាជ្ញាធរ បន្តចុះហាមឃាត់ការជួបជុំ និងប្រមូលផ្ដុំនៅតាមមូលដ្ឋាន ដូចជាតាមកម្មវិធីជប់លៀង ឬតាមបែបសាសនា ហើយត្រូវបិទបណ្ដោះអាសន្ន ចំពោះភោជនីយដ្ឋាន អាហារដ្ឋាន និងកន្លែងលក់ដូរនានា ដែលមិនបានអនុវត្តតាមវិធានការបង្ការដូចជា ដាក់អាល់កុលលាងដៃនៅច្រកចេញចូល និងវាស់កម្ដៅភ្ញៀវជាដើម។
សេចក្ដីណែនាំបានសរសេរថា៖ «ត្រូវបន្តត្រួតពិនិត្យ និងតាមដានការអនុវត្តនូវវិធានការផ្អាកបណ្ដោះអាសន្ននូវទីតាំងអាជីវកម្មមួយចំនួន ដូចជា ក្លិបហាត់ប្រាណ រោងភាពយន្ត ក្លិបកម្សាន្ត ដូចជា រង្គសាល ខារ៉ាអូខេ ឌីស្កូតែក និងបៀរហ្គាឌិន អាជីវកម្មម៉ាស្សាសុខភាពនិងស្ប៉ា»។
ក្រៅពីនោះ សមត្ថកិច្ចគ្រប់ខណ្ឌ ត្រូវស្រង់ស្ថិតិពលរដ្ឋដែលទើបត្រឡប់ពីក្រៅប្រទេស ដើម្បីណែនាំឱ្យធ្វើចត្តាឡីស័ក និងតាមដានសុខភាពផ្ទាល់ខ្លួនរយៈពេល ១៤ ថ្ងៃ និងចុះពិនិត្យស្ថានភាពកន្លែងស្នាក់នៅរបស់ពលរដ្ឋដែលធ្វើចត្តាឡីស័ក នៅតាមផ្ទះជាដើម។
កម្ពុជាបានរាយការណ៍ពីការគ្មានករណីថ្មីនៃការឆ្លងជំងឺកូវីដ ១៩ នៅថ្ងៃទី ២៣ ទី ២៤ ទី ២៥ និងថ្ងៃទី ២៦ ខែឧសភា បន្ទាប់ពីមានរកឃើញករណីឆ្លងថ្មី ពីរនាក់នៅថ្ងៃទី ២១ និង ២២ ខែឧសភា ដែលម្នាក់ធ្វើដំណើរត្រឡប់ពីប្រទេសហ្វីលីពីន និងម្នាក់ទៀត ធ្វើដំណើរត្រឡប់ពីទីក្រុងញូវយ៉កសហរដ្ឋអាមេរិក។ ២ ករណីបន្ថែមនេះ បានធ្វើឱ្យចំនួនអ្នកឆ្លងនៅកម្ពុជាកើនឡើងដល់ ១២៤ នាក់ ក្នុងនោះព្យាបាលជាសះស្បើយ ១២២ នាក់។
ការរកឃើញករណីថ្មីនាំចូលទាំងពីរនេះ គឺក្រោយមួយថ្ងៃ បន្ទាប់ពីរដ្ឋាភិបាល បានប្រកាសដកចេញវិធានការហាមឃាត់អ្នកដំណើរមកពីសហរដ្ឋអាមេរិក បារាំង អីុតាលី អីុរ៉ង់ អេស្បា៉ញ និងអាល្លឺម៉ង់។
ថ្វីដ្បិតមានការដកវិធានការទាំងនេះក្ដី ប៉ុន្តែក្រសួងសុខាភិបាល បានអះអាងថា អ្នកដំណើរជនបរទេសដែលអនុញ្ញាតឱ្យចូលកម្ពុជា គឺត្រូវមានលិខិតបញ្ជាក់សុខភាពគ្មានជំងឺកូវីដ ១៩ ត្រូវមានឯកសារធានារ៉ាប់រងសុខភាពយ៉ាងតិច៥ម៉ឺនដុល្លារ ហើយត្រូវបញ្ជូនទៅមណ្ឌលរង់ចាំ ដើម្បីធ្វើតេស្ដរកជំងឺកូវីដ ១៩ និងរង់ចាំទទួលលទ្ធផលនៃការធ្វើតេស្ដពីមន្ទីរពិសោធន៍ប៉ាស្ទ័រ។
ក្រសួងបញ្ជាក់ទៀតថា ប្រសិនបើមានអ្នកដំណើរម្នាក់ឬច្រើន ត្រូវបានរកឃើញជំងឺកូវីដ ១៩ គឺអ្នករួមដំណើរទាំងអស់ត្រូវបញ្ជូនទៅធ្វើចត្តាឡីស័ក នៅទីតាំងដែលកំណត់ដោយគណៈកម្មការអន្តរក្រសួង ដើម្បីប្រយុទ្ធនឹងជំងឺ
កូវីដ១៩ ហើយប្រសិនអ្នកដំណើរទាំងអស់ ទទួលបានលទ្ធផលអវិជ្ជមាន ជំងឺកូវីដពីមន្ទីរពិសោធន៍ ត្រូវអនុញ្ញាតឱ្យធ្វើចត្តាឡីស័កនៅតាមផ្ទះ។
លោកស្រី យស់ សម្បត្តិ រដ្ឋលេខាធិការ ក្រសួងសុខាភិបាល បានបញ្ជាក់ប្រាប់សារព័ត៌មានក្នុងស្រុកថា ចាប់ពីថ្ងៃទី ២០ ខែឧសភា មានអ្នកដំណើរជិត១ពាន់នាក់ មានទាំងខ្មែរនិងជនបរទេស បានធ្វើដំណើរតាមជើងហោះហើរ ចូលមកព្រលានយន្តហោះកម្ពុជា ហើយអ្នកទាំងនោះ គឺត្រូវបានណែនាំឱ្យធ្វើចត្តាឡីស័ក។
លោកស្រីបន្តថា នៅក្នុងខែមិថុនាខាងមុខ នឹងមានពលរដ្ឋកម្ពុជាជាពិសេសក្រុមនិស្សិត នឹងអាចសម្រុកវិលត្រឡប់មកលេងនៅកម្ពុជា ដោយសារតែជាពេលវេលាវិស្សមកាល ហើយនឹងអាចធ្វើឱ្យក្រសួងសុខាភិបាលនិងសាលារាជធានីភ្នំពេញ រៀបចំទីតាំងសាលារៀនបន្ថែម ធ្វើជាមណ្ឌលរង់ចាំ នៅពេលត្រូវយកសំណាកទៅធ្វើតេស្ដនៅវិទ្យាស្ថានប៉ាស្ទ័រ៕
