ភ្នំពេញៈ សាលាឧទ្ធរណ៍កាលពីម្សិលមិញបានបើកជំនុំជម្រះលើសំណុំរឿងជនជាប់ចោទ ២ នាក់ ដែលបានរំលោភហើយសម្លាប់នារីវ័យក្មេងម្នាក់នៅភូមិតាពៅ ក្រុងបាវិត ខេត្តស្វាយរៀងកាលពីឆ្នាំ ២០១៧ ហើយតុលាការខេត្តបានសម្រេចកាត់ទោសដាក់គុកជនទាំង ២ នោះអស់ ១ ជីវិត។
សវនាការបានធ្វើឡើងក្នុងរយៈពេលប្រហែលជា ១ ម៉ោង ដោយគ្រាន់តែសួរដេញដោលដោយក្រុមប្រឹក្សាជំនុំជម្រះមិនទាន់សម្រេចសាលដីកាភ្លាមៗនោះទេ។
ជនជាប់ចោទឈ្មោះ ឆើយ សុជាតិ អាយុ ៣៦ ឆ្នាំ បានប្រាប់ចៅក្រមនៅក្នុងបន្ទប់សវនាការពីម្សិលមិញថា រូបគេជាអ្នកបើករថយន្តតាក់ស៊ីពីរាជធានី-ភ្នំពេញទៅខេត្តស្វាយរៀង ហើយមុនប្រព្រឹត្តខ្លួនបានដឹកនារីរងគ្រោះឈ្មោះ សុវណ្ណ សុខដាលីន អាយុ ១៨ ឆ្នាំ ជាបុគ្គលិកកាស៊ីណូ Good Luck នៅក្រុងបាវិត ខេត្តស្វាយរៀង។
លុះរូបគេបើករថយន្តទៅដល់ទីប្រជុំជនអ្នកលឿងក៏ត្រូវឈ្មោះ ផ្លេក សូនី អាយុ ៣២ ឆ្នាំ ដែលជាអ្នកបើករថយន្តតាក់ស៊ីដូចគ្នាសួរថា មានស្រីស្អាតទេ? ហើយខ្លួនឆ្លើយតបវិញថាមាន។ ពេលនោះឈ្មោះ ផ្លេក សូនី បានប្រាប់គាត់ថានឹងបើករថយន្តទៅកាន់ក្រុងបាវិតមុន។
ជនជាប់ចោទបន្តថា ពេលគាត់បើករថយន្តដាក់ម៉ូយចុះអស់ និងបើករថយន្តដល់ផ្សារជីភូ គឺនៅសល់តែនារីរងគ្រោះម្នាក់ឯងទេដែលអង្គុយនៅកៅអីខាងក្រោយ។ ពេលនោះគាត់ត្រូវបានឈ្មោះ ផ្លេក សូនី ដែលឈរចាំនៅផ្សារជីភូបានហៅគាត់ឲ្យឈប់រថយន្ត ហើយ ផ្លេក សូនី បានឡើងជិះក្នុងរថយន្តទៅជាមួយគាត់ដែរ។ ប៉ុន្តែគាត់មិនបានបើករថយន្តទៅតាមផ្លូវជាតិសំដៅទៅក្រុងបាវិតដែលជាគោលដៅនារីរងគ្រោះត្រូវចុះនោះទេ ដោយបើកតាមផ្លូវលំ ហើយដោយសារស្ថានភាពផ្លូវរលាក់ផងនោះឈ្មោះ ផ្លេក សូនី បានចាប់នារីរងគ្រោះច្របាច់ក និងខ្ទប់មាត់រំលោភនាងនៅលើរថយន្តតែម្តង។
ជនជាប់ចោទ ឆើយ សុជាតិ និយាយថា៖ «ពេលនោះខ្ញុំប្រាប់ សូនី ដែរថា កុំឲ្យធ្វើបែបនេះតែគេមិនស្តាប់ខ្ញុំ បន្ទាប់មកខ្ញុំមានអារម្មណ៍ ក៏ឈប់ឡាន ហើយរំលោភនាងដែរ។ ពេលខ្ញុំរំលោភហើយគេជាអ្នករុញនាងទៅក្នុងទឹក និងដាក់ដុំថ្មពីលើនាង។ យ៉ាងណាខ្ញុំសុំឲ្យតុលាការបន្ថយទោសខ្ញុំ និងសុំសងតែ ៥ ពាន់ដុល្លារ»។
ជនជាប់ចោទម្នាក់ទៀតឈ្មោះ ផ្លេក សូនី បានប្រាប់ចៅក្រមពីម្សិលមិញដែរថាកាលពីថ្ងៃទី ២ សីហា ឆ្នាំ ២០១៧ គាត់ត្រូវបានថៅកែរោងចក្រកាត់ដេរជាជនជាតិចិនទូរស័ព្ទឲ្យគាត់ដឹកបុគ្គលិកជនជាតិចិន ២ នាក់មកព្រលានយន្តហោះពោធិ៍ចិនតុង។ ដល់ម៉ោងប្រហែល ១២ ថ្ងៃត្រង់គាត់បានបើករថយន្តត្រឡប់ទៅខេត្តស្វាយរៀងវិញ។ ពេលទៅដល់គាត់បានបើករថយន្តទៅផ្ទះនៅភូមិព្រៃតាញ៉យ ឃុំខ្សែត្រ ស្រុកកំពង់រោទ៍ ខេត្តស្វាយរៀង។
ពីមុនមកគាត់ធ្លាប់មានទំនាស់វាយគ្នាជាមួយឈ្មោះ ឆើយ សុជាតិ និង ជាមួយបងប្អូនរបស់គេ ២ ដងរឿងដណ្តើមម៉ូយជិះរថយន្ត។
