.jpg)
លោកនាយករដ្ឋមន្ត្រី ហ៊ុន សែននៅក្នុងពិធីបើកស៊ីហ្គេម។ រូប SPM
សាលាឧទ្ធរណ៍នៅថ្ងៃទី ២៩ ខែមិថុនា បានជំនុំជម្រះបុរសម្នាក់ ដែលជាប់ចោទ ពីបទចាប់រំលោភសេពសន្ថវៈក្មេងស្រីម្នាក់ ដែលប្រព្រឹត្ត នៅសង្កាត់-ក្រុង-ខេត្ត ស្វាយរៀង កាលពីឆ្នាំ ២០១៩ ដែលត្រូវបានតុលាការខេត្តផ្តន្ទាទោសដាក់ពន្ធនាគារ ១០ ឆ្នាំ។
លោក ចៅក្រម យន់ ណារ៉ុង ប្រធានក្រុមប្រឹក្សាជំនុំជម្រះ បានអានកំណត់ហេតុ របស់សាលាដំបូងខេត្តស្វាយរៀង នៅក្នុងបន្ទប់សវនាការនៅថ្ងៃទី ២៩ ខែមិថុនា ថា កាលពីថ្ងៃទី ១៥ ខែ មេសា ឆ្នាំ ២០១៩ នៅវេលាម៉ោង ៨ យប់ ក្នុងភូមិមេភ្លើង សង្កាត់ស្វាយរៀង ជនជាប់ចោទឈ្មោះ ធុន ថាវ អាយុ ១៩ ឆ្នាំ បានចាប់ក្មេងស្រីរងគ្រោះឈ្មោះ វ.ច.ន អាយុ ១៣ ឆ្នាំ នាំចូលទៅក្នុងបន្ទប់ទឹក សម្រាប់បុរស នៅរោងភាពយន្តខេត្តស្វាយរៀង រួចបិទទ្វារបន្ទប់ ហើយចាប់រំលោភនាង រហូតបានសម្រេចមួយដង ខណៈក្មេងរងគ្រោះ ទៅនោមនៅក្នុងបន្ទប់ទឹក។ ក្រោយកើតហេតុ ក្មេងស្រីរងគ្រោះ បានទៅប្រាប់ឪពុករបស់នាង ឈ្មោះ សំ សុខជា ហើយបានប្តឹងទៅ នគរបាលប៉ុស្តិ៍សង្កាត់ស្វាយរៀង ឲ្យឃាត់ខ្លួនជនជាប់ចោទតែម្តង។
សំណុំរឿងនេះ ត្រូវសាលាដំបូងខេត្តស្វាយរៀង ប្រកាសសាលក្រមនៅថ្ងៃទី ៣១ ខែ តុលា ឆ្នាំ ២០១៩ សម្រេចផ្តន្ទាទោសជនជាប់ចោទដាក់ពន្ធនាគារ ១០ ឆ្នាំ។
ជនជាប់ចោទ ធន់ ថាវ បានឆ្លើយប្រាប់ចៅក្រម នៅក្នុងបន្ទប់សវនាការ នៅថ្ងៃទី ២៩ ខែមិថុនា ថា គាត់មានមុខរបជាអ្នកលក់ប៉េងប៉ោង ហើយនៅយប់កើតហេតុនោះ គាត់បានឃើញក្មេងស្រីរងគ្រោះ ដើរចូលក្នុងបន្ទប់ទឹក ហើយរូបគាត់ ក៏ចាប់នាងរំលោភសេពសន្ថវៈ ប៉ុន្តែ មិនបានស៊ីជម្រៅទេ ហើយរំលោភបានតែម្តងប៉ុណ្ណោះ។
ទោះយ៉ាងណា លោកចៅក្រម យន់ ណារ៉ុង ប្រាប់ទៅជនជាប់ចោទថា៖ «ប៉ុន្តែយោងតាមចម្លើយសារភាពរបស់ឯង នៅដំណាក់កាលនគរបាលថា ឯងបានចាប់នាងរំលោភបាន ៥ ដង»។
ប៉ុន្តែជនជាប់ចោទបាននិយាយថា៖ «កាលណោះខ្ញុំភ័យ ហើយចេះតែឆ្លើយទៅ តាមពិតខ្ញុំចាប់ក្មេងរងគ្រោះរំលោភបានតែម្តងទេ។ ខ្ញុំសុំឲ្យតុលាការ បន្ថយទោសដល់ខ្ញុំផង»។
លោក តាន់ សេណារ៉ុង តំណាងមហាអយ្យការសន្និដ្ឋានថា ឆ្លងតាមអង្គហេតុ និងស្តាប់ការរៀបរាប់របស់ជនជាប់ចោទក្នុងបន្ទប់វនាការឃើញថា ជនជាប់ចោទពិតជាបានប្រព្រឹត្តលើក្មេងស្រីរងគ្រោះមែន។ តែយ៉ាងណា លោកទុកជូនក្រុមប្រឹក្សាជំនុំជម្រះពិចារណាចុះ។
លោក អ៊ឹម ម៉ាច មេធាវី ការពារសិទ្ធិឲ្យជនជាប់ចោទ បានសន្និដ្ឋានថា ក្នុងរឿងនេះ កូនក្តីរបស់លោកមិនបានប្រព្រឹត្តដូចអ្វីដែលតុលាការខេត្តស្វាយរៀងចោទប្រកាន់នោះទេ ហើយកូនក្តីរបស់លោក ក៏មិនបានរួមភេទជាមួយក្មេងស្រីរងគ្រោះដែរ គឺគ្រាន់តែបានញុលប្រដាប់ភេទជនរងគ្រោះតែប៉ុណ្ណោះ។
លោកបន្តថា ការចោទប្រកាន់លើកូនក្តីរបស់លោកក្នុងបទរំលោភសេពសន្ថវៈ គឺអយុត្តិធម៌ណាស់ ព្រោះបើតាមលិខិតកោលសល្យវិច័យបង្ហាញថា កាលណោះមានវេជ្ជបណ្ឌិត ៣ រូប នៃមន្ទីរពេទ្យខេត្តស្វាយរៀងដែលបានចូលរួមធ្វើកោសល្យវិច័យប្រដាប់ភេទក្មេងស្រីរងគ្រោះ បានបញ្ជាក់ក្នុងលិខិតកោសល្យវិច័យថា គ្មានស្នាមរលាត់ ឬក៏ដាច់រហែកប្រដាប់ភេទទេ។ ចំពោះភាគីខាងក្មេងរងគ្រោះ ក៏បានដកពាក្យបណ្តឹងវិញអស់ហើយដែរ។
លោកបញ្ជាក់ប្រាប់ចៅក្រមក្នុងបន្ទប់សវនាការថា៖ «ខ្ញុំស្នើសុំតុលាការសាលាឧទ្ធរណ៍ឲ្យទម្លាក់ចោលបទចោទប្រកាន់នេះ ហើយខ្ញុំសុំតុលាការដោះលែងកូនក្តីខ្ញុំឲ្យមានសេរីភាពវិញ»។
ក្រោយជំនុំជម្រះ លោក ចៅក្រម យន់ ណារ៉ុង បានថ្លែងថា សាលដីកានៃសំណុំរឿងនេះ តុលាការនឹងលើកទៅប្រកាសនៅថ្ងៃទី ១៤ ខែ កក្កដា ឆ្នាំ ២០២០៕
