.jpg)
ជនជាប់ចោទ និងវត្ថុតាងគ្រឿងញៀនពេលចាប់ខ្លួន។ រូបថត សហការី
ភ្នំពេញៈ កាលពីម្សិលមិញសាលាឧទ្ធរណ៍បើកសវនាការជំនុំជម្រះឡើងវិញតាមបង្គាប់របស់តុលាការកំពូល ដើម្បីផ្ទៀងផ្ទាត់សំណុំរឿងគ្រឿងញៀនជនជាប់ចោទ ២ នាក់ ដែលត្រូវបានសម្រេចដាក់ពន្ធនាគារ ២០ ឆ្នាំ។
លោក ប្លង់ សំណាង ជាប្រធានក្រុមប្រឹក្សាជំនុំជម្រះបានអានកំណត់ហេតុនៅចំពោះមុខជនជាប់ចោទក្នុងបន្ទប់សវនាការពីម្សិលមិញថាជនជាប់ចោទក្នុងរឿងនេះមានឈ្មោះ សេន ដាយូសា ហៅ បូ ភេទប្រុស អាយុ ២៩ ឆ្នាំជាជនជាតិខ្មែរ និងឈ្មោះ យ៉ុង ចាន់ហ៊ុយយ៉ុង អាយុ ៣៨ ឆ្នាំជាជនជាតិវៀតណាម។ សំណុំរឿងនេះជាការបង្វិលមកពីតុលាការកំពូលឱ្យសាលាឧទ្ធរណ៍ជំនុំជម្រះឡើងវិញពីព្រោះតុលាការកំពូលមិនយល់ស្របតាមការសម្រេចរបស់សាលាឧទ្ធរណ៍ត្រង់ចំណុចខ្លះ។
លោក សំណាង ថ្លែងថា៖ «តុលាការកំពូលបង្គាប់ឱ្យសាលាឧទ្ធរណ៍ផ្ទៀងផ្ទាត់ម្តងទៀតព្រោះឈ្មោះ យ៉ុង ចាន់ហ៊ួយ៉ុង ឆ្លើយដាក់ជនជាប់ចោទឈ្មោះ សេន ដាយូសា ហើយតាមអង្គហេតុគឺគ្មានភ័ស្តុតាងដាក់បន្ទុកលើឈ្មោះនេះ»។
ជនជាប់ចោទឈ្មោះ សេន ដាយូសា និយាយប្រាប់ចៅក្រមសាលាឧទ្ធរណ៍កាលពីម្សិលមិញថា គាត់ស្គាល់ឈ្មោះ យ៉ុង ចាន់ហ៊ួយ៉ុង ដោយសារគាត់ទិញថ្នាំញៀនមកជក់។ ចំពោះវត្ថុតាងដែលសមត្ថកិច្ចរឹបអូសបាននៅផ្ទះ យ៉ុង ចាន់ហ៊ួយ៉ុង គឺគាត់មិនបានដឹងទេ។
ជនជាប់ចោទ សេន ដាយូសា ថ្លែងទៅកាន់អង្គសវនាការថា៖ «ខ្ញុំទទួលស្គាល់ថា ខ្ញុំប្រើប្រាស់គ្រឿងញៀនមែនតែមិនបានចូលរួមផលិតគ្រឿងញៀនទេ។ សូមតុលាការដោះលែងខ្ញុំផង»។
ដោយឡែកជនជាប់ចោទ យ៉ុង ចាន់ហ៊ួយ៉ុង និយាយប្រាប់ចៅក្រមថា ករណីផលិតគ្រឿងញៀននេះឈ្មោះ សេន ដាយូសា មិនបានរួមគំនិតទេតែពេលសមត្ថកិច្ចចាប់ សេន ដាយូសា បានឆ្លើយដាក់គាត់ដូច្នេះគាត់ក៏ខឹងទើបគាត់ឆ្លើយទម្លាក់កំហុសទៅ សេន ដាយូសា។
លោក ប៉ែន សារ៉ាត តំណាងមហាអយ្យការសន្និដ្ឋានថាសំណុំរឿងនេះជាការបង្វិលពីតុលាការកំពូលមកវិញដូច្នេះលោកទុកជូនក្រុមប្រឹក្សាធ្វើការពិចារណាតាមច្បាប់។
លោក មេធាវី នូ ចន្ថា ការពារសិទ្ធិឱ្យជនជាប់ចោទឈ្មោះ សេន ដាយូសា បានសន្និដ្ឋានតាមអង្គហេតុគឺកូនក្តីរបស់លោកគ្រាន់តែប្រើប្រាស់គ្រឿងញៀន និងទិញពីឈ្មោះ យ៉ុងចាន់ហ៊ួយ៉ុង តែប៉ុណ្ណោះ។ ករណីនេះឈ្មោះ យ៉ុង ចាន់ហ៊ួយ៉ុង បានឆ្លើយទម្លាក់កំហុសមកកូនក្តីលោកទេ។
