ភ្នំពេញៈ សាលាឧទ្ធរណ៍ពីម្សិលមិញបានប្រកាសសាលដីកាជាអសាធារណៈ ដោយច្រានចោលបណ្តឹងសុំនៅក្រៅឃុំរបស់សកម្មជនអតីតគណបក្សសង្គ្រោះជាតិទាំង ១០ រូបដោយលើកហេតុផលថា ដើម្បីរក្សាជនត្រូវចោទទុកជូនតុលាការចាត់ការតាមនីតិវិធី។ នេះបើតាមលោក សំ សុគង់ មេធាវីជនត្រូវចោទទាំង ១០ នាក់។
ការប្រកាសសាលដីកានេះបានធ្វើឡើង ក្រោយពីតុលាការបានពិភាក្សាប៉ុន្មានម៉ោង បន្ទាប់ពីបើកសវនាការជំនុំជម្រះជនត្រូវចោទទាំង ១០ នាក់ ពាក់ព័ន្ធនឹងបទចោទ រួមគំនិត ក្បត់ និងញុះញង់ឲ្យមានការប្រព្រឹត្តបទឧក្រិដ្ឋជាអាទិ៍ និងបទញុះញង់មិនឲ្យយោធាស្តាប់បង្គាប់រដ្ឋាភិបាលប្រព្រឹត្តក្នុងអំឡុងខែមីនា និងខែមេសា ឆ្នាំ ២០២០។
លោកមេធាវី សំ សុគង់ បានប្រាប់ភ្នំពេញប៉ុស្តិ៍នៅក្រៅបន្ទប់សវនាការ បន្ទាប់ពីស្តាប់ការប្រកាសសាលដីកាថា ក្នុងការប្រកាសសាលដីកានោះ លោកចៅក្រម សួស សំអាត បានអានសាលដីកាថា ករណីជនត្រូវចោទទាំង ១០ នាក់ដែលបានប្តឹងទាស់សុំនៅក្រៅឃុំបណ្តោះអាសន្ននោះគឺសាលាឧទ្ធរណ៍មិនអនុញ្ញាតឲ្យពួកគេនៅក្រៅឃុំទេ ដើម្បីរក្សាពួកគេទុកជូនតុលាការចាត់ការតាមនីតិវិធី។
លោកមេធាវី ថ្លែងតាមសម្តីចៅក្រមថា៖ «តុលាការតម្កល់ដីកាសម្រេចរបស់សាលាដំបូងរាជធានីភ្នំពេញ មិនអនុញ្ញាតឲ្យជនត្រូវចោទនៅក្រៅឃុំ និងរក្សាសាលក្រមទុកជាបានការដដែល និងបង្គាប់ឲ្យឃុំខ្លួនពួកគេនៅក្នុងពន្ធនាគារបន្តទៀត»។
លោក សំ សុគង់ បានថ្លែងថាលោកនឹងជួបកូនក្តីរបស់លោក ដើម្បីពិគ្រោះយោបល់ពីការបន្តប្តឹងសារទុក្ខទៅតុលាការកំពូលទៀត។ លោកបញ្ជាក់ថា៖ «ការសម្រេចបន្តឃុំខ្លួនដល់កូនក្តីខ្ញុំទាំង ១០ រូបនេះជារឿងមួយអយុត្តិធម៌ ហើយខ្ញុំតំណាងឲ្យកូនក្តីនឹងប្តឹងទៅតុលាការកំពូល ដើម្បីឲ្យតុលាការពិនិត្យឡើងវិញ»។
ស្ត្រីជាប្រពន្ធរបស់ជនត្រូវចោទឈ្មោះ ឃឹម ភាណា ដែលជាអតីតចៅសង្កាត់ផ្សារដេប៉ូទី ៣ នៃអតីតគណបក្សសង្គ្រោះជាតិបាននិយាយនៅក្រៅបន្ទប់សវនាការថា ការដែលសាលាឧទ្ធរណ៍មិនឲ្យប្តីរបស់អ្នកស្រីនៅក្រៅឃុំ ក៏ដូចជាជនត្រូវចោទ ៩ នាក់ទៀតនេះ គឺជារឿងមួយអយុត្តិធម៌ ពីព្រោះប្តីអ្នកស្រីមិនបានធ្វើអ្វីខុសច្បាប់ទេ។