ផ្លេក សូនី និយាយថា៖ «រឿងនេះខ្ញុំមិនបានចូលរួមប្រព្រឹត្តទេ សូមតុលាការដោះលែងខ្ញុំវិញ»។
នៅក្នុងបន្ទប់សវនាការពីម្សិលមិញអ្នកស្រី រឿន ស្រីឡូត ជាម្តាយរបស់នារីរងគ្រោះបានឡើងប្រាប់ចៅក្រមថា នៅមុនពេលកើតហេតុថ្ងៃទី ២ សីហា ឆ្នាំ ២០១៧ នោះគាត់បានទូរស័ព្ទទាក់ទងជាមួយកូនស្រីរបស់គាត់ជាប់រហូតលុះដល់ម៉ោងប្រហែល ៦ ល្ងាចគាត់ទាក់ទងទូរស័ព្ទកូនមិនចូល។ នៅថ្ងៃនោះគាត់បានទៅខេត្តស្វាយរៀងហើយដាក់ពាក្យបណ្តឹងនៅស្នងការដ្ឋាននគរបាលខេត្តស្វាយរៀង។ បន្ទាប់ពីប្តឹងបាន ២ ថ្ងៃសមត្ថកិច្ចបានរកឃើញសពកូនស្រីរបស់គាត់។
អ្នកស្រីថា៖ «ខ្ញុំមិនបានប្តឹងមកសាលាឧទ្ធរណ៍ទេ តែខ្ញុំសុំឲ្យតុលាការតម្កល់សាលក្រមរបស់សាលាដំបូងខេត្តស្វាយរៀងនៅដដែល»។
ជាមួយគ្នានេះស្ត្រីម្នាក់ឈ្មោះ យឿន ស៊ីគួន ក្នុងចំណោមសាក្សីចំនួន ៥ នាក់ ដែលចូលខ្លួនធ្វើជាសាក្សីឲ្យឈ្មោះ ផ្លេក សូនី បាននិយាយដូចគ្នាថា នៅថ្ងៃទី ២ សីហា នោះពួកគាត់បានឃើញឈ្មោះ ផ្លេក សូនី បើករថយន្តចូលដឹកតុមួយ និងកៅអីជ័រចំនួន ១០ ពីផ្ទះអ្នកស្រី។
តាមកំណត់ហេតុតុលាការបង្ហាញថាជនទាំង ២ នាក់សាលាដំបូងខេត្តស្វាយរៀងប្រកាសសាលក្រមនៅថ្ងៃទី ២៣ សីហា ឆ្នាំ ២០១៨ ផ្តន្ទាទោសជនទាំង ២ នាក់ជាប់ពន្ធនាគារ ១ ជីវិតតាមមាត្រា ២០៥ នៃក្រមព្រហ្មទណ្ឌ និងបង្គាប់រួមគ្នាសង ៦ ម៉ឺនដុល្លារ។
លោក ង៉ែត សារ៉ាត តំណាងមហាអយ្យការសន្និដ្ឋានថា ផ្អែកតាមអង្គហេតុ និងចម្លើយរបស់ឈ្មោះ ផ្លេក សូនី បានយល់ឃើញថា ករណីនេះគួរតែឈ្មោះ ឆើយ សុជាតិ ជាអ្នករំលោភនារីរងគ្រោះមុនព្រោះគាត់ជាម្ចាស់រថយន្តមិនមានឥទ្ធិពលណាហាមឈ្មោះ ផ្លេក សូនី ទេ។ លោកថា៖ «ខ្ញុំសូមក្រុមប្រឹក្សាពិចារណាលើឈ្មោះ ផ្លេក សូនី ប៉ុន្តែឈ្មោះ ឆើយ សុជាតិ ខ្ញុំតម្កល់សាលក្រមតុលាការខេត្តស្វាយរៀងដដែល»។
លោកស្រី អ៊ុក ស៊ីសាកេត មេធាវី ការពារសិទ្ធិឲ្យម្តាយនារីរងគ្រោះសន្និដ្ឋានថា ករណីនេះតាមអង្គហេតុ និងចម្លើយរបស់ជនជាប់ចោទទាំង ២ នាក់គឺស៊ីចង្វាក់គ្នានឹងសាក្សី។ ដូច្នេះស្នើតុលាការសាលាឧទ្ធរណ៍តម្កល់សាលក្រមរបស់តុលាការខេត្តស្វាយរៀងដដែល។
លោក ឈី សម្បត្តិ មេធាវីការពារសិទ្ធិឲ្យឈ្មោះ ផ្លេក សូនី សន្និដ្ឋានថាកូនក្តីរបស់លោកត្រូវបានឈ្មោះ ឆើយ សុជាតិ ឆ្លើយដាក់ហើយតុលាការបានយកចម្លើយនេះដាក់បន្ទុកលើកូនក្តីលោក។ ដូច្នេះសូមចៅក្រមសាលាឧទ្ធរណ៍ដោះលែងកូនក្តីលោកវិញផង។
លោក អ៊ាន សំអាត ជាមេធាវីការពារសិទ្ធិឲ្យឈ្មោះ ឆើយ សុជាតិ សន្និដ្ឋានថា កូនក្តីលោកបានសារភាពអស់ហើយ។ ដូច្នេះសូមតុលាការឧទ្ធរណ៍បន្ថយទោសដល់គាត់ផង។
ក្រោយជំនុំជម្រះលោក ស៊ិន វិសាល ប្រធានក្រុមប្រឹក្សាជំនុំជម្រះថ្លែងថា សាលដីកានេះប្រកាសនៅថ្ងៃទី ១៩ កុម្ភៈ ខាងមុខ៕