ភ្នំពេញៈ បន្ទាប់ពីរកឃើញអាជីវករ និងកម្លាំងសន្តិសុខនៅមជ្ឈមណ្ឌលពាណិជ្ជកម្មផ្សារអូរឫស្សីមានវិជ្ជមានជំងឺកូវីដ ១៩ ជាបន្តបន្ទាប់មក រដ្ឋបាលរាជធានីភ្នំពេញបានសម្រេចផ្អាកដំណើរការផ្សារនេះរយៈពេល ១៤ ថ្ងៃ គឺចាប់ពីថ្ងៃម្សិលមិញរហូតដល់ថ្ងៃទី ១៧ ខែមេសា ដើម្បីបង្ការ និងទប់ស្កាត់ការឆ្លងរីករាលដាលវីរុសកូវីដ១៩ ទៅដល់អាជីវករ និងប្រជាពលរដ្ឋដែលចេញ-ចូលផ្សារនេះ។
នៅថ្ងៃម្សិលមិញនេះដែរ ក្រុមគ្រូពេទ្យ គណៈកម្មការផ្សារ និងអាជ្ញាធរខណ្ឌ៧មករា បានចុះបាញ់ថ្នាំសម្លាប់មេរោគនៅខាងក្នុងផ្សារនេះ និងបាញ់ទឹកសាប៊ូនៅខាងក្រៅបរិវេណផ្សារ។
លោក ឃួង ស្រេង អភិបាលរាជធានីភ្នំពេញបានចេញសេចក្តីជូនដំណឹងពីការផ្អាកជាបណ្តោះអាសន្ននូវមជ្ឈមណ្ឌលពាណិជ្ជកម្មផ្សារអូរឫស្សីរយៈពេល ២ សប្តាហ៍ បន្ទាប់ពីមានអាជីវករចំនួន ៥ នាក់ និងកម្លាំងសន្តិសុខផ្សារមួយចំនួន ៣ នាក់ បានឆ្លងវីរុសកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ។
ក្នងលិខិតជូនដំណឹងរបស់រដ្ឋបាលរាជធានីភ្នំពេញដែលចុះហត្ថលេខាដោយលោក ឃួង ស្រេង កាលពីថ្ងៃទី ៣ ខែ មេសា ឆ្នាំ ២០២១ លើកឡើងថាក្នុងរយៈពេលប៉ុន្មានថ្ងៃចុងក្រោយនេះមានអាជីវករ និងសន្តិសុខផ្សារអូរឫស្សីបានឆ្លងវីរុសកូវីដ១៩ ដែលស្ថានភាពបានរីករាលដាលជាបន្តបន្ទាប់ច្រើនតូប និងទីតាំងខុសៗគ្នាក្នុងបរិវេណផ្សារគួរឱ្យព្រួយបារម្ភ និងចាំបាច់ត្រូវមានវិធានការសុខាភិបាល ដើម្បីទប់ស្កាត់ជាបន្ទាន់។
លោក ឃួង ស្រេង បញ្ជាក់ថា៖ «ចំពោះមុខរដ្ឋបាលរាជធានីភ្នំពេញសូមផ្អាកដំណើរការជាបណ្តោះអាសន្នមជ្ឈមណ្ឌលពាណិជ្ជកម្មផ្សារអូរឫស្សីរយៈពេល ១៤ ថ្ងៃ គិតចាប់ពីថ្ងៃទី ៤ ដល់ថ្ងៃទី ១៧ ខែមេសា ដើម្បីបង្ការ និងទប់ស្កាត់ការឆ្លងរីករាលដាលវីរុសកូវីដ ១៩ ទៅដល់អាជីវករ អតិថិជន ក៏ដូចជាប្រជាពលរដ្ឋដែលចេញ-ចូលផ្សារនេះ»។
ក្នុងអំឡុងពេលនៃការផ្អាកដំណើរការជាបណ្តោះអាសន្ននេះ រដ្ឋបាលរាជធានីភ្នំពេញធានារ៉ាប់រងលើការងារ សន្តិសុខ និងសុវត្ថិភាពចំពោះសម្ភារ និងអីវ៉ាន់គ្រប់ប្រភេទរបស់បងប្អូនអាជីវករ ដែលបានរក្សាទុកក្នុងតូបនីមួយៗមិនឱ្យមានការបាត់បង់ និងមិនតម្រូវឱ្យមានការបង់ថ្លៃសេវាទៅឱ្យភាគីពាក់ព័ន្ធណាមួយឡើយ។
លោក ឃួង ស្រេង បានបន្ថែមថា ដោយឡែក ចំពោះផលិតផលដែលអាចខូចគុណភាពដូចជា បន្លែ ផ្លែឈើ ត្រី សាច់ ស៊ុតអាជីវករត្រូវទំនាក់ទំនងជាមួយគណៈកម្មការផ្សារ ដើម្បីយកទៅរក្សាទុកដោយខ្លួនឯង ចៀសវាងការខូចខាតជាយថាហេតុ។
លោកថា៖ «រដ្ឋបាលរាជធានី-ភ្នំពេញមានក្តីសង្ឃឹមជឿជាក់ថា បងប្អូនប្រជាពលរដ្ឋ ជាពិសេសអាជីវករ និងអតិថិជនទាំងអស់ដែលចេញ-ចូលមជ្ឈមណ្ឌលពាណិជ្ជកម្មផ្សារអូរឫស្សីមានការយោគយល់អធ្យាស្រ័យ និងចូលរួមអនុវត្តសេចក្តីជូនដំណឹងនេះ»។