អ្នកស្រីបានបញ្ជាក់ថាតាំងពីគណបក្សសង្គ្រោះជាតិត្រូវបានរំលាយមក ប្តីរបស់អ្នកស្រីមិនបានធ្វើសកម្មភាពនយោបាយអ្វីទេ។ ប្តីរបស់អ្នកស្រីត្រូវបានសមត្ថកិច្ចចាប់ខ្លួន ក្រោយពីមានការប្រកាសរបស់លោក សម រង្ស៊ី ពីការវិលចូលប្រទេសកម្ពុជាវិញ។ អ្នកស្រីបន្តថា៖ «ខ្ញុំមានកូន ៣ នាក់ ហើយកូន ២ នាក់កំពុងរៀននៅសាកលវិទ្យាល័យ។ ប្តីខ្ញុំជាចន្ទល់ទ្រទ្រង់ក្នុងគ្រួសារ បើខ្ញុំបាត់បង់អ្នករកចំណូលផ្គត់ផ្គង់គ្រួសារដូចនេះ ខ្ញុំមិនដឹងរកពាក្យអ្វីមកនិយាយបានទេ»។
បើតាមលោក សំ សុគង់ កូនក្តីរបស់លោកទាំង ១០ នាក់ ទី១- ឈ្មោះ សុខ ចាន់ថា ទី២- ញ៉ែម វាន ទី៣- ជុំ ចាន់ ទី៤- ឃឹម ភាណា ទី៥- ឃុត ច្រឹក ទី៦- ងិន ឃាង ទី៧- ឡុង ផារី ទី៨- កែវ ថៃ ទី៩- ថៃ គន្ធា និងទី១០- យឹម សារ៉េត។ អ្នកទាំងនេះត្រូវសមត្ថកិច្ចចាប់ខ្លួននៅតាមបណ្តាខេត្តមួយចំនួន និងនៅរាជធានីភ្នំពេញក្នុងអំឡុងខែមីនា និងខែមេសា ឆ្នាំ ២០២០។
បើតាមលោក សំ សុគង់ នៅក្នុងបន្ទប់សវនាការពីម្សិលមិញ រូបលោក និងសហមេធាវី លោក ឡោ ជុនធី បានស្នើសុំឲ្យសាលាឧទ្ធរណ៍ដោះលែងកូនក្តីរបស់លោកទាំង ១០ នាក់ ឲ្យមានសេរីភាពបាននៅក្រៅឃុំជាបណ្តោះអាសន្ន ដោយមានលក្ខខណ្ឌដែលមានចែងនៅក្នុងច្បាប់។
លោក សុគង់ បានថ្លែងទៅកាន់ចៅក្រមថា៖ «កូនក្តីខ្ញុំទាំង ១០ នាក់ សុទ្ធតែមានជំងឺលើសឈាមទឹកនោមផ្អែមលើសជាតិអាស៊ីត ឈឺធ្ងន់ធ្ងរ នៅក្នុងពោះ ឬជំងឺឈឺជើងធ្ងន់ធ្ងរ ដែលត្រូវការព្យាបាលដោយគ្រូពេទ្យ។ ដូច្នេះសុំ (តុលាការឲ្យ) ពួកគេបាននៅក្រៅឃុំបណ្តោះអាសន្ន»។
លោកមេធាវី សំ សុគង់ បានឲ្យដឹងទៀតថា បន្ទាប់ពីជាប់ឃុំក្នុងពន្ធនាគារ បានប្រមាណមួយខែ កូនក្តីរបស់លោកបានពឹងពាក់លោក និងលោកមេធាវី ឡោ ជុនធី ឲ្យប្តឹងសុំនៅក្រៅឃុំបណ្តោះអាសន្ន ប៉ុន្តែត្រូវបានសាលាដំបូងរាជធានីភ្នំពេញបដិសេធ ទើបលោកប្តឹងទាស់មកសាលាឧទ្ធរណ៍៕