ភ្នំពេញៈ សាលាឧទ្ធរណ៍តំបន់ចំនួន ៣ ស្ថិតនៅក្នុងខេត្ដព្រះសីហនុ ខេត្ដបាត់ដំបង និងខេត្ដត្បូងឃ្មុំត្រូវបានព្រះមហាក្សត្រត្រាស់បង្គាប់ដាក់ឲ្យបើកដំណើការជំនុំជម្រះរឿងក្ដីចាប់ពីថ្ងៃទី ១ ខែ មេសា ឆ្នាំ ២០២០ តទៅដែលការបង្កើតសាលាឧទ្ធរណ៍តំបន់នេះ គឺដើម្បីសម្រួលការលំបាករបស់ប្រជាពលរដ្ឋក្នុងការធ្វើដំណើរ និងការបន្តនីតិវិធីនៃការប្ដឹងតវ៉ា ដោយមិនចាំបាច់ឡើងមកភ្នំពេញដូចកាលពីមុន។
លោក ជិន ម៉ាលីន អ្នកនាំពាក្យក្រសួងយុត្តិធម៌ប្រាប់ភ្នំពេញប៉ុស្តិ៍កាលពីថ្ងៃពុធម្សិលមិញថា សាលាឧទ្ធរណ៍ចំនួន ៣ ដែលព្រះមហាក្សត្រត្រាស់បង្គាប់ដាក់ឲ្យដំណើរការចាប់ពីថ្ងៃទី ១ ខែមេសា ខាងមុខនេះ គឺស្ថិតក្នុងគម្រោងដែលរាជរដ្ឋាភិបាលធ្លាប់បានប្រកាសនាពេលកន្លងមកក្នុងគម្រោងបង្កើតឲ្យមានសាលាឧទ្ធរណ៍តំបន់ចំនួន ៧ នៃខេត្ដគោលដៅទូទាំងប្រទេស។
លោកថ្លែងថា៖ «ការបង្កើតសាលាឧទ្ធរណ៍តំបន់ថ្មី ៣ នេះគឺដើម្បីជួយសម្រួលការលំបាករបស់ប្រជាពលរដ្ឋក្នុងការធ្វើដំណើរ និងការបន្តនីតិវិធីនៃការប្ដឹងតវ៉ាព្រោះពីមុនពេលពលរដ្ឋចង់ប្ដឹងឧទ្ធរណ៍ គឺត្រូវឡើងមករាជធានីភ្នំពេញដែលពលរដ្ឋនៅខេត្ដឆ្ងាយមានការលំបាក។ ឥឡូវយើងបង្កើតឧទ្ធរណ៍តំបន់នេះអាចសម្រួលការលំបាកពលរដ្ឋ សន្សំពេលវេលា និងថវិកាដល់ពួកគាត់ និងបង្ខិតសេវាយុត្តិធម៌នេះទៅឲ្យជិតប្រជាពលរដ្ឋតែម្ដង»។
តាមព្រះរាជក្រឹត្យស្ដីពីការដាក់ឲ្យដំណើរការសាលាឧទ្ធរណ៍តំបន់នេះបានបញ្ជាក់ថា សាលាឧទ្ធរណ៍តំបន់ទាំង ៣ នេះចាប់ផ្តើមដំណើរការចាប់ពីថ្ងៃទី ១ ខែ មេសា ឆ្នាំ ២០២០ តទៅ។ នៅអមសាលាឧទ្ធរណ៍នីមួយៗមានមហាអយ្យការមួយស្របតាមបទប្បញ្ញត្ដិដូចមានចែងនៅក្នុងច្បាប់ស្ដីពីការរៀបចំអង្គការតុលាការ និងច្បាប់ជាធរមានពាក់ព័ន្ធដទៃផ្សេងទៀត។
ព្រះរាជក្រឹត្យបញ្ជាក់ថា៖ «សាលាឧទ្ធរណ៍តំបន់មានសមត្ថកិច្ចជំនុំជម្រះរឿងក្ដីដែលស្ថិតនៅក្នុងសមត្ថកិច្ចរបស់ខ្លួនចាប់ពីថ្ងៃទី ១ ខែមេសា ឆ្នាំ ២០២០ តទៅ។ ចំពោះសំណុំរឿងទាំងឡាយដែលស្ថិតក្រោមសមត្ថកិច្ចដែនដីរបស់សាលាឧទ្ធរណ៍តំបន់ ប៉ុន្ដែសាលាឧទ្ធរណ៍ភ្នំពេញបានទទួលជាសមត្ថកិច្ចនៅមុនថ្ងៃទី ១ ខែមេសា ឆ្នាំ ២០២០ ត្រូវកំណត់ជាសមត្ថកិច្ចរបស់សាលាឧទ្ធរណ៍ភ្នំពេញ ដើម្បីចាត់ការបន្តដោយអនុលោមតាមច្បាប់ និងបទប្បញ្ញត្ដិជាធរមាន។ វិធានដែលមានចែងក្នុងមាត្រានេះត្រូវយកមកអនុវត្ដដូចគ្នាផងដែរចំពោះមហាអយ្យការអមសាលាឧទ្ធរណ៍តំបន់»។
