.jpg)
លោក កើត ឆែ អភិបាលរងនៃគណៈអភិបាលរាជធានីភ្នំពេញ នាពេលកន្លងមក។ រូបថត FN
ភ្នំពេញ៖ សាលារាជធានីភ្នំពេញ បានផ្ដល់ជម្រើស ២ ដល់អង្គការសង្គមស៊ីវិល និងសហជីព ដែលស្នើសុំរៀបចំពិធីរំឭកខួប ២៩ ឆ្នាំ នៃកិច្ចព្រមព្រៀងសន្តិភាពទីក្រុងប៉ារីសនៅថ្ងៃទី ២៣ ខែតុលា ខណៈពេលដែលអាជ្ញាធរ កំពុងមមាញឹកក្នុងការចុះជួយដល់ពលរដ្ឋរងគ្រោះដោយទឹកជំនន់។
អង្គការ សមាគម សហគមន៍ និងសហព័ន្ធសហជីព ចំនួន ៧ បានជួបប្រជុំជាមួយសាលារាជធានីភ្នំពេញ កាលពីថ្ងៃទី ១៦ តុលា ដើម្បីបញ្ជាក់ពីគម្រោងរៀបចំពិធីរំឭកខួប ២៩ ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស នៅថ្ងៃទី២៣ ខែតុលា។
តាមគម្រោងដើម ក្រុមអង្គការសង្គមស៊ីវិលគ្រោងនឹងប្រារព្ធពិធីនេះ នៅទីលានប្រជាធិបតេយ្យ ក្នុងខណ្ឌឫស្សីកែវ ដោយមានអ្នកចូលរួមប្រមាណ ១ ០០០ នាក់។ នេះបើតាមកំណត់ហេតុប្រជុំរបស់សាលារាជធានីភ្នំពេញ។
ក្រៅពីការជួបជុំនៅទីលានប្រជាធិបតេយ្យ ពួកគេក៏គ្រោងហែក្បួនទៅតាមស្ថាប័នពាក់ព័ន្ធ ដើម្បីផ្សព្វផ្សាយពីសមិទ្ធផលសំខាន់ៗ ដែលបានកើតចេញពីការអនុវត្តកិច្ចព្រមព្រៀង និងគោលការណ៍ចម្បងនៃកិច្ចព្រមព្រៀង ដើម្បីបន្តធានានូវដំណើរការសន្តិភាព និងការអភិវឌ្ឍកម្ពុជា។
ប្រធានបទនៃការប្រារព្ធខួបលើកទី ២៩ គ្រោងនឹងធ្វើឡើងក្រោមប្រធានបទ «២៣ តុលា នាំមកនូវការរួបរួមជាតិ សន្តិភាព ប្រជាធិបតេយ្យ និងការអភិវឌ្ឍ»។
ប៉ុន្តែលោក កើត ឆែ អភិបាលរងនៃគណៈអភិបាលរាជធានីភ្នំពេញ មិនបានយល់ស្របលើគម្រោងនេះទេ ដោយលោកលើកឡើងនូវជម្រើស ២ សម្រាប់ឲ្យក្រុមអង្គការសង្គមស៊ីវិលជ្រើសយក។
ជម្រើសទី១ គឺការប្រារព្ធខួបអាចធ្វើឡើងនៅទីលានប្រជាធិបតេយ្យចាប់ពីម៉ោង ៧ កន្លះព្រឹកដល់ម៉ោង ១២ ថ្ងៃត្រង់ ដោយមានអ្នកចូលរួមមិនលើសពី ១២០ នាក់។ រដ្ឋបាលរាជធានីភ្នំពេញនឹងស្នើសុំតំណាងស្ថាប័នពាក់ព័ន្ធ ទៅទទួលញត្តិនៅទីលានប្រជាធិបតេយ្យផ្ទាល់។
ជម្រើសទី២ ក្រុមអង្គការសង្គមស៊ីវិល អាចរៀបចំពីធីនេះនៅស្នាក់ការរបស់ខ្លួន ឬនៅទីតាំងឯកជន ដោយរដ្ឋបាលរាជធានីភ្នំពេញយល់ព្រមទទួលយកញត្តិពីសមាគម អង្គការទាំង៧ ដើម្បីដាក់ជូនស្ថាប័នពាក់ព័ន្ធ។ ក្នុង
