ភ្នំពេញៈ សាលារាជធានីភ្នំពេញ បានទុកពេល ១ ខែ គិតចាប់ផ្ដើមពីថ្ងៃទី ២២ មករា ដើម្បីឱ្យប្រជាពលរដ្ឋធ្វើយ៉ាងណាបញ្ឈប់ការរំលោភលើដងផ្លូវ និងចិញ្ចើមផ្លូវសាធារណៈបើពុំដូច្នោះទេ នឹងត្រូវប្រឈមចំពោះការបិទអាជីវកម្ម ផ្អាកការដ្ឋាន ដកហូតសម្ភារ និងរុះរើសំណង់ ឬអាចត្រូវប្រឈមទៅនឹងផ្លូវច្បាប់ ដែលការព្រមានបែបនេះ ត្រូវបានសង្គមស៊ីវិលមើលឃើញថា បានធ្វើឡើងជាច្រើនលើកមកហើយ ប៉ុន្តែមិនឃើញអនុវត្តឲ្យបានជោគជ័យនោះទេ។
លោក ឃួង ស្រេង អភិបាលរាជធានីភ្នំពេញ បានប្រាប់ភ្នំពេញប៉ុស្ដិ៍កាលពីថ្ងៃពុធថា អាជ្ញាធរនៅតាមបណ្ដាខណ្ឌទាំង ១២ បានចាប់ផ្ដើមចុះធ្វើកំណត់ហេតុ នៅតាមបណ្ដាដងផ្លូវទាំងអស់ក្នុងក្រុង ចំពោះទីតាំងណា ដែលមានការរំលោភចិញ្ចើមផ្លូវសាធារណៈ។ លោកថា៖ «យើងគិតចាប់ពីថ្ងៃយើងផ្សព្វផ្សាយទៅ (ថ្ងៃទី ២២ មករា) នេះទៅម៉ាខែ គាត់ (គណៈបញ្ជាការខណ្ឌទាំង ១២) ដើរធ្វើកំណត់ហេតុ នៅទីតាំងរំលោភចិញ្ចើមផ្លូវសាធារណៈ ក៏ដូចជាទ្រូងផ្លូវ គិតចាប់ពីថ្ងៃផ្សាយហ្នឹងទៅ»។
នៅក្នុងសេចក្ដីជូនដំណឹងរបស់សាលាក្រុង ចេញផ្សាយថ្ងៃម្សិលម៉ៃ្ង បង្ហាញថា ប្រជាពលរដ្ឋ ដែលជាម្ចាស់លំនៅឋាន ម្ចាស់អាជីវកម្មដ្ឋាន ម្ចាស់ការដ្ឋាន អ្នកគ្រប់គ្រងមន្ទីរពេទ្យ គ្រឹះស្ថានអប់រំ អគារសាធារណៈ វិស័យឯកជន និងអ្នកប្រើប្រាស់ផ្លូវថ្នល់ទាំងអស់ត្រូវកែសម្រួល និងរៀបចំទីតាំងរបស់ខ្លួន ឱ្យបានត្រឹមត្រូវ ស្របតាមខ្លឹមសារណែនាំ ដូចជា ត្រូវចៀសវាងដាច់ខាត ការឈប់ ឬចតយានជំនិះនៅកន្លែងហាមឃាត់ដូចជា នៅលើទ្រូងផ្លូវ ចិញ្ចើមផ្លូវ ដែលទុកបម្រុងសម្រាប់អ្នកថ្មើរជើង។ ហាមដាច់ខាត ម្ចាស់ការដ្ឋានសំណង់គ្រប់ប្រភេទ ធ្វើការហ៊ុមព័ទ្ធការដ្ឋានលើចិញ្ចើមផ្លូវលើសពី ១ ភាគ ៣ ប្រើប្រាស់ទ្រូងផ្លូវដាក់សម្ភារសំណង់របស់ខ្លួន ដូចជា ដែក ខ្សាច់ ក្រួស ថ្ម។ រថយន្តដឹកទំនិញធុនធំ រថយន្តកុងតឺន័រ រថយន្តបាញ់បេតុង និងរថយន្តក្រឡុកស៊ីម៉ង់ត៍ ត្រូវចេញចូលក្រុងដោយគោរពតាមការណែនាំរបស់រដ្ឋបាលរាជធានីភ្នំពេញ និងចៀសវាងការប្រើប្រាស់ទ្រូងផ្លូវក្នុងការលើកដាក់ផ្ទេរទំនិញ បាញ់បេតុង ឬឈប់សំចត ដោយអនាធិបតេយ្យ។
សេចក្តីជូនដំណឹងបន្តថា ការរៀបចំសម្ភារ ទំនិញ ម៉ូតូ និងរថយន្តដាក់តាំង លក់ អាចប្រើប្រាស់ចិញ្ចើមផ្លូវត្រឹម ១ ភាគ ៣ ជាលក្ខណៈបណ្ដោះអាសន្ន ហើយ ២ ភាគ ៣ សម្រាប់ថ្មើរជើង និងចរាចរណ៍។ រាល់ការប្រើប្រាស់ចិញ្ចើមផ្លូវជាទីតាំងផ្ញើកង់ម៉ូតូ មិនត្រូវលើសពី ១ ភាគ ៣ នៃចិញ្ចើមផ្លូវឡើយ។
