The Phnom Penh Post Search

Search form




Logo of Phnom Penh Post newspaper Phnom Penh Post - សាលា​រាជធានី​ថា​មិន​បាន​ហាម​ការ​ហែ​ក្បួន​ក្នុង​ថ្ងៃ​បុណ្យ​ មាឃ​បូជា

សាលា​រាជធានី​ថា​មិន​បាន​ហាម​ការ​ហែ​ក្បួន​ក្នុង​ថ្ងៃ​បុណ្យ​ មាឃ​បូជា

ព្រះសង្ឃ​ និង​ពុទ្ធបរិស័ទ​ដង្ហែ​ក្បួន​បុណ្យ​មាឃ​បូជា​តាម​ផ្លូវ​មាត់​ទន្លេ​ក្នុង​រាជធានី​ពី​ម្សិលមិញ។
ព្រះសង្ឃ​ និង​ពុទ្ធបរិស័ទ​ដង្ហែ​ក្បួន​បុណ្យ​មាឃ​បូជា​តាម​ផ្លូវ​មាត់​ទន្លេ​ក្នុង​រាជធានី​ពី​ម្សិលមិញ។ ផា លីណា

សាលា​រាជធានី​ថា​មិន​បាន​ហាម​ការ​ហែ​ក្បួន​ក្នុង​ថ្ងៃ​បុណ្យ​ មាឃ​បូជា

ភ្នំពេញៈ មន្ត្រី​សាលា​រាជធានី​កាលពី​ម្សិលមិញ​បាន​បញ្ចេញ​ប្រតិកម្ម​ភ្លាមៗ​ទៅ​នឹង​សារព័ត៌មាន​ក្នុង​ស្រុក និង មតិ​មួយ​ចំនួន​ដែល​រិះគន់​ទៅ​លើ​ស្ថាប័ន​នេះ​ថា​មិន​អនុញ្ញាត​ឱ្យ​សម្តេច​សង្ឃ​រៀបចំ​ពិធី​ដង្ហែ​ក្បួន​មាឃបូជា​ដោយ​អះអាង​ថា​សម្តេច​សង្ឃ​ជា​អ្នក​សុំ​ផ្អាក​ដោយ​អង្គឯង។

ការ​ប្រតិកម្ម​​នេះ​ធ្វើ​ឡើង​ភា្លម​ៗ​ជា​ការ​ឆ្លើយតប​ទៅ​មតិ​មួយ​ចំនួន​ជាពិសេស​នៅ​តាម​បណ្តាញ​ហ្វេសប៊ុក​ដែល​បាន​បង្ហោះ​តៗ​គ្នា​ថា​ព្រះពុទ្ធ​សាសនា​ជា​សាសានា​របស់​រដ្ឋ​បែរ​ជា​សាលា​រាជធានី​ភ្នំពេញ​មិន​អនុញ្ញាត​ឱ្យ​​ហែ​ក្បួន​មាឃបូជា​តែ​បែរ​ជា​អនុញ្ញាត​ឱ្យ​មាន​ពិធី​ហែ​ក្បួន​អ្នកតា​យួន ចិន​នៅ​លើ​ផ្លូវ​សាធារណៈ​ដែល​ជា​ប្រពៃណី​របស់​ចិន និង​យួន​ទៅ​វិញ។

ក្នុង​បណ្តាញ​សង្គម​ហ្វេសប៊ុក​បាន​បង្ហោះ​ស្រដៀងៗ​គ្នា​ថា «មាឃបូជា​បុណ្យ​ជាតិ​ដ៏ធំ​របស់​ខ្មែរ​តែ​សាលា​ក្រុង​មិន​អនុញ្ញាត​ឲ្យ​ដង្ហែ​ក្បួន​ដូច​រាល់​ឆ្នាំ​រីឯ​ការ​ឡើង​អ្នកតា យួន ចិន ដង្ហែ​ក្បួន​ម៉ាសេរី​ដោយ​ឥត​បញ្ហា​នេះ​ ឬ​ជា​ការ​ថែរក្សា​ការពារ​មរតក​ដូនតា​ខ្មែរ»។

ជា​ការ​កត់សម្គាល់​នៅ​ថ្ងៃ​ដង្ហែ​ក្បួន​អ្នកតា​ចិន យួន​ត្រូវ​បាន​ប្រារព្ធ​ធ្វើ​ឡើង​យ៉ាង​អធិកអធម​ទាំង​ក្នុង​រាជធានី​ភ្នំពេញ និង​នៅ​តាម​បណ្តា​ខេត្ត​មួយ​ចំនួន​។

