.jpg)
លោក ខែម ម៉ៅ ប្រធានសហជីពប្រជាធិបតរយ្យមូលដ្ឋាននៅសាលាឧទ្ធរណ៍នៅថ្ងៃ ទី ៦ ខែធ្នូ នេះ ។ រូបថត គឹម សារុំ
ភ្នំពេញៈ សាលាឧទ្ធរណ៍នៅថ្ងៃទី ៦ ខែ ធ្នូ នេះ បានបើកសវនាការលើសំណុំរឿងជម្លោះរវាងក្រុមហ៊ុនស្រាបៀរអង្គរនៅព្រះសីហនុនិងប្រធានសហជីពប្រជាធិបតរយ្យមូលដ្ឋានបន្ទាប់ពីសាលាដំបូងខេត្តសម្រេចឲ្យភាគីសហជីពសងក្រុមហ៊ុន៣ពាន់ដុល្លារករណីធ្វើកូដកម្មកាលពីឆ្នាំ ២០១៦ តែចុងចោទប្ដឹងឧទ្ធរណ៍។
នៅក្នុងបន្ទប់សវនាការលោក ខែម ម៉ៅ ជាប្រធានសហជីពក្នុងរោងចក្រស្រាបៀរអង្គរដែលជាដើមបណ្តឹងរដ្ឋប្បវេណី (នៅសាលាឧទ្ធរណ៍) បានឆ្លើយប្រាប់ចៅក្រមថាមូលហេតុដែលលោកប្ដឹងមកឧទ្ធរណ៍នេះគឺដោយសារកាលពីថ្ងៃ ២០ ខែ សីហា ឆ្នាំ ២០១៦ មានកម្មករជាង ១០០ នាក់នៅរោងចក្រនេះបានធ្វើកូដកម្មនៅមុខរោងចក្រ។
លោកបន្តថា តាមពិតកូដកម្មនោះធ្វើនៅម៉ោង៦ព្រឹក ប៉ុន្តែលោកបានចូលធ្វើការនៅម៉ោង៧ព្រឹក ដូច្នេះ កូដកម្មនោះ ធ្វើមុនចូលធ្វើការ១ម៉ោង ដើម្បីទាមទារឲ្យក្រុមហ៊ុនទទួលយកប្រធានពួកគេឈ្មោះ លឹម រ័ត្ន ឲ្យចូលធ្វើការវិញ បន្ទាប់ពីម្ចាស់រោងចក្របណ្តេញចេញ។
លោកថា ដោយចង់សម្រុះសម្រួល លោកបានចូលជួបភាគីរោងចក្រនិងប្រធានមន្ទីរការងារខេត្ត តែផ្សះផ្សាមិនត្រូវគ្នា ហើយក៏បន្តប្តឹងទៅក្រុមប្រឹក្សាអាជ្ញាកណ្តាល។បន្ទាប់មក ក្រុមប្រឹក្សាអាជ្ញាកណ្តាលក៏សម្រួលឲ្យក្រុមកម្មករបានចូលធ្វើការវិញ ប៉ុន្តែភាគីរោងចក្រមិនបានអនុញ្ញាតឲ្យលោក លឹម រ័ត្ន ចូលធ្វើការទេ ។ ដោយហេតុនោះហើយទើបក្រុមកម្មករបន្តធ្វើកូដកម្មនៅថ្ងៃទី ២១ ដល់ថ្ងៃ ២៤ សីហា ។
លោក ខែម ម៉ៅ បញ្ជាក់ប្រាប់ចៅក្រមថា៖ «រឿងធ្វើកូដកម្មនោះមិនមែនខ្ញុំជាអ្នកដឹកនាំទេ តែគឺពួកគេកម្មករខឹងខាងរោងចក្របញ្ឈប់លោក លឹម រ័ត្ន ជាមេរបស់គេ ។ ឯខ្ញុំមានបំណងចូលរួម សម្រុះសម្រួលប៉ុណ្ណោះ។ ចំពោះសំណង៣ពាន់ដុល្លារខ្ញុំគ្មានលទ្ធភាពសងក្រុមហ៊ុនទេ ព្រោះខ្ញុំត្រឹមតែជាកម្មករប៉ុណ្ណោះ។ ម្យ៉ាងក្រុមហ៊ុនដូចជា ឪពុក ខ្ញុំដូចជាកូន ដូច្នេះមិនដែលមានឪពុកប្តឹងកូនទេ»។
បើតាមលោក ខែម ម៉ៅ បញ្ហានេះខាងរោងចក្រចោទថា ដោយសារមានកូដកម្មទើបធ្វើឲ្យស្ទះចង្វាក់ផលិតកម្មហើយថាបណ្តាលមកពីលោក រួចក៏ប្តឹងទៅសាលាដំបូងខេត្តព្រះសីហនុទាមទារសំណង៦ម៉ឺនដុល្លារ ប៉ុន្តែខាងសាលាដំបូងខេត្ត បានសម្រេចឲ្យសងការខូចខាតត្រឹម ៣ ពាន់ដុល្លារកាលពីថ្ងៃទី ១៤ ខែ តុលា ឆ្នាំ ២០១៧ តែលោកមិនសុខចិត្តទើបប្តឹងមកឧទ្ធរណ៍ទៀត។
