.jpg)
រថយន្តធុនធំដឹកដី ដឹកខ្សាច់តាមផ្លូវ ៦០ ម៉ែត្រពីម្សិលមិញ។ ហ៊ាន រង្សី
ភ្នំពេញៈ សាលារាជធានីភ្នំពេញនឹងផ្អាកជាបណ្តោះអាសន្នមិនឲ្យរថយន្តធុនធ្ងន់ធ្វើចរាចរណ៍តាមបណ្តោយផ្លូវ ៦០ ម៉ែត្រ បន្ទាប់ពីមើលឃើញថា រថយន្តធុនធំដែលដឹកដីដឹកខ្សាច់ទាំងនេះបានបង្កឲ្យកើតមានគ្រោះថ្នាក់ចរាចរណ៍បណ្តាលឲ្យមនុស្សស្លាប់ និងរងរបួសជាញឹកញាប់។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានប្រាប់ភ្នំពេញប៉ុស្តិ៍ កាលពីអង្គារថា វិធានការនេះត្រូវបានដាក់ឡើងនៅក្នុងអង្គប្រជុំក្រុមការងារមួយដែលដឹកនាំដោយលោក ឃួង ស្រេង អភិបាលរាជធានីភ្នំពេញ កាលពីពេលថ្មីៗនេះ។
លោកបន្តថា ការដែលរដ្ឋបាលរាជធានីសម្រេចដូច្នេះ ព្រោះតែសង្កេតឃើញថា រថយន្តធុនធ្ងន់ទាំងនេះតែងតែបង្កគ្រោះថ្នាក់ចរាចរណ៍ជាញឹកញាប់នៅលើផ្លូវ ៦០ ម៉ែត្រហើយថែមទាំងបើកបរគ្មានសណ្តាប់ធ្នាប់ទៀត។
លោកបញ្ជាក់ថា៖ «ដោយសារតែមើលឃើញពីកង្វះខាតពីម្ចាស់រថយន្ត ឬតៃកុងឡាន (ធំ) ឧទាហរណ៍ថា តៃកុងឡានដែលគាត់បើកបរឲ្យក្រុមហ៊ុននេះ ដូច្នេះយើងមិនអាចបន្ទោសថា ក្រុមហ៊ុនខុសទេ។ តៃកុងឡាន គាត់បើកលឿន គាត់បើកដោយគ្មានការប្រុងប្រយ័ត្ន ហើយច្រើនតែមានបង្កជាគ្រោះថ្នាក់ផ្សេងៗ និងបញ្ហាអសកម្មមួយចំនួនទៀត។ ដូច្នេះទើបយើងត្រូវតែធ្វើអ្វីម្យ៉ាង ដើម្បីទប់ស្កាត់បញ្ហាទាំងនេះឲ្យមានរបៀបរៀបរយក្នុងការដឹកជញ្ជូន»។
លោក ម៉េត មាសភក្តី លើកឡើងថា កន្លងមកឡានធំៗដឹកដី និងដឹកខ្សាច់តាមបណ្តោយផ្លូវ ៦០ ម៉ែត្រហាក់មិនបានគោរពតាមការណែនាំរបស់សាលារាជធានីភ្នំពេញឲ្យបានល្អនោះទេ ដោយតែងតែបង្កការរំខាន ដូចជាបង្កឲ្យមានការស្ទះចរាចរណ៍ ការមិនគ្របរថយន្តដែលនាំឲ្យហុយដីធ្លាក់ដី ឬភក់រប៉ាត់រប៉ាយធ្វើឲ្យរំខានដល់អ្នកដំណើរតាមផ្លូវ និងធ្វើឲ្យខូចសោភណភាពផ្លូវជាដើម។
លោក ឌី រ័ត្នខេមរុណ អភិបាលរងខណ្ឌមានជ័យប្រាប់ភ្នំពេញ-ប៉ុស្តិ៍ពីម្សិលមិញថា ការផ្អាកមិនឲ្យមានរថយន្តធុនធំចរាចរនៅតាមបណ្តោយផ្លូវ ៦០ ម៉ែត្រ គឺសំដៅតែទៅលើរថយន្តដឹកខ្សាច់ និងដឹកដីសម្រាប់ការដ្ឋានក្នុងតំបន់នេះប៉ុណ្ណោះ ចំពោះរថយន្តទូទៅនៅតែអាចចរាចរបានជាប្រក្រតី។
លោកបន្តថា វិធានការនេះនឹងចាប់ផ្តើមអនុវត្តចាប់ពីខែសីហាទៅ។ «ផ្អាកបណ្តោះអាសន្នមិនឲ្យធ្វើចរាចរណ៍ដោយទុករយៈពេល ១ ខែសម្រាប់ការដ្ឋាននៅលើផ្លូវ ៦០ ម៉ែត្រនេះ ដើម្បីឲ្យរៀបចំផ្លាស់ប្តូរការដឹកជញ្ជូនជាឡានធំៗ មកជាការបូមតាមបំពង់ទុយោវិញ។ ការទុកពេលឲ្យ ១ ខែនេះគឺយើងមើលឃើញថា ក្រុមហ៊ុនអភិវឌ្ឍន៍ទាំងនេះនឹងអាចធ្វើបាន បើមិនបាន យើងមើលទៅតាមជាក់ស្តែង»។
លោក ម៉េង វិមានតារ៉ា អធិការខណ្ឌមានជ័យប្រាប់ភ្នំពេញ-ប៉ុស្តិ៍ថាក្នុងរយៈពេល ៥ ខែកន្លងទៅនេះមានករណីគ្រោះថ្នាក់ចរាចរណ៍នៅតាមបណ្តោយផ្លូវ ៦០ ម៉ែត្របណ្តាលឲ្យស្លាប់មនុស្សចំនួន ៥ នាក់ របួសធ្ងន់ ៧ នាក់ និងស្រាល ២ នាក់។
លោកថា ភាគច្រើនគ្រោះថ្នាក់ចរាចរណ៍នៅលើផ្លូវ ៦០ ម៉ែត្រនេះគឺពិតជាបានបង្កឡើងដោយរថយន្តធុនធំ។ «ព្រោះយើងដឹងហើយ ឡានធំបើកបរនៅក្នុងតំបន់ដែលកំពុងអភិវឌ្ឍន៍ហ្នឹងគឺច្រើនស្អេកស្កះណាស់ ដឹកដី ដឹកខ្សាច់ក្នុងខែភ្លៀង វាហូរតាមហ្នឹង ដែលសុទ្ធតែជាកត្តាធ្វើឲ្យមានគ្រោះថ្នាក់ចរាចរណ៍។ បើសិនជាថ្នាក់ដឹកនាំគាត់ គិតគូរដល់បញ្ហា វាជារឿងល្អ ហើយគ្រោះថ្នាក់ក៏អាចកាត់បន្ថយបាន ព្រោះផ្លូវនេះធំ ហើយការបើកបរច្រើនតែលឿន»៕
វីដេអូ៖