លោកថ្លែងថា៖ «កូនក្តីខ្ញុំទទួលយកតែបទល្មើសប្រើប្រាស់គ្រឿងញៀនទេ សូមតុលាការដោះលែងគាត់ឱ្យមានសេរីភាពវិញផង»។
តាមកំណត់ហេតុរបស់សាលាឧទ្ធរណ៍បង្ហាញថាកាលពីថ្ងៃទី ៤ ខែធ្នូ ២០១៦ ប្រហែលជាម៉ោង ៣ ទៀបភ្លឺ នគរបាលខណ្ឌឫស្សីកែវបានឃាត់ខ្លួនឈ្មោះ សេន ដាយូសា ហៅ បូ ភេទប្រុស អាយុ ២៩ ឆ្នាំដោយបានដកហូតគ្រឿងញៀនចំនួន ២ កញ្ចប់ខណៈកំពុងជិះម៉ូតូតាមផ្លូវ។
ក្រោយពីឃាត់ខ្លួនឈ្មោះ សេន ដាយូសា ប្រាប់សមត្ថកិច្ចថាគ្រឿងញៀនមេតំហ្វេតាមីន ២ កញ្ចប់តូចនេះគឺគេ ទិញពីឈ្មោះ យ៉ុង ចាន់ហ៊ុយយ៉ុង ដូច្នេះសមត្ថកិច្ចបានតាមឃាត់ខ្លួន ឈ្មោះ យ៉ុង ចាន់ហ៊ួយ៉ុង ភេទប្រុស អាយុ ៣៨ ឆ្នាំ ជនជាតិវៀតណាមបានម្នាក់ទៀតនៅភូមិចំរើនផល១ សង្កាត់បឹងទំពុន ខណ្ឌមានជ័យ រាជធានីភ្នំពេញ។ ក្នុងនោះសមត្ថកិច្ចរកឃើញប្រភេទថ្នាំញៀនមួយចំនួនធំ ដូចជាសារធាតុម៉េតាណុលចំនួន ១៤ ដប, សារធាតុផ្សំ និងកែច្នៃជាសារធាតុញៀនមួយចំនួន, ម្សៅក្រាមពណ៌សថ្លា ចំនួន ២ កញ្ចប់ធំ, ថ្នាំពេទ្យសម្រាប់កែច្នៃធ្វើជាសារធាតុញៀនមួយចំនួនធំ, សារធាតុញៀនជាគ្រាប់ចំនួន ៣ កញ្ចប់ធំ, សារធាតុដែលផលិតរួចសម្រាប់ប្រើមួយចំនួន, ថ្នាំប្រភេទ ខេ (សម្រាប់ហិត), ប្រភេទថ្នាំគ្រាប់ (គ្រវី), ប្រភេទ wy (យ៉ាម៉ា), ប្រភេទថ្នាំផ្សំរួច (មេតំហ្វេតាមីនមួយចំនួន), ម្សៅកែច្នៃជាសារធាតុញៀនមួយចំនួន, ជញ្ជីងថ្លឹងថ្នាំញៀនចំនួន ១, ឧបករណ៍សម្រាប់ជក់ថ្នាំញៀនមួយចំនួនព្រមទាំងឧបករណ៍សម្រាប់កែច្នៃសារធាតុញៀនមួយចំនួនទៀត។
សំណុំរឿងនេះត្រូវបានសាលាដំបូងរាជធានីប្រកាសសាលក្រមខែមិថុនា ឆ្នាំ ២០១៧ ផ្តន្ទាទោសឈ្មោះ យ៉ុង ចាន់ហ៊ួយ៉ុង និងឈ្មោះ សេន ដាយូសា ដាក់ពន្ធនាគារម្នាក់ៗ ៣០ ឆ្នាំ។ ដោយមិនសុខចិត្តនឹងសាលក្រមនេះជនជាប់ចោទទាំង ២ នាក់ប្តឹងទាស់ទៅសាលាឧទ្ធរណ៍តែត្រូវឧទ្ធរណ៍តម្កល់ទោស ៣០ ឆ្នាំខណៈឈ្មោះ សេន ដាយូសា បន្ថយមកត្រឹម ២០ ឆ្នាំវិញ។
ក្រោយជំនុំជម្រះលោកចៅក្រម ប្លង់ សំណាង ថ្លែងថាសាលដីកានេះនឹងប្រកាសនៅថ្ងៃទី ១៩ ខែតុលា៕
