ភ្នំពេញៈ សាលារាជធានីភ្នំពេញបានអនុញ្ញាតឲ្យក្រុមគ្រូបង្រៀនរៀបចំប្រារព្ធទិវាគ្រូបង្រៀនពិភពលោកនៅដើមខែក្រោយជាមួយនឹងការព្រមានឲ្យទទួលខុសត្រូវចំពោះមុខច្បាប់ បើសិនជាមានបាតុភាពមិនប្រក្រតីណាមួយកើតឡើង និងមិនត្រូវអនុញ្ញាតឲ្យមន្ត្រីជាន់ខ្ពស់នៃអតីតគណបក្សសង្គ្រោះជាតិដែលត្រូវតុលាការកំពូលហាមធ្វើនយោបាយចូលរួមក្នុងពិធីនេះឡើយ។
កាលពីថ្ងៃចន្ទ អាជ្ញាធររាជធានីដឹកនាំដោយលោក មាន ចាន់យ៉ាដា អភិបាលរងបានជួបប្រជុំពិភាក្សាជាមួយតំណាងសមាគមគ្រូបង្រៀនកម្ពុជាឯករាជ្យដែលស្នើរៀបចំប្រារព្ធទិវាគ្រូបង្រៀនពិភពលោកក្រោមប្រធានបទ «ការលើកកម្ពស់សិទ្ធិគ្រូបង្រៀន» នៅថ្ងៃទី ៥ ខែតុលាចាប់ពីម៉ោង ៨ ព្រឹកនៅទីលានប្រជាធិបតេយ្យដោយមានអ្នកចូលរួមចន្លោះពី ១៥០ ដល់ ២០០ នាក់។
នៅក្នុងកំណត់ហេតុក្រោយអង្គប្រជុំរបស់សាលារាជធានីចុះថ្ងៃទី ២៣ ខែ កញ្ញា សរសេរថាអង្គប្រជុំបានសម្រេចឲ្យសមាគមគ្រូបង្រៀនកម្ពុជាឯករាជ្យរៀបចំប្រារព្ធទិវាគ្រូបង្រៀនពិភពលោកដោយមិនត្រូវមានការដង្ហែក្បួនតាមផ្លូវសាធារណៈទៅដាក់ញត្តិនៅក្រសួងអប់រំ យុវជន និងកីឡា និងខុទ្ទកាល័យលោក ហ៊ុន សែន នាយករដ្ឋមន្ត្រីនោះទេ។
ការដាក់ញត្តិគឺត្រូវធ្វើឡើងដោយចាត់តំណាងចំនួនពី ៨ ទៅ ១០ នាក់ ជិះរថយន្តទេសចរណ៍ធុនតូចចំនួន ២ គ្រឿង យកញត្តិទៅដាក់តាមទីតាំងខាងលើ ហើយធានាថាគ្មានការជួបជុំគ្នានៅមុខទីតាំងណាមួយឡើយ ដែលរដ្ឋបាលរាជធានីភ្នំពេញបញ្ជាក់ថាតំណាងសាលារាជធានីនឹងសម្របសម្រួលជាមួយស្ថាប័នទាំង ២ ដើម្បីមករង់ចាំទទួលញត្តិ។
បន្ថែមពីនេះសាលារាជធានីបានសង្កត់ធ្ងន់ថា ក្នុងករណីអ្នកចូលរួមពិធីមានចំនួនលើសពីការស្នើសុំរហូតដល់ ៣០០ នាក់ ឡើងទៅអាជ្ញាធរមានសមត្ថកិច្ចនឹងជួបជាមួយម្ចាស់សំណើពិភាក្សាលើការប្រព្រឹត្តទៅនៃដំណើរការរៀបចំពិធី ហើយចំពោះកិច្ចការពារសន្តិសុខ សុវត្ថិភាពផ្ទៃក្នុងនៃការរៀបចំពិធី អ្នករៀបចំជាអ្នកទទួលខុសត្រូវទាំងស្រុង ចំណែកសមត្ថកិច្ចទទួលខុសត្រូវការពារពីខាងក្រៅ ហើយក្នុងករណីមានជនសង្ស័យត្រូវរាយការណ៍ជូនសមត្ថកិច្ច ដើម្បីចាត់វិធានការឲ្យបានទាន់ពេលវេលា។
កំណត់ហេតុបញ្ជាក់ថា៖ «(សមាគមត្រូវ) ផ្សព្វផ្សាយក្រមសីលធម៌ដល់សមាជិកចូលរួម ដើម្បីកុំឱ្យយកវេទិកានេះធ្វើសកម្មភាពវាយប្រហារដល់ព្រះមហាក្សត្រ ឥស្សរជនជាន់ខ្ពស់ក្នុងរាជរដ្ឋាភិបាល ប្រទេសជិតខាង ឬបំផុសញុះញង់ប្រជាពលរដ្ឋឱ្យកើតជាអំពើហិង្សាផ្ទុយពីខ្លឹមសារ និងគោលបំណងនៃការរៀបចំពិធីនេះ ឬបំបែកបំបាក់សាមគ្គីភាពជាតិ ឬប្រើសារនយោបាយ និងប្រាសចាកពីរដ្ឋធម្មនុញ្ញនៃព្រះរាជាណាចក្រកម្ពុជា»។
