ភ្នំពេញៈសាលារាជធានីភ្នំពេញ បានចេញសេចក្តីជូនដំណឹង ដល់ប្រជាពលរដ្ឋទាំងអស់ នៅក្នុងរាជធានីភ្នំពេញដោយបានបដិសេធនូវពាក្យចចាមអារ៉ាម ដែលបំផុសបំផុលប្រជាពលរដ្ឋ ឲ្យធ្វើអត្តសញ្ញាណប័ណ្ណឲ្យបានមុនការបោះឆ្នោត ពីព្រោះបើធ្វើនៅក្រោយថ្ងៃបោះឆ្នោត នឹងត្រូវគិតថ្លៃសេវា។
តាមរយៈសេចក្តីជូនដំណឹង នៅលើទំព័រហ្វេសប៊ុក របស់សាលារាជធានីភ្នំពេញ កាលពីថ្ងៃពុធ បានលើកឡើងថា៖«មានបុគ្គលមួយក្រុមតូច បានដើរផ្សព្វផ្សាយតាមមូលដ្ឋាន បំផុសបំផុល អោយប្រជាពលរដ្ឋប្រញ៉ាប់ប្រញ៉ាល់ធ្វើអត្តសញ្ញាណប័ណ្ណ អោយបានមុនពេលបោះឆ្នោត ដោយបំភ្លៃថា ក្រោយការបោះឆ្នោតជ្រើសតាំងតំណាងរាស្ត្រអាណត្តិទី ៦ នៅថ្ងៃទី ២៩ ខែកក្កដា ឆ្នាំ ២០១៨ ការធ្វើអត្តសញ្ញាណប័ណ្ណនឹងត្រូវគិតថ្លៃសេវា»។
ការជូនដំណឹងនោះ មិនបានបញ្ជាក់ថា ក្រុមមួយណា ដែលត្រូវទទួលខុសត្រូវ អំពីការបំផុសបំផុលព័ត៌មាននេះទេ។ ចំណែកឯអភិបាលរាជធានីភ្នំពេញ លោកឃួង ស្រេង បានថ្លែងថា លោកមិនអាចប្រាប់បានទេថាអ្នកណាជាអ្នកដែលនៅពីក្រោយការបង្កើតពាក្យចចាមអារ៉ាមនេះ ប៉ុន្តែលោកថា អាជ្ញាធរ ពាក់ព័ន្ធត្រូវបានណែនាំឱ្យចាប់ខ្លួនបុគ្គលណា ដែលបានប្រព្រត្តិកំហុសបែបនេះ។
លោកថ្លែងថា៖«នេះគឺជាទង្វើមួយ ដែលអាចចោទប្រកាន់ពួកគេ តាមផ្លូវច្បាប់បាន។ យើងមិនអាចប្រាប់ថាមានចំនួនប៉ុន្មាននាក់ទេ ពីព្រោះវាជារឿងសម្ងាត់របស់អាជ្ញាធរ»។
លោកស្រេង បានបន្ថែមទៀតថា រដ្ឋាភិបាល បានបញ្ជាក់ច្បាស់ហើយថា ការធ្វើឯកសារសំខាន់ៗ ដូចជាអត្តសញ្ញាណប័ណ្ណ និងសំបុត្រកំណើត ឬសំបុត្រអាពាហ៍ពិពាហ៍ គឺត្រូវធ្វើដោយឥតគិតថ្លៃ ជូនដល់ប្រជាពលរដ្ឋហើយមិនមានការផ្លាស់ប្តូរនៅក្នុងគោលនយោបាយនេះទេ។
ខណៈដែលការធ្វើអត្តសញ្ញាណប័ណ្ណនេះ ត្រូវបានធ្វើជូនដោយឥតគិតថ្លៃនោះ ក៏ធ្លាប់មានការត្អូញត្អែរថា មន្ត្រីមូលដ្ឋានបានគិតថ្លៃសេវាក្រៅផ្លូវការ ឬពន្យារពេលចេញឯកសារនោះ ដល់ប្រជាពលរដ្ឋផងដែរ។
លោក ប្រុក ម៉ៃឧត្តម អគ្គនាយករង នៃអគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានថ្លែងថា៖«មនុស្សមានគំនិតអាក្រក់ បានផ្សព្វផ្សាយព័ត៌មានមិនពិតទាំងនេះ ប៉ុន្តែទោះជាយ៉ាងណា មិនមានការកើនឡើងនៃការធ្វើអត្តសញ្ញាណប័ណ្ណទេ»។
លោកបានមានប្រសាសន៍ថា៖«បច្ចុប្បន្នលំហូរប្រជាពលរដ្ឋ មកធ្វើអត្តសញ្ញាណប័ណ្ណ គឺដូចគ្នានឹងថ្ងៃធម្មតាដែរ»៕ NS