ភ្នំពេញៈ រដ្ឋបាលរាជធានីភ្នំពេញបានអំពាវនាវជាថ្មីទៀតទៅដល់កម្មករនិយោជិតរបស់ក្រុមហ៊ុន ស៊ីនទ្រី ឱ្យចូលធ្វើការវិញ ដោយបញ្ឈប់ការធ្វើកូដកម្មខុសច្បាប់បន្តទៀតដែលនាំឱ្យបាត់បង់នូវប្រាក់អត្ថប្រយោជន៍នានា ដែលច្បាប់បានកំណត់។
សាលារាជធានីភ្នំពេញបានចេញសេចក្តីជូនដំណឹងស្តីពីការធ្វើកូដកម្មរបស់កម្មករនិយោជិតក្រុមហ៊ុនស៊ីនទ្រីកាលពីថ្ងៃម្សិលមិញ ដោយបានលើកឡើងថា កម្មករផ្នែកបើកបរ និងផ្នែកប្រមូលសំរាមរបស់ក្រុមហ៊ុនស៊ីនទ្រីនៅតែបន្តធ្វើកូដកម្មខុសច្បាប់មិនចេញប្រមូលសំរាមនៅឡើយ លើកលែងតែកម្មករផ្នែកបោសសម្អាតផ្លូវប៉ុណ្ណោះ ដែលបានចូលធ្វើការវិញកាលពីថ្ងៃទី ១០ ខែតុលា ឆ្នាំ ២០២០។
សេចក្តីជូនដំណឹងបានបន្តថា៖ «ក្នុងករណីបងប្អូនចូលបម្រើការងារវិញ រដ្ឋបាលរាជធានីភ្នំពេញនៅតែបន្តធានាដដែលនូវខ្លឹមសារដែលមាននៅក្នុងកំណត់ហេតុអង្គប្រជុំកាលពីថ្ងៃទី ៧ ខែតុលា ឆ្នាំ ២០២០ កន្លងមក»។
ដើម្បីដោះស្រាយបញ្ហានេះ រដ្ឋបាលរាជធានីភ្នំពេញបាននិងកំពុងចាត់វិធានការដោយប្រើប្រាស់កម្លាំងអាជ្ញាធរតាមខណ្ឌនីមួយៗ និងមធ្យោបាយផ្សេងៗជាបន្តបន្ទាប់ដើម្បីប្រមូលសំរាមដែលមានការកកស្ទះនៅរាជធានីភ្នំពេញឱ្យអស់ពីសមត្ថភាព និងលទ្ធភាពដែលមាន។
ជាមួយគ្នានេះដែរ លោក ឃួង ស្រេង អភិបាលរាជធានីភ្នំពេញបានថ្លែងកាលពីថ្ងៃទី ៩ ខែតុលាដោយបានផ្តាំផ្ញើទៅកាន់កម្មករប្រមូលសំរាមក្រុមហ៊ុនស៊ីនទ្រី ដែលភាគច្រើននៅបន្តធ្វើការតវ៉ាថា សាលាក្រុងអាចគ្រប់គ្រងក្នុងការប្រមូលសំរាមបានបើទោះបីជាអ្នកប្រមូលសំរាមថ្មីទាំងនេះ មិនមានបទពិសោធក្នុងការបំពេញការងារនេះយ៉ាងណាក៏ដោយ។
លោកថ្លែងថា នៅថ្ងៃដំបូងដែលកម្លាំងនៃសាលារាជធានីភ្នំពេញចេញធ្វើការប្រមូល និងដឹកសំរាមបានតែប្រមាណ ៣០០ តោនប៉ុណ្ណោះ ដោយសារកម្លាំងទាំងនេះ សុទ្ធតែអ្នកថ្មី ពួកគាត់មិនមានជំនាញក្នុងការបើកបររថយន្តដឹកសំរាមឡើងទៅចាក់នៅទីលានចាក់សំរាម ដែលខ្ពស់ហើយរអិល។
លោកអភិបាលក្រុងបន្ថែមថា៖ «ជាមធ្យមសំរាមក្នុងរាជធានីភ្នំពេញមានចំនួនជាង ២ ៨៨៥ តោនក្នុង ១ ថ្ងៃ ហើយអ្នកប្រមូល និងដឹកសំរាមបានរហូតដល់ ២០០០ តោននៅថ្ងៃបន្តបន្ទាប់។ ដូចនេះខ្ញុំលែងសូវមានការបារម្ភទៀតហើយហើយនៅតាមខណ្ឌទាំង ១៤ និង ១០៥ សង្កាត់ក្នុងក្រុងភ្នំពេញក៏មានអ្នកចូលរួមប្រមូលសំរាមយ៉ាងសស្រោកសស្រាំ ដោយសារពួកគាត់មានការយល់ពីបញ្ហាបរិស្ថាននៅក្នុងទីក្រុង»។