ក្រៅពីការណែនាំនេះអាជ្ញាធររាជធានីតម្រូវឲ្យសមាគមត្រូវពិនិត្យ និងទទួលខុសត្រូវលើខ្លឹមសារបដារបស់ខ្លួន និងហាមមិនឱ្យមានការចូលរួមពិធីពីមន្ត្រីជាន់ខ្ពស់នៃអតីតគណបក្សសង្គ្រោះជាតិដែលត្រូវបានតុលាការកំពូលហាមធ្វើនយោបាយ ហើយក្នុងករណីសមាគមមិនគោរពតាមខ្លឹមសារដែលបានឯកភាពគ្នានេះ តំណាងសមាគមត្រូវទទួលខុសត្រូវចំពោះមុខច្បាប់ជាធរមាន។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យបានប្រាប់ភ្នំពេញប៉ុស្តិ៍ពីម្សិលមិញថា ការអនុញ្ញាតនេះមានលក្ខណៈរឹតត្បិត ប៉ុន្តែយ៉ាងណា វាមានលក្ខណៈល្អប្រសើរ ព្រោះថាការសម្រេចរបស់អាជ្ញាធរលើកនេះខុសពីលើកមុនៗដែលតែងតែបដិសេធរាល់ការស្នើសុំរបស់សហគមន៍។
ប៉ុន្តែទោះយ៉ាងណាលោកស្រី នៅតែទទូចឲ្យអាជ្ញាធរបន្តផ្តល់សិទ្ធិសេរីភាព ដែលមានចែងក្នុងច្បាប់ និងគោរពឲ្យបានពេញលេញសម្រាប់សេរីភាពទាំងនេះនៅក្នុងថ្ងៃប្រារព្ធទិវាគ្រូបង្រៀនពិភពលោកក្នុងពេលខាងមុខ ដោយលោកស្រីសង្កត់ធ្ងន់ថា បើក្នុងថ្ងៃប្រារព្ធទិវានោះមានភាពមិនប្រក្រតីណាកើតឡើង នោះគឺជាការបង្កឡើងដោយជនឆ្លៀតឱកាស។
លោកស្រីបន្តថា៖ «ទិវាគ្រូបង្រៀនពិភពលោកនេះ យើងដឹងណាស់ថា សមាសភាពចូលរួមគឺសុទ្ធតែជាមនុស្សស្លូតត្រង់ ដូច្នេះបើមានករណីមិនប្រក្រតីកើតឡើងបានន័យថា ជាពពួកដែលឆ្លៀតឱកាសហ្នឹងទេ ដែលជាអ្នកប្រព្រឹត្តសកម្មភាព។ ប៉ុន្តែឲ្យយើងមានភាពភ័យខ្លាចគឺយើងអត់ភ័យខ្លាចទេ ព្រោះអ្វីដែលយើងធ្វើ គឺធ្វើទៅតាមច្បាប់»។
បើតាមសមាគមគ្រូបង្រៀនកម្ពុជាឯករាជ្យ ការជួបជុំប្រារព្ធទិវានេះធ្វើឡើងក្នុងគោលបំណងទាមទារឱ្យរាជរដ្ឋាភិបាលត្រូវផ្តល់សម្ភារពិសោធន៍ សម្ភារឧបទ្ទេសកុំព្យូទ័រ សៀវភៅមេរៀន សម្រាប់សិស្ស និងគ្រូបង្រៀនដល់គ្រឹះស្ថានសិក្សា និងសាលារៀនគ្រប់កម្រិត និងត្រូវផ្តល់ប្រាក់ឧបត្ថម្ភបុណ្យជាតិនីមួយៗជូនគ្រូបង្រៀនបន្ថែម (បុណ្យភ្ជុំបិណ្ឌ និងបុណ្យចូលឆ្នាំ) និងស្នើឲ្យមានការដំឡើងប្រាក់ខែគោលអប្បបរមាជូនគ្រូបង្រៀនឲ្យអាចរស់នៅបានក្នុងកម្រិតជីវភាពសមរម្យ។
ជាមួយនឹងសំណើនេះលោកស្រី អ៊ុក ឆាយ៉ាវី រំពឹងថាសំណើដែលក្រុមគ្រូបង្រៀនបានស្នើឡើងនេះនឹងត្រូវបានយកចិត្តទុកដាក់ពីស្ថាប័នពាក់ព័ន្ធ ជាពិសេសប្រមុខរដ្ឋាភិបាលក្នុងការជួយលើកកម្ពស់ជីវភាពគ្រូបង្រៀន គុណភាពអប់រំនៅកម្ពុជា៕