លោក ហុង សម្បត្តិ ជាមេធាវីការពារសិទ្ធិឲ្យលោក ខែម ម៉ៅ បានសន្និដ្ឋានថា៖ « ដូចលោក ខែម ម៉ៅ លើកឡើងថា កូដកម្មនោះធ្វើនៅម៉ោង៦ព្រឹក មុនលោកចូលធ្វើការ ហើយវត្តមានរបស់គាត់ពេលបន្ទាប់នោះ គ្រាន់តែចូលរួមជួយដោះស្រាយវិវាទប៉ុណ្ណោះ។ ដូច្នេះ ក្រុមកម្មករធ្វើកូដកម្មនោះដើម្បីទាមទារឲ្យលោក លឹម រ័ត្ន ចូលធ្វើការវិញ តែប៉ុណ្ណោះ » ។
លោក ស ម៉ូរ៉ា ប្រធានសហជីពចំណីអាហារនិងសេវាកម្មកម្ពុជាដែលមានវត្តមានក្នុងសវនាការដែរនោះបានប្រាប់តាមទូរស័ព្ទថា រឿងនេះមុនដំបូង ខាងរោងចក្របានប្តឹងលោកដែរ ដោយទារសំណងរួមគ្នា៦ម៉ឺនដុល្លារ ព្រោះគិតថា សហជីពរបស់លោក ខែម ម៉ៅ ជាសមាជិករបស់សហជីពលោកដែរ។ ប៉ុន្តែពេលជំនុំជម្រះ ចៅក្រម បានទម្លាក់បទចោទលោកចោល ព្រោះយល់ថា នៅថ្ងៃកើតហេតុនោះ លោកនៅក្រៅប្រទេស ។
ទោះយ៉ាងណា លោក ជាវ តុលា មេធាវីការពារសិទ្ធិឲ្យក្រុមហ៊ុន បានសន្និដ្ឋានថា នៅថ្ងៃកើតហេតុនោះ លោកទទួលស្គាល់ថា ក្រុមកម្មករបានធ្វើនៅម៉ោង៦ព្រឹកមុនលោក ខែម ម៉ៅ ចូលធ្វើការមែន ប៉ុន្តែនៅថ្ងៃបន្ទាប់ៗមកគឺ លោក ខែម ម៉ៅ បានចូលរួមនិងមានទាំងកាន់មេក្រូទៀតផង ។
លោកថា មូលហេតុដែលរោងចក្រប្តឹងទារសំណង ៦ ម៉ឺនដុល្លារនោះ ព្រោះក្រុមកម្មករដែលតវ៉ាធ្វើនៅកន្លែងផលិតវត្ថុធាតុដើម ហើយបើស្ទះ គឺវាស្ទះបន្តបន្ទាប់គ្នា ។
លោកបញ្ជាក់ប្រាប់ចៅក្រមថា៖ «ពេលនោះមានស្រែកគំរាមឲ្យកម្មករនៅក្នុងរោងចក្រឲ្យចេញមកជួយស្រែកតវ៉ាផង ដោយថា ប្រសិនបើពួកគេមិនចេញមកទេ គឺបើមានបញ្ហាទៅថ្ងៃក្រោយ គេមិនជួយទេ។ ចំពោះវត្ថុតាង មានវីដេអូឃ្លិប ជាតឹកតាង ផងដែរ »។
យ៉ាងណា លោកចៅក្រម ងួន អ៊ីម ប្រធានក្រុមប្រឹក្សាជំនុំជម្រះបានពន្យល់ដល់ភាគីទាំង ២ ថា បញ្ហានេះលោកចង់ឲ្យមានការស្រុះស្រួលគ្នាបញ្ចប់ត្រឹមប៉ុណ្ណឹង ហើយបើខាងក្រុមហ៊ុនធ្វើបានក៏ល្អ គួរតែឲ្យលោក ខែម ម៉ៅ ធ្វើលិខិតសុំទោស ឬយ៉ាងណា។ ប៉ុន្តែលោក ខែម ម៉ៅ ប្រាប់ចៅក្រមថា រឿងនេះចាំលោកពិភាក្សាជាមួយក្រុមការងារសិន ហើយលោកនៅតែបដិសេធថា មិនបានចូលរួមទេ តែគឺជាក្រុមរបស់លោក លឹម រ័ត្ន ។
ក្រោយជំនុំជម្រះលោកចៅក្រម ងួន អ៊ីម បានថ្លែងថា សាលដីកានៃសំណុំរឿងនេះនឹងត្រូវប្រកាសនៅថ្ងៃទី ២៧ ខែ ធ្នូ ខាងមុខនេះ៕