កាលពីប្រមាណជា ៣ ខែមុនសាលារាជធានីភ្នំពេញបានផ្តល់ម៉ូតូបែនដែលផលិតនៅប្រទេសចិនទៅ ១០៥ សង្កាត់ទូទាំង ១៤ ខណ្ឌ ក្នុងរាជធានីភ្នំពេញ ដែល ១ សង្កាត់ទទួលបាន ២ ម៉ូតូបែន សម្រាប់ត្រៀមបង្ការក្នុងការប្រមូលសំរាមនៅតាមផ្លូវតូចៗ។ ការផ្តល់ម៉ូតូនេះ ដោយសារលោក ឃួង ស្រេង ដឹងមុនថា ថ្ងៃណា ១ កម្មករប្រមូលសំរាមនឹងធ្វើការតវ៉ាដែលលោកត្រូវតែត្រៀមការពារជាមុនរួចជាស្រេច។ នេះបើតាមការលើកឡើងរបស់លោកអភិបាលក្រុង។
ជាមួយគ្នានេះកាលពីថ្ងៃទី ១១ ខែតុលា សាលារាជធានីបានទទួលរថយន្តដឹកសំរាមចំនួន ៦ គ្រឿងដែលជាអំណោយរបស់ទីក្រុង Osaka ប្រទេសជប៉ុន តាមរយៈលោក អ៊ឹង រចនា ឯកអគ្គរាជទូតព្រះរាជាណាចក្រកម្ពុជាប្រចាំប្រទេសជប៉ុន និងស្ថានទូតជប៉ុនប្រចាំកម្ពុជា។
រដ្ឋបាលរាជធានីភ្នំពេញសរសេរលើបណ្តាញសង្គមរបស់ខ្លួនថា៖ «រដ្ឋបាលរាជធានីភ្នំពេញបានទទួលអំណោយពីមិត្តជប៉ុន នូវរថយន្តដឹកសំរាមចំនួន ៦ គ្រឿង ដើម្បីបន្ថែមលើប្រតិបត្តិការដែលកំពុងតែមមាញឹក។ រដ្ឋបាលរាជធានីភ្នំពេញសូមថ្លែងនូវអំណរគុណយ៉ាងជ្រាលជ្រៅដល់មិត្តជប៉ុនដែលបានផ្ដល់អំណោយទាំងនេះ»។
លោក ម៉ី ផាន អគ្គលេខាធិការនៃសហជីពវិស័យទេសចរណ៍នៃក្រុមហ៊ុនស៊ីនទ្រី ប្រាប់ភ្នំពេញ-ប៉ុស្តិ៍ថា កម្មករនៅតែប្រកាន់ជំហរមិនចូលធ្វើការងារវិញទេ ទោះបីជាសាលាក្រុងអំពាវនាវជាលើកទី ២ ក៏ដោយ។
លោកថ្លែងថា៖ «កម្មករនៅតែទាមទារឱ្យក្រុមហ៊ុនផ្តល់សំណងចំនួន ២ ចំណុច គឺប្រាក់អតីតភាពការងារ និងប្រាក់ដំណាច់ឆ្នាំ ដោយកំណត់នូវថ្ងៃជាក់លាក់បើកជូនពួកគាត់»។ លោក ម៉ី ផាន បញ្ជាក់ថា កម្មករធ្វើការទាមទារ ៥ ចំណុច ប៉ុន្តែមកដល់ពេលនេះពួកគាត់ទាមទារសុំតែ ២ ចំណុចវិញទេបើក្រុមហ៊ុនព្រម កម្មករនឹងចូលធ្វើការវិញ។
លោក ទូច កុសល ប្រធានសហព័ន្ធសហជីពកម្មករនិយោជិកវិស័យទេសចរណ៍កម្ពុជាឱ្យដឹងថា កម្មករប្រមូលសំរាមនៅតែបន្តធ្វើការតវ៉ាដដែលកាលពីម្សិលមិញ ហើយលោកក៏បានស្នើសុំឱ្យកម្មករទាំងអស់ចូលធ្វើការវិញផងដែរ។
លោកបញ្ជាក់ថា៖ «ខ្ញុំក៏ស្នើសុំទៅអភិបាលក្រុងភ្នំពេញដោយធ្វើយ៉ាងណាគោរពទៅតាមអ្វីដែលបានជជែកគ្នាក្នុងកំណត់ហេតុ។ ចំពោះរឿងដែលកម្មករកើតទុក្ខមិនសុខចិត្ត ហើយបន្តការតវ៉ាទៀតនោះគឺជាសិទ្ធិរបស់ពួកគាត់»។
យោងតាមកំណត់ហេតុប្រជុំស្តីពីការសម្របសម្រួលដោះស្រាយករណីកូដកម្មរបស់កម្មករក្រុមហ៊ុន ស៊ីន ទ្រី កាលពីថ្ងៃទី ៧ ខែតុលា បានសម្រេចថា ចំពោះសំណើរបស់កម្មករទាមទារឱ្យក្រុមហ៊ុនដោះស្រាយពេលបញ្ចប់កិច្ចសន្យាក្រុមហ៊ុនទទួលដោះស្រាយតាមច្បាប់ស្តីពីការងារ ហើយរដ្ឋបាលរាជធានីជាអ្នកទទួលខុសត្រូវ។ ចំពោះការងាររបស់កម្មករនិយោជិកទៅថ្ងៃខាងមុខ រដ្ឋបាលរាជធានីភ្នំពេញធានាមិនឱ្យបាត់បង់ឡើយ ទោះបីក្រុមហ៊ុនស៊ីនទ្រីដេញថ្លៃជាប់ ឬមិនជាប់ក៏ដោយ៕
វីដេអូ៖