.jpg)
សកម្មភាពប្រមូលសំរាមដាក់ក្នុងរថយន្តរបស់កម្មករប្រមូលសំរាមនាពេលកន្លងមក។ ហេង ជីវ័ន
ភ្នំពេញៈ សាលារាជធានីភ្នំពេញនឹងប្រកាសទទួលពាក្យសូមដេញថ្លៃការប្រមូលសំរាមនៅចុងខែកុម្ភៈ ឬនៅដើមខែមីនាខាងមុខ ដើម្បីឲ្យបណ្តាក្រុមហ៊ុនដែលមានចំណាប់អារម្មណ៍អាចចូលរួមដាក់ពាក្យដេញថ្លៃស្របពេលដែលក្រុមហ៊ុនប្រមូលសំរាមរបស់ជប៉ុនក៏មានចំណាប់អារម្មរណ៍ចូលរួមដេញថ្លៃការប្រមូលសំរាមនេះផងដែរ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានប្រាប់ភ្នំពេញប៉ុស្តិ៍ពីម្សិលមិញថា សាលារាជធានីភ្នំពេញមិនទាន់បានកំណត់ពេលវេលាជាក់លាក់នៃការដាក់ដេញថ្លៃក្នុងការប្រមូលសំរាមនេះនៅឡើយទេ ប៉ុន្តែនៅអំឡុងចុងខែកុម្ភៈនេះ ឬដើមខែក្រោយ សាលារាជធានីនឹងប្រកាសផ្សព្វផ្សាយទទួលពាក្យពីបណ្តាក្រុមហ៊ុនដែលចាប់អារម្មណ៍លើគម្រោងនេះ។
លោកបញ្ជាក់ថា៖ «ក្រុមការងារយើងបានធ្វើការងារនេះមកច្រើនហើយមកដល់ពេលនេះគឺយើងកៀកហើយប្រហែលអាចក្នុងអំឡុងចុងខែនេះ ឬដើមខែ (ក្រោយ) ដែលយើងនឹងចេញការផ្សព្វផ្សាយនៃការដាក់ទទួលការដេញថ្លៃ ហើយធ្វើការសិក្សាទៅលើពាក្យដែលពួកគាត់ដាក់មកឲ្យបានល្អិតល្អន់ជាមុនសិន»។
បើតាមលោក ភក្តី ក្នុងរយៈពេលនៃការសិក្សាកន្លងមកមានក្រុមហ៊ុនក្នុងស្រុក និងក្រៅស្រុកជាច្រើនមានដូចជាមកពីប្រទេសចិន កូរ៉េ និងជប៉ុនជាដើមបានចូលរួមធ្វើបទបង្ហាញ និងបង្ហាញពីចំណាប់អារម្មណ៍របស់ពួកគេក្នុងគោលបំណងចូលរួមការដេញថ្លៃប្រមូលសំរាម។
ដោយសារតែគម្រោងនៃការសិក្សាពីការគ្រប់គ្រងសំរាមនៅក្នុងរាជធានីភ្នំពេញកំពុងដំណើរការលោក ភក្តី មិនទាន់អាចបញ្ជាក់បានទេថានឹងធ្វើការបែងចែកដូចម្តេចដោយគ្រាន់តែអាចបញ្ជាក់ថា នឹងធ្វើការបែងចែកជា ៣ តំបន់សម្រាប់ក្រុមហ៊ុនប្រមូលសំរាមយ៉ាងតិចចំនួន ៣ ឲ្យទទួលបានសិទ្ធិគ្រប់គ្រង។
លោករៀបរាប់ថា៖ «ចន្លោះពេលដែលសម្តេច ហ៊ុន សែន បានសម្រេចដកសិទ្ធិក្រុមហ៊ុនស៊ិនទ្រី ដែលធ្វើការគ្រប់គ្រងតែមួយក្រុមហ៊ុន តែឯងហ្នឹង ងាកមករកក្រុមហ៊ុនឲ្យបាន ៣ ទៅ ៤ បន្ថែមទៀត ដើម្បីកុំឲ្យមួយក្រុមហ៊ុនហ្នឹង ធ្វើការតែឯងដែលវាច្រើន ព្រោះមើលទៅមិនបានល្អ»។
លោក មាស សុខសេនសាន អ្នកនាំពាក្យក្រសួងសេដ្ឋកិច្ចបានប្រាប់ភ្នំពេញប៉ុស្តិ៍ ពីម្សិលមិញថា ការដាក់ដេញថ្លៃរាប់ចាប់ពីនីតិវិធីគ្រប់បែបយ៉ាងគឺស្ថិតក្នុងការសម្របសម្រួលដោយក្រុមស្វយ័តមួយដែលគ្រប់គ្រងដោយសាលារាជធានីជាមួយនឹងសមាសភាពមកពីក្រសួងពាក់ព័ន្ធផ្សេងៗទៀត។ លោកបន្តថា ការប្រកាសដាក់ឲ្យដេញថ្លៃនឹងបើកចំហចំពោះក្រុមហ៊ុនវិនិយោគនានា ដែលមានការចាប់អារម្មណ៍ក្នុងការចូលរួមការដេញថ្លៃនេះជាសាធារណៈ ដោយគ្មានការរើសអើងឡើយ។
