.jpg)
ជនជាប់ចោទជនជាតិអាហ្វ្រិកខាងត្បូង ត្រូវបានសមត្ថកិច្ចឃាត់ខ្លួនកាលពីឆ្នាំ ២០១៧។ រូបថត សហការី
ភ្នំពេញៈ សាលាឧទ្ធរណ៍ពីម្សិលមិញបានជំនុំជម្រះបុរសជនជាតិអាហ្វ្រិកខាងត្បូងម្នាក់ពាក់ព័ន្ធជួញដូរគ្រឿងញៀន កូកាអ៊ីនចំនួនជាងកន្លះគីឡូដែលបានលេបចូលក្នុងពោះនាំចូលពីប្រទេសប្រេស៊ីល ហើយត្រូវសមត្ថកិច្ចចាប់ខ្លួននៅព្រលានយន្តហោះអន្តរជាតិភ្នំពេញកាលពីខែកញ្ញា ឆ្នាំ ២០១៧ ដែលជនជាប់ចោទត្រូវសាលាដំបូងរាជធានីភ្នំពេញផ្តន្ទាទោស ១ ជីវិត។
នៅចំពោះមុខចៅក្រម ៣ រូប ក្នុងបន្ទប់សវនាការសាលាឧទ្ធរណ៍ពីម្សិលមិញជនជាប់ចោទឈ្មោះ Blig NAUT CHAN អាយុ ២៧ ឆ្នាំបានឆ្លើយប្រាប់ចៅក្រមតាមរយៈអ្នកបកប្រែថា គាត់បានស៊ីឈ្នួលឱ្យបុរសម្នាក់ឈ្មោះ អូ ស្ទីន ជាជនជាតិដូចគ្នាឱ្យគាត់លេបម្សៅគ្រឿងញៀនកូកាអ៊ីនចូលក្នុងពោះប្រហែល ៥០ គ្រាប់ (ម្សៅគ្រឿងញៀនញាត់ក្នុងសម្បកថ្នាំពេទ្យ)។ គាត់បានប្រើពេលអស់ ១ ម៉ោងកន្លះដើម្បីលេបគ្រាប់ថ្នាំញៀនចូលក្នុងពោះអស់។ ឈ្នួលនៃការរត់ពន្ធគ្រឿងញៀននេះគេឱ្យសេវាគាត់ ៣ ពាន់ដុល្លារ។
បន្ទាប់ពីគាត់លេបគ្រឿងញៀនចូលក្នុងពោះអស់ហើយគាត់បានចេញដំណើរពីប្រទេសប្រេស៊ីលមកប្រទេសកម្ពុជាដោយឆ្លងកាត់ទីក្រុងឌូបៃ ប៉ុន្តែគយប្រចាំនៅព្រលានយន្តហោះក្រុងឌូបៃរកមិនឃើញគ្រឿងញៀននៅក្នុងពោះរបស់គាត់ទេ។
លុះនៅយប់ថ្ងៃទី ១២ កញ្ញា ឆ្នាំ ២០១៧ គាត់បានជិះយន្តហោះមកដល់ព្រលានយន្តហោះអន្តរជាតិភ្នំពេញ។ អ្វីៗទាំងអស់គឺជាការចាត់ចែងរបស់ ឈ្មោះ អូ ស្ទីន ហើយ អូ ស្ទីន បានប្រាប់គាត់ថា នៅពេលគាត់ធ្វើដំណើរមកដល់ប្រទេសកម្ពុជាគឺគាត់ត្រូវស្នាក់នៅក្នុងសណ្ឋាគារមួយ (មិនចាំឈ្មោះ) ហើយឈ្មោះ អូ ស្ទីន នឹងណែនាំឱ្យស្ត្រីជនជាតិថៃម្នាក់មកទទួលយកថ្នាំញៀនកូកាអ៊ីននោះបន្តចូលទៅប្រទេសថៃវិញ។ តែគម្រោងនេះត្រូវបរាជ័យដោយសារតែសមត្ថកិច្ចចាប់គាត់បាន។
លោក CHAN និយាយថា៖ «ដំបូងឡើយសមត្ថកិច្ចចម្រុះនៅក្នុងព្រលានភ្នំពេញឆែកមើលវ៉ាលិសខ្ញុំដែរហើយរកមិនឃើញគ្រឿងញៀនទេ។ តែប្រហែលជាពួកគេសង្ស័យក៏ហៅខ្ញុំទៅស្កេនមើលក្នុងពោះហើយក៏ឃើញថ្នាំញៀនតែម្តង»។
ជនជាប់ចោទនិយាយថា៖ «ខ្ញុំបានដឹងជាមុនថាខ្ញុំលេបគ្រឿងញៀននេះជាអំពើខុសច្បាប់តាំងពីនៅប្រទេសប្រេស៊ីលមក។ តែខ្ញុំគ្មានលុយក៏សុខចិត្តស៊ីឈ្នួលគេទៅ។ ខ្ញុំសូមឱ្យតុលាការបន្ថយទោសខ្លះដល់ខ្ញុំ»។
លោក លឹម សុគន្ថា តំណាងមហាអយ្យការសន្និដ្ឋានថា ជនជាប់ចោទត្រូវបានសមត្ថកិច្ចព្រលានយន្តហោះអន្តរជាតិភ្នំពេញឃាត់ខ្លួនជាមួយវត្ថុតាងម្សៅក្រាមសថ្លាប្រភេទកូកាអ៊ីនជិត ៧៦០ ក្រាម។ នៅក្នុងច្បាប់ស្តីពីការត្រួតពិនិត្យគ្រឿងញៀនទោះជាមិនបានចែងពីការលាក់លេបគ្រឿងញៀនក្នុងពោះក្តីតែសកម្មភាពរបស់ជនជាប់ចោទបានបង្ហាញពីអំពើជួញដូរគ្រឿងញៀន។ ការកំណត់ក្នុងច្បាប់គ្រឿងញៀនគឺគ្រឿងញៀនដែលមានទម្ងន់ពី ៧០ ក្រាមឡើងទៅនឹងត្រូវជាប់ពន្ធនាគារពី ២០ ឆ្នាំទៅ ៣០ ឆ្នាំ ឬជាប់ពន្ធនាគារ ១ ជីវិត។
លោក នូ ចន្ថា ជាមេធាវីការពារសិទ្ធិឱ្យជនជាប់ចោទបានសន្និដ្ឋានថា កូនក្តីរបស់លោកតែងសារភាពជានិច្ច។ ក្រោយជំនុំជម្រះលោកស្រីចៅក្រម ចាន់ ម៉ាឌីណា ប្រធានក្រុមប្រឹក្សាជំនុំជម្រះបានថ្លែងបិទសវនាការថា សាលដីកានេះប្រកាសនៅថ្ងៃទី ៣ វិច្ឆិកា៕
