ភ្នំពេញ៖ សាលារាជធានីភ្នំពេញបានអនុញ្ញាតឲ្យទីតាំងចំនួន ២៣ កន្លែង ដែលធ្លាប់ជាប់ពាក់ព័ន្ធជាមួយនឹងអ្នកឆ្លងកូវីដ ១៩ បើកដំណើរការឡើងវិញ នៅថ្ងៃអង្គារទី ០៩ ខែមីនា ឆ្នាំ ២០២១ នេះ បន្ទាប់ពីត្រូវបានផ្អាកដំណើរការមួយរយៈ ខណៈក្រសួងសុខាភិបាល បានរកឃើញអ្នកវិជ្ជមានកូវីដ ១៩ ចំនួន ៤៩ នាក់បន្ថែមទៀត ដោយក្នុងនោះអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ មានចំនួន ៤៨ នាក់។
ក្រសួងសុខាភិបាលក៏បានប្រកាសពីការព្យាបាលជាសះស្បើយអ្នកជំងឺកូវីដ ១៩ ចំនួន ២១ នាក់ផងដែរ ដោយក្នុងចំណោមនោះ មានអ្នកជំងឺ ២០ នាក់ ជាអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ។
ជាមួយគ្នានេះ រដ្ឋបាលរាជធានីភ្នំពេញបានចេញសេចក្តីជូនដំណឹងមួយថា ទីតាំងអាជីវកម្មចំនួន ២៣ កន្លែង ត្រូវបានសម្រេចអនុញ្ញាតឲ្យបើកដំណើរការឡើងវិញ ប៉ុន្តែទីតាំងទាំងនេះ ត្រូវគោរពតាមលក្ខខណ្ឌនិងវិធានសុខាភិបាល។
លិខិតនេះលើកឡើងថា៖ «រដ្ឋបាលខណ្ឌ ត្រូវធ្វើកំណត់ហេតុជាមួយម្ចាស់ទីតាំង ដោយត្រូវណែនាំឲ្យគោរពតាមលក្ខខណ្ឌមួយចំនួនដូចជា គោរពវិធាន ៣ កុំ ៣ ការពារ, អនុវត្តវិធានរបស់ក្រសួងសុខាភិបាល និងត្រូវសហការជាមួយអាជ្ញាធរមានសមត្ថកិច្ចគ្រប់ពេលវេលា ដោយឥតលក្ខខណ្ឌ ដើម្បីការពារ និងទប់ស្កាត់ការរីករាលដាលមេរោគកូវីដ ១៩»។
ចំណែកក្រសួងសុខាភិបាលបានប្រកាសរកឃើញអ្នកឆ្លងជំងឺកូវីដ ១៩ ចំនួន ៤៩ នាក់ ក្នុងនោះអ្នកដែលបានឆ្លងថ្មីក្នុងព្រឹត្តិការណ៍សហគមន៍ ២០ កុម្ភៈ មានចំនួន ៤៨ នាក់ ដែលធ្វើឱ្យចំនួនសរុបនៃអ្នកឆ្លងក្នុងព្រឹត្តិការណ៍សហគមន៍នេះមានចំនួនរហូតទៅដល់ ៥៤៩ នាក់។
អ្នកជំងឺដែលបានឆ្លងក្នុងព្រឹត្តិការណ៍សហគមន៍ទាំងនោះ មានជនជាតិខ្មែរចំនួន ១៩ នាក់ ជនជាតិចិនចំនួន ២៨ នាក់ និងជនជាតិឥណ្ឌូនេស៊ីចំនួន ០១ នាក់។
គិតត្រឹមថ្ងៃអង្គារនេះ កម្ពុជាមានអ្នកមានវីរុសកូវីដ ១៩ ចំនួន ១ ០៦០ នាក់ ក្នុងនោះអ្នកដែលបានព្យាបាលជាសះស្បើយមានចំនួន ៥៣៨ នាក់ និងអ្នកដែលកំពុងសម្រាកព្យាបាលក្នុងមន្ទីរពេទ្យមានចំនួន ៥២១ នាក់៕