អ្នក​នាំ​ពាក្យ​សាលា​រាជធានី​លោក ឡុង ឌីម៉ង់ បាន​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ដោយ​បកស្រាយ​ថា​ក្រោយ​ពី​ទទួល​បាន​លិខិត​ជូន​ដំណឹង​ពី​សម្តេច​សង្ឃ សាលា​ក្រុង​បាន​អនុញ្ញាត​ឱ្យ​មាន​ការ​ហែ​ក្បូន​មាឃបូជា​ជា​ធម្មតា​ហើយ​សាលា​ក្រុង​បាន​ត្រៀម​កម្លាំង​សន្តិសុខ​ដើម្បី​ការពារ​សណ្តាប់​ធ្នាប់​សាធារណៈ​ទៀត​ផង។

តែ​លោក​ថា​ គ្រាន់​តែ​មិន​អនុញ្ញាត​ឱ្យ​មាន​ការ​ហែក្បួន​លើ​ផ្លូវ​ព្រះ​នរោត្តម​តែ​មួយ​ប៉ុណ្ណោះ​ដោយ​ខ្លាច​ប៉ះពាល់​ដល់​គណៈប្រតិភូ​កម្ពុជា​ស្រប​ពេល​ដែល​ព្រះអង្គ​ម្ចាស់​ក្សត្រិយ៍​ថៃ​ធ្វើ​ទស្សនកិច្ច​នៅ​កម្ពុជា។

លោក​បញ្ជាក់​ថា​ក្រោយ​ពី​លោក​បាន​ជូន​ដំណឹង​នេះ​ត្រឡប់​ទៅ​វិញ​សម្តេច​​សង្ឃ​​បាន​សម្រេច​ចិត្ត​សុំ​ផ្អាក​ហែក្បួន​ដោយ​ខ្លួន​ឯង​។ លោក​ថ្លែង​ថា៖ «អ៊ីចឹង​ទេ​ព្រះអង្គ​លោក​សព​ព្រះទ័យ​ថា​សុំ​កែ​តម្រូវ​វិញ​អត់​ធ្វើ​វិញ​ចាំ​ឆ្នាំ​ក្រោយ​វិញ»​។

កាលពី​ថ្ងៃ​ទី ១៧ ខែ​កុម្ភៈ​សម្តេច​សង្ឃ នន្ទ ង៉ែត ជា​សម្តេច​សង្ឃ​នាយក​នៃ​ព្រះរាជា​ណាចក្រ​កម្ពុជា​បាន​សរសេរ​លិខិត​ទៅ​អភិបាល​រាជធានី​លោក ប៉ា សុជាតិវង្ស ដោយ​ស្នើសុំ​ដង្ហែ​ក្បួន​ពិធី​មាឃ​បូជា​ដែល​មាន​ព្រះសង្ឃ ពុទ្ធបរិស័ទ សិស្ស និស្សិត ចូលរួម​ដង្ហែ​ក្បួន​ចន្លោះ​ពី ៤០០ ទៅ ៦០០ នាក់។

លិខិត​បញ្ជាក់​ថា៖ «វត្ត​បទុមវតី​បាន​រៀបចំ​ពិធី​បុណ្យ​មាឃបូជា និង​ក្បួន​ដង្ហែ​មាឃបូជា​ដែល​នឹង​ប្រព្រឹត្ត​ទៅ​នៅ​វេលា​ម៉ោង ៣ និង ៣០ នាទី​រសៀល​នា​ថ្ងៃ ១៥ កើត​ខែ​មាឃ ឆ្នាំ​មមែ សូម​ឯកឧត្តម​ជួយ​សម្រួល​ផ្នែក​សន្តិសុខ​ចរាចរណ៍​តាម​ដង​ផ្លូវ»។

លិខិត​បន្ត​ថា ​ក្បួន​ដង្ហែ​ មាឃ​បូជា ​នឹង​ចាប់ផ្តើម​ហែ​ចេញ​ពី​វត្ត​បទុមវតី​ឆ្ពោះ​ទៅ​ជើង​ដល់​របង​ព្រះបរមរាជវាំង​បត់​ស្តាំ​ទៅ​កើត​ត្រង់​ដល់​ក្រសួង​ធម្មការ និង​សាសានា​បត់​ស្តាំ​ទៅ​ត្បូង​តាម​ដង​វិថី​ព្រះស៊ីសុវត្ថិ​ឆ្ពោះ​ទៅ​ត្បូង​ដល់​រូប​សំណាក​សម្តេច​ព្រះសង្ឃ ជួន ណាត បត់​ស្តាំ​តាម​មហាវិថី​ព្រះសុរាម្រិត​ត្រង់​ទៅ​លិច​ដល់​វិមាន​ឯករាជ្យ​បត់​ស្តាំ​ទៅ​ជើង​តាម​មហាវិថី​ព្រះនរោត្តម​ដល់​ផ្លូវ​ឧកញ៉ា ឈុន បត់​ស្តាំ​ត្រង់​ទៅ​កើត​ដល់​ផ្លូវ ឧកញ៉ា សួរ ស្រ៊ុន រួច​បត់​ស្តាំ​ត្រឡប់​ចូល​វត្ត​វិញ។