លោកបានបន្តថា៖ «គឺយើងស្វាគមន៍ទាំងអស់រាល់ការប្រកួតប្រជែងដោយស្មើភាព តម្លាភាព។ គ្រប់ក្រុមហ៊ុនទាំងអស់ទាំងក្នុងប្រទេស និងក្រៅប្រទេសគឺយើងទទួលទាំងអស់ឲ្យតែក្រុមហ៊ុនណាមានសក្តានុពលឆ្លើយតបទៅនឹងលក្ខខណ្ឌបច្ចេកទេសរបស់ក្រុមការងារនោះ គឺនឹងទទួលបានសិទ្ធិ»។
នៅក្នុងជំនួបពិភាក្សាការងារជាមួយលោក មីកាមី ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនប្រចាំកម្ពុជាលោកនាយករដ្ឋមន្ត្រី ហ៊ុន សែន បានសរសេរនៅទំព័រហ្វេសប៊ុករបស់លោកកាលពីថ្ងៃពុធថា នៅពេលនេះរាជធានីភ្នំពេញ និងក្រសួងសេដ្ឋកិច្ចកំពុងតែដាក់ការប្រមូលសំរាមនេះ ស្ថិតនៅក្នុងអន្តរកាលព្រោះថា ក្រុមហ៊ុនចាស់ពុំអាចទទួលការងារនេះបានទៀតទេ ដោយសារទីក្រុងភ្នំពេញមានការរីកធំពីប្រមាណ ៣០០ គីឡូម៉ែត្រការ៉េ ទៅ ៦០០ គីឡូម៉ែត្រការ៉េ។
លោកបន្តថា៖ «នៅពេលដ៏ខ្លីខាងមុខនេះ ស្ថាប័នទាំង ២ គឺសាលារាជធានីភ្នំពេញ និងក្រសួងសេដ្ឋកិច្ច និងហិរញ្ញវត្ថុនឹងដាក់ឲ្យដេញថ្លៃ ដូច្នេះក្រុមហ៊ុនជប៉ុនដែលមានចំណាប់អារម្មណ៍ គប្បីចូលដេញថ្លៃ ដើម្បីជួយដល់ការប្រមូលសំរាមនេះ»។
បើតាមការបង្ហោះនៅលើហ្វេសប៊ុករបស់លោក ហ៊ុន សែន លោក មីកាមី ម៉ាសាហ៊ីរ៉ូ បានលើកឡើងថា ជប៉ុនកំពុងតែយកចិត្តទុកដាក់បន្ថែមទៀតជាមួយអាជ្ញាធររាជធានីភ្នំពេញលើបញ្ហាសំរាម ដែលត្រូវបានចាត់ទុកជាកត្តាចាំបាច់ស្របពេលដែលប្រទេសជប៉ុនមានក្រុមហ៊ុនមួយចំនួនចង់ចូលរួមដេញថ្លៃការប្រមូលសំរាមនឹងមានការចាប់អារម្មរណ៍ក្នុងការមកវិនិយោគនៅក្នុងប្រទេសកម្ពុជា។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានលើកឡើងថា ករណីនៃការប្រមូលសំរាមក្នុងរាជធានីភ្នំពេញជាមួយក្រុមហ៊ុនស៊ីនទ្រីនេះគឺជារឿងមួយដែលរ៉ាំរ៉ៃជាយូរឆ្នាំមកហើយ ដែលលោករំពឹងថា វិធានការនេះគឺជាការបើកទំព័រមួយថ្មីដែលសាលារាជធានីភ្នំពេញគួរតែបើកឱកាសឲ្យក្រុមហ៊ុនផ្សេងៗដទៃទៀតទទួលបានការប្រកួតប្រជែងដោយតម្លាភាពតាំងពីដំណាក់កាលនីតិវិធីការដាក់ដេញថ្លៃ។
លោកបានបញ្ជាក់ថា៖ «នេះក៏គួរតែជាការបិទបញ្ចប់នៃការដាក់ដេញថ្លៃដែលមានការស៊ុមគ្រលុំពាក្យចចាមអារ៉ាម មិនអស់មិនហើយដែលយើងចង់ឃើញការចាប់ផ្តើមពីពេលនេះតទៅជាមួយនឹងការដោះស្រាយនូវការយឺតយ៉ាវ និងតួអង្គអ្នកប្រមូលសំរាមឲ្យមានប្រសិទ្ធភាព»។
បើតាមរបាយការណ៍របស់ក្រសួងបរិស្ថានដែលបានផ្សព្វផ្សាយកាលពីចុងឆ្នាំមុនបានឲ្យដឹងថា បរិមាណសំរាមសរុបដែលបានបង្កើតឡើងនៅកម្ពុជាក្នុង ១ ថ្ងៃៗមានជាង ១ ម៉ឺនតោនដែលបើគិតសរុបគឺស្មើនឹងជិត ៤ លានតោនក្នុង ១ ឆ្នាំ។
សំរាមទាំងនោះ ៦៥ ភាគរយជាសំណល់សរីរាង្គ ២០ ភាគរយជាសំណល់ថង់ប្លាស្ទិក និងនៅសេសសល់គឺជាសំណល់រឹង និងសំណល់ផ្សេងទៀត ខណៈដែលគិតសម្រាប់តែរាជធានីភ្នំពេញក្នុង ១ ថ្ងៃ សំរាមត្រូវបានបង្កើតឡើងប្រមាណជា ៣ ពាន់តោន៕