ប៉ុន្តែសេចក្ដីជូនដំណឹងនេះបញ្ជាក់ថា ចិញ្ចើមផ្លូវនៅតែអាចយកទៅប្រើប្រាស់បានសម្រាប់បម្រើសកម្មភាពមួយចំនួនដូចជា ការធ្វើចរាចរណ៍ដោយថ្មើរជើង ធ្វើសកម្មភាពវប្បធម៌ កីឡា ការតាំងពិព័រណ៍ និងពិធីបុណ្យផ្សេងទៀត នៅលើដងផ្លូវ ប៉ុន្តែត្រូវមានការអនុញ្ញាតពីអាជ្ញាធរទៅតាមកម្រិតនៃពិធី និងភាពចាំបាច់។
ការបម្រើសកម្មភាពជីកកប់បណ្ដាញក្រោមដី ដូចជា បណ្ដាញទឹកស្អាត ប្រព័ន្ធលូ ខ្សែបញ្ជូនអគ្គិសនី បំពង់ទុយោ ខ្សែកាប្លិ៍អុបទិក គ្រប់ប្រភេទ និងបរិក្ខារក្រោមដីផ្សេងទៀត អាចធ្វើសកម្មភាពសាងសង់ក្នុងគម្រោងចាំបាច់មួយចំនួន ដូចជា បរិក្ខារបម្រើឱ្យវិស័យការពារជាតិ សន្ដិសុខជាតិតាមការចាំបាច់ផ្សេងៗ។
ដោយឡែកចាប់ពីថ្ងៃទី ១ ខែកក្កដាខាងមុខ អាជ្ញាធររាជធានីភ្នំពេញក៏បញ្ឈប់ការអនុញ្ញាតឱ្យមានការរៀបចំរោងការ និងរោងបុណ្យនៅតាមចិញ្ចើមផ្លូវ និងទ្រូងផ្លូវទៀតឡើយ ដោយតម្រូវឱ្យពលរដ្ឋត្រូវទៅស្វែងរកទីតាំងសមស្របណាមួយ ដូចជានៅក្នុងវត្តអារាមឬរកទីតាំងឯកជន។
សាលារាជធានីភ្នំពេញអះអាងថា ការចេញសេចក្ដីណែនាំ ដើម្បីកុំឱ្យមានការរំលោភលើចិញ្ចើម និងដងផ្លូវសាធារណៈនៅទូទាំងក្រុងនេះ គឺដោយសារការចេញសេចក្ដីណែនាំមួយកាលពីឆ្នាំ ២០១៧ ដោយជ្រើសយកផ្លូវសំខាន់ ១១ ខ្សែ ទទួលបានការចូលរួមអនុវត្តច្រើនពីពលរដ្ឋ។
លោក គង់ រតនៈ អនុប្រធានវិទ្យាស្ថានសុវត្ថិភាពចរាចរណ៍លើកឡើងថា សេចក្ដីណែនាំបែបនេះ ហាក់មិនមានអ្វីថ្មីឡើយ ហើយការអនុវត្តកន្លងមក ហាក់មានឧបសគ្គច្រើន ដែលធ្វើឱ្យអាជ្ញាធរតែងមិនបានជោគជ័យ។
លោកថា៖ «ធ្លាប់បានឃើញកន្លងមកដែលគាត់ប្រកាសគ្រោងចាត់វិធានការ ក៏ប៉ុន្តែគ្រាន់ថា ការអនុវត្តហ្នឹងត្រឹមតែថ្នាក់ខណ្ឌ ឬក៏ថ្នាក់ក្រុងអ៊ីចឹងទៅ ដល់ពេលធ្វើទៅច្រើនតែប៉ះពាល់ (អ្នកមានអំណាច) ហើយច្រើនតែមានការអន្តរាគមន៍ពីលើ។ ខ្ញុំសាទរ បើសិនជាគាត់ (សាលាក្រុង) ទទួលបានជោគជ័យ ក៏ប៉ុន្តែឆ្លងតាមបទពិសោធកន្លងមក យើងឃើញថា នឹងលែងឱ្យមានការរំលោភលើចិញ្ចើមផ្លូវទៀតណាស់»។
លោកបន្ថែមថា ដើម្បីបញ្ឈប់ការលក់ដូរនៅតាមចិញ្ចើមផ្លូវបានអាជ្ញាធរគួរត្រូវតែស្វែងរកទីតាំងណាផ្សេង ដើម្បីឱ្យពួកគាត់ទៅលក់ដូរ នៅទីតាំងនោះជំនួសវិញ ព្រោះការធ្វើបែបនេះ នឹងចៀសវាងពលរដ្ឋយំស្រែក ហើយបង្កជារូបភាពមិនល្អ៕