ភ្នំពេញ​ប៉ុស្តិ៍​មិន​អាច​សុំ​អត្ថាធិប្បាយ​ពី​សម្តេច​សង្ឃ នន្ទ ង៉ែត បាន​ទេ​ពី​ម្សិលមិញ​ដោយ​ព្រះអង្គ​មាន​សង្ឃដីកា​ថា​ជាប់​រវល់។ កាលពី​ម្សិលមិញ​នៅ​វត្ត​បទុមវតី​មាន​ព្រះសង្ឃ ពុទ្ធបរិស័ទ សិស្ស និស្សិត ជាង ១០០០ អង្គ-នាក់​បាន​ប្រារព្ធ​ពិធី​មាឃ​បូជា​ដូច​ធម្មតា និង​ហែក្បួន​ជុំវិញ​វត្ត​ប៉ុណ្ណោះ​មិន​បាន​ហែ​ក្បួន​ទៅ​តាម​គោលដៅ​ដែល​ត្រៀម​ទុក​នោះ​ទេ។

ប្រធាន​អង្គការ​មជ្ឈមណ្ឌល​វប្បធម៌​ជាតិ និង​សីលធម៌​សង្គម​លោក ប៉ូ សំណាង បាន​ថ្លែង​ថា​ព្រះពុទ្ធសាសនា​ជា​សាសនា​របស់​រដ្ឋ និង​មាន​សារៈសំខាន់​សម្រាប់​ប្រជាជន​កម្ពុជា​ទាំង​មូល​ដូចនេះ​សាលា​ក្រុង​គួរ​រៀបចំ​កាលវិភាគ​ឱ្យ​សមស្រប​ធ្វើ​យ៉ាង​ណា​ឱ្យ​សម្តេច​សង្ឃ​ដង្ហែ​ក្បួន​មាឃបូជា​តាម​គ្រប់​ផ្លូវ។

លោក​ថា៖ «ទោះបី​ជា​អ្នក​ណា ឬ​ស្តេច​ណា​អញ្ជើញ​មក​កម្ពុជា​ក៏ដោយ​ត្រូវ​តែ​អនុញ្ញាត​ឱ្យ​សម្តេច​សង្ឃ​ធ្វើការ​ហែ​ក្បួន​ពុំ​គួរ​បិទ​ផ្លូវ​មួយ​នេះ ឬ​មួយ​នោះ​ទេ»។ «បើ​សិន​យើង​បិទ​ផ្លូវ​​ដើម្បី​គេ​ចំ​ថ្ងៃ​ពិសេស​របស់​យើង​ធ្វើ​ឱ្យ​ព្រះមហាក្សត្រ​អង្គ​គេ​ថា​គាត់​មាន​អំណាច​ខ្លាំង​ជាង​វិស័យ​ព្រះពុទ្ធ​សាសនា​ទៀត​»​។

ប្រជាជន​កម្ពុជា​ប្រមាណ ៩៥ ភាគរយ​មាន​ជំនឿ​លើ​​ព្រះពុទ្ធ​សាសនា​ហើយ​រដ្ឋធម្មនុញ្ញ​បាន​ចែង​ថា​ព្រះពុទ្ធសាសនា​ជា​សាសនា​របស់​រដ្ឋ។ ចំណែក​នៅ​ថ្ងៃ​មាឃបូជា​កម្ពុជា​ក៏​បាន​អនុញ្ញាត​ឱ្យ​ប្រជាពលរដ្ឋ​ខ្មែរ​ឈប់​សម្រាក​ពី​ការងារ​ដើម្បី​ទៅ​ចូលរួម​ធ្វើ​បុណ្យ​តាម​បែប​ព្រះពុទ្ធ​សាសនា​នេះ​ផង​ដែរ​៕

អត្ថបទគួរចាប់អារម្មណ៍