ភ្នំពេញៈ សាលារាជធានីភ្នំពេញ ចេញបញ្ជាឱ្យអាជ្ញាធរមានសមត្ថកិច្ចត្រូវទប់ស្កាត់ការនាំចូលជាតិផ្ទុះគ្រប់ប្រភេទក្នុងរាជធានីភ្នំពេញ និងហាមដាច់ខាតមិនឲ្យប្រជាពលរដ្ឋរៀបចំពិធីដុតផាវ ឬកាំជ្រួច ក្នុងអំឡុងពេលបុណ្យចូលឆ្នាំប្រពៃណី ចិន និងវៀតណាមចាប់ពីថ្ងៃទី ៧ ដល់ ថ្ងៃទី ១០ ខែ កុម្ភៈខាងមុខនេះ ដោយអះអាងថា ដើម្បីរក្សានូវសន្តិសុខ និងសុវត្ថិភាពសាធារណៈ។
សេចក្តីជូនដំណឹងរបស់រដ្ឋបាលរាជធានីភ្នំពេញ ចេញផ្សាយកាលពីម្សិលមិញ ឲ្យដឹងថា ដើម្បីរក្សាបាននូវសន្តិសុខ សុវត្ថិភាពសណ្តាប់ធ្នាប់ និងរបៀបរៀបរយសាធារណៈក្នុងការឱកាសបុណ្យចូលឆ្នាំប្រពៃណីចិន និងវៀតណាម អាជ្ញាធរមានសមត្ថកិច្ចគ្រប់ជាន់ថ្នាក់ត្រូវមានវិធានការតឹងរ៉ឺងក្នុងការនាំចូលវត្ថុជាតិផ្ទុះ និងណែនាំដល់ អង្គភាព ខណ្ឌ សង្កាត់ សមាគម ក្រុមហ៊ុនឯកជន អង្គការក្រៅរដ្ឋាភិបាល មិនឲ្យអុចផាវ។
សេចក្តីជូនដំណឹងបានហាមថា មិនឲ្យមានការដុតផាវ កាំជ្រួច ឬបង្កសម្លេងផ្ទុះគ្រប់ប្រភេទក្នុងឱកាសពិធីបុណ្យនេះ និងមិនឲ្យលេងល្បែងគ្រប់ប្រភេទដែលមានលក្ខណៈស៊ីសង។ រាល់ការហែក្បួនផ្សេងៗទាំងបែបសាសនា និងប្រពៃណីដែលគ្មានការអនុញ្ញាតត្រូវបានហាមឃាត់។
សេចក្តីជូនដំណឺងបញ្ជាក់ថា អាជ្ញាធរមានសមត្ថកិច្ចគ្រប់លំដាប់ថ្នាក់ ត្រូវចាត់វិធានការឲ្យបានម៉ឺងម៉ាត់បំផុត កុំឲ្យមានការនាំចូល ផាវ កាំជ្រួច ជាតិផ្ទុះគ្រប់ប្រភេទ តាមច្រកចេញចូលរាជធានីភ្នំពេញ និងត្រូវត្រួតពិនិត្យដកហូតវត្ថុទាំងនេះ ដែលមានតាំងលក់នៅគ្រប់ទីកន្លែងក្នុងរាជធានីភ្នំពេញ។ ចំណែកមន្ទីរធម្មការ និងសាសនារាជធានីភ្នំពេញ ត្រូវអញ្ចើញបណ្តាលសមាគមចិន និងវៀតណាម ដើម្បីផ្សព្វផ្សាយនូវខ្លឹមសារនេះឲ្យបានទូលំទូលាយ។
សាលារាជធានីសង្កត់ធ្ងន់ថា ជនណាបំពានលើសេចក្តីណែនាំនេះ ឬប្រព្រឹត្តល្មើសបង្កឱ្យមានចលាចលក្នុងសង្គម បាត់បង់សណ្តាប់ធ្នាប់ សន្តិសុខ និងសុវត្ថិភាពត្រូវទទួលទោសតាមច្បាប់ជាធរមាន។
អ្នកនាំពាក្យសាលារាជធានីភ្នំពេញលោក ឡុង ឌីម៉ង់ ប្រាប់ភ្នំពេញប៉ុស្តិ៍បន្ថែមថា ការណែនាំនេះសម្រាប់តែនៅរាជធានីភ្នំពេញប៉ុណ្ណោះ ចំណែកនៅតាមបណ្តាលខេត្តជាសមត្ថកិច្ចរបស់អាជ្ញាធរមូលដ្ឋាន។
លោកបន្តថា មូលហេតុមិនអនុញ្ញាតឲ្យប្រជាពលរដ្ឋដុតផាវ ឬកាំជ្រួចដោយសារកន្លងទៅឲ្យតែមានពិធីបុណ្យចូលឆ្នាំចិនម្តងៗប្រជាពលរដ្ឋខ្លះមានការធ្វេសប្រហែស នាំឲ្យមានអគ្គិភ័យ។
លោកថា «ព្រោះរឿងការពារសុវត្ថិភាព សន្តិសុខសណ្តាប់ធ្នាប់ជាប្រចាំថ្ងៃព្រោះអត់មានអីប្លែកផងព្រោះបុណ្យចូលឆ្នាំចិន មិនមែនជាបុណ្យជាតិរបស់ខ្មែរណា»។
សាលារាជធានី ក៏បានក្រើនរំឮកដល់ទីកន្លែងកម្សាន្តនានា មន្ទីរ អង្គភាព រោងចក្រ សហគ្រាស គេហដ្ឋាន ត្រូវប្រុងប្រយ័ត្នក្នុងការអុចទៀនធូប ក្រដាសសែន ភ្លើងចង្ក្រាន ចរន្តអគ្គិសនីដែលអាចបង្កឲ្យមានគ្រោះអគ្គិភ័យកើតឡើងជាយថាហេតុ៕