ជម្រើសទាំង ២ នេះ សាលារាជធានី មិនអនុញ្ញាតឲ្យមានការដង្ហែក្បួនទេ។
កំណត់ហេតុអង្គប្រជុំបានបញ្ជាក់ថា៖ «ឯកឧត្តម កើត ឆែ ប្រធានអង្គប្រជុំ មានប្រសាសន៍បន្ថែមទៀតថា ដោយសារស្ថានភាពបច្ចុប្បន្ននៅក្នុងរាជធានីភ្នំពេញ កំពុងទទួលរងគ្រោះមហន្តរាយដោយសារជំនន់ទឹកភ្លៀង បានលិចជន់នៅតាមតំបន់មួយចំនួន តម្រូវឲ្យរដ្ឋបាលរាជធានីភ្នំពេញ ដោះស្រាយជាបន្ទាន់ ដើម្បីជួយសង្គ្រោះដល់ប្រជាពលរដ្ឋ។ ហេតុដូច្នេះរដ្ឋបាលរាជធានី ស្នើឲ្យតំណាងគណៈកម្មការរៀបចំពិធីខាងលើ អាចរកទីតាំងឯកជន ឬទីស្នាក់ការរបស់ខ្លួនដើម្បីប្រារព្ធពិធីឬអាចលើកពេលការរៀបចំប្រារព្ធពិធីនេះនៅពេលក្រោយ»។
សម្រាប់ជម្រើសទាំង ២ នេះ សាលារាជធានីភ្នំពេញប្រាប់ដល់ម្ចាស់សំណើសុំរៀបចំពិធីនេះឲ្យគោរពតាមវិធានសុវត្ថិភាពពាក់ព័ន្ធនឹងការការពារជំងឺកូវីដ ១៩ ដូចដែលក្រសួងសុខាភិបាលបានណែនាំ ព្រមទាំងទទួលខុសត្រូវចំពោះកិច្ចការពារសន្តិសុខ សុវត្ថិភាពផ្ទៃក្នុង ខណៈដែលសមត្ថកិច្ចទទួលខុសត្រូវការពារពីខាងក្រៅ។
ការរៀបចំពិធីនេះ ត្រូវគោរពក្រមសីលធម៌ ដោយមិនត្រូវយកកម្មវិធីនេះទៅវាយប្រហារដល់ព្រះមហាក្សត្រ ឥស្សរជនជាន់ខ្ពស់ក្នុងជួររាជរដ្ឋាភិបាល ឬបំផុសញុះញង់ប្រជាពលរដ្ឋឲ្យកើតអំពើហិង្សា បំបែកបំបាក់សាមគ្គីជាតិ ប្រើសារនយោបាយ ឬអនុញ្ញាតឲ្យអ្នកហាមធ្វើនយោបាយចូលរួម។ អ្នកចូលរួមក៏ត្រូវទទួលខុសត្រូវ លើខ្លឹមសារបដា ឧបករណ៍បំពងសំឡេង និងការចតនៅលើដងផ្លូវ។
លោក យី សុខសាន្ត តំណាងអង្គការអាដហុក បានថ្លែងនៅថ្ងៃទី ១៨ ខែតុលា ថា ក្រុមអង្គការសង្គមស៊ីវិល ដែលស្នើសុំរៀបចំពិធីនេះ នឹងជួបប្រជុំគ្នានៅថ្ងៃចន្ទនេះ ដើម្បីសម្រេចលើជម្រើសទាំងពីរនេះ។
លោកថ្លែងដូច្នេះថា៖ «យើងមើលឃើញហើយ ការអង្វរករពីអាជ្ញាធរសមហេតុផលខ្លះ។ ពេលហ្នឹងកំពុងមានទឹកជំនន់អ៊ីចឹង ហើយមួយរយៈនេះ អាជ្ញាធរគាត់បានចុះទៅអស់ហើយ ជួយប្រជាជន។ ដូច្នេះគាត់អត់សូវមានពេលជួយមកខាងយើងទេ ពេលយើងធ្វើ។ សម្រាប់យើង អ្វីដែលសាលារាជធានីស្នើសុំមកពួកយើង យើងពិចារណាពិភាក្សាគ្នានៅថ្ងៃចន្ទ ដើម្បីសម្រេចថា យើងយកជម្រើសទី១ ឬទី២»៕
