.jpg)
អគារសាលាឧទ្ធរណ៍ក្នុងខេត្តបាត់ដំបង។ រូបថត ក្រសួងយុត្តិធម៌
ភ្នំពេញៈ លោក កើត រិទ្ធ រដ្ឋមន្ដ្រីក្រសួងយុត្ដិធម៌ដែលទើបឡើងកាន់តំណែងថ្មី បានប្រកាសពន្យារពេលការដាក់ឱ្យដំណើរការជាផ្លូវការសាលាឧទ្ធរណ៍តំបន់ស្ថិតនៅខេត្ដព្រះសីហនុ ដោយសារតែអគារសម្រាប់ធ្វើការនៃសាលាឧទ្ធរណ៍ថ្មីនេះមិនទាន់សាងសង់រួចរាល់ ខណៈសាលាឧទ្ធរណ៍តំបន់ចំនួនពីរទៀតគឺបាត់ដំបង និងត្បូងឃ្មុំត្រូវបើកដំណើរការជំនុំជម្រះរឿងក្ដីផ្លូវការចាប់ពីថ្ងៃទី ១ ខែមេសានេះតាមការគ្រោងទុក។
លោក ជិន ម៉ាលីន អ្នកនាំពាក្យក្រសួងយុត្តិធម៌ប្រាប់ភ្នំពេញប៉ុស្តិ៍កាលពីថ្ងៃពុធម្សិលមិញថា តាមការគ្រោងទុកក្រសួងនឹងដាក់ឱ្យដំណើរការសាលាឧទ្ធរណ៍តំបន់ទាំង ៣ តាមការត្រាស់បង្គាប់ដាក់ឲ្យដំណើរការរបស់ព្រះមហាក្សត្រចាប់ពីថ្ងៃទី ១ ខែមេសា។ ក៏ប៉ុន្ដែឥឡូវនេះដាក់ដំណើរការបានតែសាលាឧទ្ធរណ៍តំបន់តែ ២ ប៉ុណ្ណោះគឺសាលាឧទ្ធរណ៍តំបន់ក្នុងខេត្ដបាត់ដំបង និងខេត្ដត្បូងឃ្មុំ។
ចំណែកសាលាឧទ្ធរណ៍ខេត្ដព្រះសីហនុគឺត្រូវពន្យារពេលសិន «ដោយសារតែដំណើរការនៃការសាងសង់ (អគារ) មិនទាន់រួចរាល់ មានការយឺតយ៉ាវព្រោះតែមានការរីករាលដាលនៃជំងឺកូវីដ១៩ បណ្ដាលឱ្យមានការរាំងស្ទះដំណើរការនៃការសាងសង់បានជាត្រូវធ្វើការពន្យារនេះនឹងត្រូវដាក់ដំណើរការនៅពេលក្រោយ។ ក៏ប៉ុន្ដែសាលាឧទ្ធរណ៍តំបន់ ២ ទៀតនៅដាក់ដំណើរការធម្មតាដូចការគ្រោងទុក»។
តាមព្រះរាជក្រឹត្យស្ដីពីការដាក់ឲ្យដំណើរការសាលាឧទ្ធរណ៍តំបន់កាលពីថ្ងៃទី ១៩ ខែ កុម្ភៈ ឆ្នាំ ២០២០ កន្លងទៅបានបញ្ជាក់ថាសាលាឧទ្ធរណ៍តំបន់ទាំង ៣ ខាងលើត្រូវចាប់ផ្តើមដំណើរការចាប់ពីថ្ងៃទី ១ ខែមេសា ឆ្នាំ ២០២០ តទៅ ដើម្បីសម្រួលការលំបាករបស់ប្រជាពលរដ្ឋក្នុងការធ្វើដំណើរ និងការបន្តនីតិវិធីនៃការប្ដឹងតវ៉ាដោយមិនចាំបាច់ឡើងមកភ្នំពេញដូចកាលពីមុន។
សេចក្ដីប្រកាសព័ត៌មានរបស់ក្រសួងយុត្ដិធម៌ចុះហត្ថលេខាដោយលោក កើត រិទ្ធ កាលពីថ្ងៃទី ៣១ ខែមីនា ស្ដីពីការពន្យារពេលនៃការដាក់ឱ្យដំណើរការសាលាឧទ្ធរណ៍តំបន់ខេត្ដព្រះសីហនុនេះគឺធ្វើឡើងដោយមានសំណើពីប្រធានស្ដីទីសាលាឧទ្ធរណ៍ និង អគ្គព្រះរាជអាជ្ញាអមសាលាឧទ្ធរណ៍តំបន់ខេត្ដព្រះសីហនុ។
សេចក្ដីប្រកាសព័ត៌មាននេះសរសេរថា តាមការគ្រោងទុកសាលាឧទ្ធរណ៍ព្រះសីហនុនឹងត្រូវដាក់ឱ្យដំណើរការជាផ្លូវការចាប់ពីថ្ងៃទី ១ ខែ មេសា ឆ្នាំ ២០២០។ ប៉ុន្ដែដោយយោងតាមសំណើរបស់សាលាឧទ្ធរណ៍ព្រះសីហនុចុះថ្ងៃទី ៣០ ខែមីនា ឆ្នាំ ២០២០ ដែលបានស្នើសុំពន្យារពេលនៃការដាក់ឱ្យដំណើរការជាផ្លូវការនេះមួយរយៈដោយមូលហេតុអំពីស្ថានភាពនៃការរីករាលដាលនៃជំងឺកូវីដ១៩ ដែលធ្វើឱ្យការសាងសង់អគារសាលាឧទ្ធរណ៍ព្រះសីហនុមិនបានរួចរាល់ជាស្ថាពរតាមពេលវេលាដែលគ្រោងទុក។
សេចក្ដីប្រកាសព័ត៌មាននេះបញ្ជាក់ថា៖ «ក្រសួងយុត្ដិធម៌សូមធ្វើការពន្យារពេលនៃការដាក់ឱ្យដំណើរការសាលាឧទ្ធរណ៍ព្រះសីហនុមួយរយៈរហូតដល់មានការជូនដំណឹងជាថ្មី។ ចំពោះសមត្ថកិច្ចជំនុំជម្រះរឿងក្ដីដែលស្ថិតនៅក្នុងសមត្ថកិច្ចដែនដីនៃសាលាឧទ្ធរណ៍ព្រះសីហនុត្រូវស្ថិតនៅក្រោមសមត្ថកិច្ចរបស់សាលាឧទ្ធរណ៍ភ្នំពេញដោយអនុលោមតាមមាត្រា ៤ នៃព្រះរាជក្រឹត្យចុះថ្ងៃទី ១៩ ខែ កុម្ភៈ ឆ្នាំ ២០២០ ស្ដីពីការដាក់ឱ្យដំណើរការសាលាឧទ្ធរណ៍តំបន់»។
តាមព្រះរាជក្រឹត្យ សាលាឧទ្ធរណ៍តំបន់ព្រះសីហនុមានសមត្ថកិច្ចជំនុំជម្រះរឿងក្ដីដែលស្ថិតនៅក្នុងដែនដីដែលគ្របដណ្ដប់លើខេត្ដព្រះសីហនុខេត្ដកោះកុង ខេត្ដកំពត និងខេត្ដកែបលើកលែងតែរឿងក្ដីទាំងឡាយដែលច្បាប់ប្រគល់សមត្ថកិច្ចទៅឲ្យតុលាការផ្សេងទៀត៕