ព្រះរាជក្រឹត្យដដែលបញ្ជាក់ទៀតថា ក្នុងករណីដែលសាលាឧទ្ធរណ៍តំបន់ណាមួយមិនអាចដំណើរការបានសមត្ថកិច្ចជំនុំជម្រះរឿងក្ដីដែលស្ថិតនៅក្នុងសមត្ថកិច្ចដែនដីនៃសាលាឧទ្ធរណ៍តំបន់នោះត្រូវស្ថិតនៅក្រោមសមត្ថកិច្ចរបស់សាលាឧទ្ធរណ៍ផ្សេង។ រដ្ឋមន្ដ្រីក្រសួងយុត្ដិធម៌ត្រូវចេញប្រកាស ដើម្បីកំណត់អំពីការមិនអាចដំណើរការបាននៃសាលាឧទ្ធរណ៍តំបន់នេះ។
ព្រះរាជក្រឹត្យបញ្ជាក់ថា៖ «ប្រសិនបើសាលាឧទ្ធរណ៍តំបន់ណាមួយមានចៅក្រមមិនគ្រប់គ្រាន់ ឬខ្វះខាតចៅក្រមដោយមូលហេតុវិសមិតភាពជាអាទិ៍ប្រធានសាលាឧទ្ធរណ៍តំបន់នោះត្រូវស្នើសុំទៅរដ្ឋមន្ដ្រីក្រសួងយុត្ដិធម៌ ដើម្បីចាត់តាំងចៅក្រមពីសាលាឧទ្ធរណ៍ផ្សេងទៀតមកបំពេញសមាសភាព»។
លោក ជិន ម៉ាលីន បញ្ជាក់បន្ថែមថា៖ «សាលាឧទ្ធរណ៍តំបន់នីមួយៗបានគ្រប់ដណ្ដប់លើខេត្ដ ៤-៥ ដែលជាខេត្ដនៅជុំវិញនោះ ដូច្នេះពលរដ្ឋអាចដាក់បណ្ដឹងទៅសាលាឧទ្ធរណ៍នៅតំបន់ដែលពួកគាត់ឋិតនៅ។ សាលាឧទ្ធរណ៍តំបន់នេះក៏បានជួយរំដោះនូវការកកស្ទះសំណុំរឿងនៅតាមតុលាការផងដែរ ព្រោះពីមុនសាលាឧទ្ធរណ៍មានតែមួយ ហើយគ្រប់សំណុំរឿងពីរាជធានី-ខេត្ដគឺសម្រុកមកតែ ១ កន្លែង វាមានការលំបាកដែរ»។
យោងតាមព្រះរាជក្រឹត្យដដែលបញ្ជាក់ថា សាលាឧទ្ធរណ៍ព្រះសីហនុមានទីតាំងក្នុងខេត្តព្រះសីហនុ និងមានសមត្ថកិច្ចជំនុំជម្រះរឿងក្ដីដែលស្ថិតនៅក្នុងសមត្ថកិច្ចដែនដីដែលគ្របដណ្ដប់លើខេត្ដព្រះសីហនុខេត្ដកោះកុង ខេត្ដកំពតនិងខេត្ដកែបលើកលែងតែរឿងក្ដីទាំងឡាយដែលច្បាប់ប្រគល់សមត្ថកិច្ចទៅឲ្យតុលាការផ្សេងទៀត។
ចំណែកសាលាឧទ្ធរណ៍បាត់ដំបងមានទីតាំងស្ថិតនៅក្នុងខេត្ដបាត់ដំបង និងមានសមត្ថកិច្ចជំនុំជម្រះរឿងក្ដីដែលស្ថិតនៅក្នុងសមត្ថកិច្ចដែនដីដែលគ្របដណ្ដប់លើខេត្ដបាត់ដំបង ខេត្ដពោធិ៍សាត់ ខេត្ដប៉ៃលិន ខេត្ដបន្ទាយមានជ័យ ខេត្ដឧត្ដរមានជ័យ និងខេត្ដសៀមរាបលើកលែងតែរឿងក្ដីទាំងឡាយដែលច្បាប់ប្រគល់សមត្ថកិច្ចទៅឲ្យតុលាការផ្សេងទៀត។
រីឯសាលាឧទ្ធរណ៍ត្បូងឃ្មុំមានទីតាំងស្ថិតនៅក្នុងខេត្ដត្បូងឃ្មុំ និងមានសមត្ថកិច្ចជំនុំជម្រះរឿងក្ដីដែលស្ថិតក្នុងសមត្ថកិច្ចដែនដីដែលគ្របដណ្ដប់លើខេត្ដត្បូងឃ្មុំ កំពង់ចាម កំពង់ធំ ព្រះវិហារ ក្រចេះ ស្ទឹងត្រែង រតនគិរី និងខេត្ដមណ្ឌលគិរី លើកលែងតែរឿងក្ដីទាំងឡាយដែលច្បាប់ប្រគល់សមត្ថកិច្ចទៅឲ្យតុលាការផ្សេងទៀត។
ព្រះរាជក្រឹត្យបន្តថា សាលាឧទ្ធរណ៍ភ្នំពេញមានសមត្ថកិច្ចជំនុំជម្រះរឿងក្ដី ដែលស្ថិតនៅក្នុងសមត្ថកិច្ចដែនដីដែលគ្របដណ្ដប់លើរាជធានីភ្នំពេញខេត្ដកណ្ដាល ខេត្ដកំពង់ឆ្នាំង ខេត្ដកំពង់ស្ពឺ ខេត្ដតាកែវ ខេត្ដព្រៃវែង និងខេត្ដស្វាយរៀង ព្រមទាំងរឿងក្ដីដែលមិនស្ថិតនៅក្រោមសមត្ថកិច្ចរបស់សាលាឧទ្ធរណ៍តំបន់ លើកលែងតែរឿងក្ដីទាំងឡាយណាដែលច្បាប់ប្រគល់សមត្ថកិច្ចទៅឲ្យតុលាការផ្សេងទៀត៕