.jpg)
វត្តមានសត្វស្លាបទឹកកម្រជាច្រើនប្រភេទ ដែលកំពុងរកចំណីលើផ្ទៃបឹងទន្លេឆ្មារត្រូវបានកត់ត្រា។ រូបថត អង្គការជីវិតធម្មជាតិនៅកម្ពុជា
ភ្នំពេញៈ សាលាឧទ្ធរណ៍នៅថ្ងៃទី ៧ កក្កដា នេះ បានប្រកាសសាលដីកាបន្ថយទោសដល់ជនជាប់ចោទម្នាក់ពីជាប់ពន្ធនាគារ ១៤ ឆ្នាំ មកនៅ ១៣ ឆ្នាំវិញ បន្ទាប់ជំនុំជម្រះឡើងវិញតាមបង្គាប់របស់តុលាការកំពូលពាក់ព័ន្ធសម្លាប់មនុស្សម្នាក់នៅប្រទេសថៃ ប្រពឹត្តកាលពីឆ្នាំ ២០០៧។
នៅក្នុងបន្ទប់សវនាការពេលប្រកាសសាលដីកានេះ លោកស្រីចៅក្រម គឹម ដានី បានថ្លែងថា សំណុំរឿងនេះមានជនជាប់ចោទឈ្មោះ រស់ សុខុន តែគាត់មិនបានចូលស្តាប់លទ្ធផលទេ។ ការប្រកាសនេះបន្ទាប់ពីសាលាឧទ្ធរណ៍ជំនុំជម្រះឡើងវិញកាលពីថ្ងៃទី ២៥ មិថុនា ឆ្នាំ ២០២០ ហើយត្រូវប្រកាសសាលដីកានៅថ្ងៃទី ៧ កក្កដា ។
លោកស្រីចៅក្រមបានបន្តថា៖ «ប៉ុន្តែដោយសារជនជាប់ចោទមិនបានមកស្តាប់ គឺតុលាការអានតែសេចក្តីសម្រេចទេ។ ចំពោះទណ្ឌកម្មទោសពីមុនត្រូវតុលាការផ្តន្ទាទោស ១៤ ឆ្នាំ តែឥឡូវបន្ថយមក ១៣ ឆ្នាំវិញ ចោទពីបទមនុស្សឃាតតាមមាត្រា ១៩៩ នៃក្រមព្រហ្មទណ្ឌ»។
កាលពីពេលជំនុំជម្រះជនជាប់ចោទ រស់ សុខុន ធ្លាប់បានឆ្លើយប្រាប់ចៅក្រមក្នុងបន្ទប់សវនាការសាលាឧទ្ធរណ៍ថាគាត់រស់នៅខេត្តបន្ទាយមានជ័យ ហើយបានទៅធ្វើការជាកម្មករនៅភូមិ ភីដាន ស្រុកសំរោង ខេត្តសមុទ្រប្រាកាន ប្រទេសថៃ។ លុះនៅថ្ងៃទី ២៣ ខែ សីហា ឆ្នាំ ២០០៧ វេលាម៉ោង ៩ យប់ ខណៈគាត់កំពុងនៅក្នុងបន្ទប់ជួល ស្រាប់តែបងប្រុសជីដូនមួយគាត់ ឈ្មោះ ឃួន សុខា និងប្រពន្ធ ឈ្មោះ ភុក លីណា ដែលជាកម្មករដូចគ្នាបានស្រែកជេរគ្នាទៅវិញទៅមកជាមួយបុរសឈ្មោះ សាត ធី ដែលឈ្មោះនេះមានគូកន ៤ នាក់ទៀត។
ជនជាប់ចោទរូបនេះបានបន្តថា បន្ទាប់ពីឈ្លោះគ្នាបានប្រហែលកន្លះម៉ោង ភាគីទាំង ២ បានវាយគ្នាដោយម្នាក់ៗមានកាំបិតប៉័ងតោ ដំបងឈើ និងដាវផង។ ពេលនោះគាត់ដែលត្រូវជាសាច់ញាតិខាងឈ្មោះ ឃួន សុខា ក៏បានចូលទៅឃាត់។ ប៉ុន្តែការជួយអន្តរាគមន៍របស់គាត់មិនបានឲ្យភាគីទាំង ២ ផ្អាកសកម្មភាពឡើយហើយជម្លោះកាន់តែខ្លាំងឡើង។
ពេលនោះគាត់បានឃើញឈ្មោះ សាត ធី បានចាប់ស្រ្តី ឈ្មោះ ភុក លីណា អារកនឹងកាំបិតស្លាប់នៅកន្លែងកើតហេតុ។ ដោយឃើញដូចនោះពួកគាត់ដែលមានគ្នីគ្នាម្នាក់ទៀតក៏បានព្រួតគ្នា ឈ្មោះ សាត ធី ស្លាប់ដែរទៅ ប៉ុន្តែ
ពួកគាត់បានរត់គេចខ្លួន។
ជនជាប់ចោទបន្តថា ក្រោយកើតហេតុប៉ូលិសថៃបានចាប់ឈ្មោះ ណាង, ឈ្មោះ រ៉ា និងឈ្មោះ ផាន់ ណា (ភាគីខាងឈ្មោះ សាតធី)។ រីឯរូបគាត់និងបក្ខពួកម្នាក់ទៀតបានរត់មកលាក់ខ្លួននៅខេត្តបន្ទាយមានជ័យ។ ប៉ុន្តែរឿងនេះត្រូវខាងប៉ូលិសថៃផ្តល់ឈ្មោះនិងរូបថតរបស់គាត់មកនគរបាលខេត្តបន្ទាយមានជ័យ ហើយសមត្ថកិច្ចនគរបាលក៏ស្រាវជ្រាវចាប់ខ្លួនបាន និងឃុំខ្លួនក្នុងពន្ធនាគារខេត្តនៅថ្ងៃទី ៣ ខែ តុលា ឆ្នាំ ២០០៩។
ជនជាប់ចោទធ្លាប់បានប្រាប់ចៅក្រមថា គាត់ត្រូវបានសាលាដំបូងខេត្តបន្ទាយមានជ័យផ្ដន្ទាទោសជាប់ពន្ធនាគារ ១៥ ឆ្នាំ ចោទពីបទឃាតកម្ម។ ក្រោយមកត្រូវឧទ្ធរណ៍បន្ថយទោសមកនៅ ១៤ ឆ្នាំ។ ប៉ុន្តែដោយមិនសុខចិត្តគាត់ក៏បានប្ដឹងទៅតុលាការកំពូលដើម្បីសុំបន្ថយទោសមកនៅ ១០ ឆ្នាំ ទើបតុលាការកំពូលបង្វិលសំណុំរឿងមកឲ្យឧទ្ធរណ៍កាត់ក្ដីឡើងវិញបែបនេះ៕