អ្នកលក់គ្រឿងក្រអូបនៅក្នុងផ្សារអូរឫស្សីអ្នកនាង វណ្ណារី បានប្រាប់ ភ្នំពេញ ប៉ុស្តិ៍ ម្សិលមិញថា ការបិទនេះពិតជាប៉ះពាល់ដល់ចំណូលប្រចាំថ្ងៃរបស់នាង និងអាជីវករដទៃទៀត ប៉ុន្តែនាងមិនប្រឆាំងនឹងការបិទនេះទេ ដោយសារអាជ្ញាធរគិតគូរពីសុខភាពរបស់អាជីវករទើបបានជាត្រូវបិទផ្អាកបណ្តោះអាសន្ន។ «ផលិតផលខ្ញុំមិនជាប៉ះពាល់ខូចខាតទេ ហើយខ្ញុំសង្ឃឹមថា ស្ថានភាពនេះនឹងមិនធ្វើឱ្យមានការពន្យារពេលយូរជាង ១៤ ថ្ងៃទៅចុះ ដោយសារម្នាក់ៗពឹងលើតែប្រាក់ចំណូលពីការលក់ដូររាល់ថ្ងៃតែពេលនេះ កន្លែងលក់ដូររបស់យើងបានបិទមួយរយៈសិន»។
ក្នុងរយៈពេល ២ ថ្ងៃកន្លងមកនេះសាលារាជធានីភ្នំពេញបានចេញសេចក្ដីជូនដំណឹងពីការរកឃើញករណីវិជ្ជមានកូវីដ ១៩ ដោយបានបង្ហាញពីអត្តសញ្ញាណរបស់អ្នកជំងឺដែលកាលពីថ្ងៃម្សិលមិញ រដ្ឋបាលរាជធានីភ្នំពេញ បានបង្ហាញឈ្មោះអ្នកជំងឺកូវីដចំនួន ២៥ រូប ដែលជាករណីឆ្លងក្នុងសហគមន៍ ក្នុងនោះក៏មានអាជីវករផ្សារអូរឫស្សីផងដែរ។
ជាមួយគ្នានោះរដ្ឋបាលរាជធានីភ្នំពេញបានអំពាវនាវដល់ប្រជាពលរដ្ឋដែលធ្លាប់ប្រាស្រ័យទាក់ទងជាមួយអ្នកជំងឺកូវីដ ១៩ ទាំងអស់ត្រូវរាយការណ៍ជូនអាជ្ញាធរមូលដ្ឋានជាបន្ទាន់ និងរួសរាន់ទៅយកសំណាកនៅតាមទីតាំងដែលបានកំណត់។
ក្រសួងសុខាភិបាលពីម្សិលមិញរកឃើញឆ្លងវីរុសកូវីដ ១៩ ចំនួន ៤៤ នាក់បន្ថែមទៀត ក្នុងចំណោមនោះម្នាក់ជាអ្នកដំណើរមកពីបរទេស និង ៤៣ នាក់ផ្សេងទៀត ជាអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ ដែលធ្វើឱ្យករណីឆ្លងសរុបក្នុងព្រឹត្តិការណ៍នេះមានរហូតដល់ ២ ១៥៩ នាក់ និងស្លាប់ ១៩ នាក់។ ជាមួយគ្នានេះ អ្នកជំងឺកូវីដ ១៩ ចំនួន ៦៨ នាក់ បានព្យាបាលជាសះស្បើយ ក្នុងនោះមាន ៦៧ នាក់ជាអ្នកជំងឺពាក់ព័ន្ធនឹងព្រឹត្តិការណ៍សហគមន៍ ២០ កុម្ភៈ។ អ្នកដែលឆ្លងថ្មីនេះមាននៅរាជធានីភ្នំពេញចំនួន ២៥ នាក់ ខេត្តព្រះសីហនុចំនួន ១៧ នាក់ និងខេត្តស្វាយរៀងចំនួន ១ នាក់។
អ្នកជំងឺម្នាក់ដែលជាអ្នកដំណើរគឺជាជនជាតិប៉ាគីស្ថានអាយុ ៤៦ ឆ្នាំស្នាក់នៅរាជធានីភ្នំពេញជាអ្នកដំណើរមកពីប្រទេសកូរ៉េខាងត្បូង មកដល់កម្ពុជានៅថ្ងៃទី ២១ ខែមីនា ឆ្នាំ ២០២១ ដែលលទ្ធផលធ្វើតេស្តវត្ថុសំណាកស្ត្រីរូបនេះលើកទី២ ដោយវិទ្យាស្ថានប៉ាស្ទ័រកម្ពុជាគឺវិជ្ជមានមេរោគកូវីដ។ គិតត្រឹមថ្ងៃម្សិលមិញកម្ពុជាមានអ្នកឆ្លងជំងឺកូវីដ ១៩ សរុបចំនួន ២ ៦៨៩ នាក់អ្នកជាសះស្បើយចំនួន ១ ៦៥៣ នាក់ អ្នកកំពុងសម្រាកព្យាបាលចំនួន ១ ០១២ នាក់ និងអ្នកស្លាប់ចំនួន ២០ នាក់៕