ភ្នំពេញៈ សាលាឧទ្ធរណ៍សម្រេចលើកលែងការចោទប្រកាន់លើមេដឹកនាំសហជីពចំនួន ៦ រូប ដែលពាក់ព័ន្ធនឹងព្រឹត្តិការណ៍ហិង្សានៅលើផ្លូវវេងស្រេង កាលពីអំឡុងចុងឆ្នាំ ២០១៣ និងដើមឆ្នាំ ២០១៤ ខណៈពួកគេ បង្ហាញការសាទរចំពោះសេចក្តីសម្រេចនេះ និងចង់ឃើញតុលាការពិនិត្យលើកការចោទប្រកាន់ទាំងអស់លើថ្នាក់ដឹកនាំសហជីព ដែលកំពុងជាប់បណ្តឹងនៅតុលាការ។
ចៅក្រមនៃសាលាឧទ្ធរណ៍ កាលពីរសៀលថ្ងៃអង្គារ បានបើកសវនាការលើបណ្តឹងឧទ្ធរណ៍របស់មេដឹកនាំសហជីព ៦ រូប រួមមាន លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក ជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជា លោកស្រី យ៉ាង សោភ័ណ្ឌ ប្រធានសម្ព័ន្ធសហជីពកម្ពុជា លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជា លោក រ៉ុង ឈុន ប្រធានសហភាពសហជីពកម្ពុជា និងលោកស្រី ម៉ម ញឹម ប្រធានសហព័ន្ធសហជីពជាតិនៃឧស្សាហកម្មវាយនភណ្ឌ ក្រោយត្រូវបានសាលាដំបូងរាជធានីភ្នំពេញ សម្រេចផ្តន្ទាទោសឲ្យពួកគេជាប់ពន្ធនាគារក្នុងម្នាក់ ២ ឆ្នាំ ៦ ខែ និងពិន័យជាប្រាក់សរុបទាំង ៦ នាក់ ៣៥ លានរៀល ទៅដល់ជនរងគ្រោះជុំវិញហិង្សានៅផ្លូវវេងស្រេង។
បើតាមសេចក្តីសម្រេចរបស់សាលាឧទ្ធរណ៍ ក្រោយពីបញ្ចប់ការសួរដេញដោល បានសម្រេចបដិសេធចោលនូវសាលក្រមសាលាដំបូងរាជធានីភ្នំពេញ និងឲ្យមេដឹកនាំសហជីព និងសមាគមទាំង ៦ រូបនេះ រួចខ្លួនពីបទចោទទាំងនោះ។ នេះបើតាមការអះអាងរបស់លោក ប៉ាវ ស៊ីណា ប្រធានសហភាពចលនាកម្មករកម្ពុជា បានប្រាប់ភ្នំពេញប៉ុស្តិ៍ពីម្សិលមិញ។
ប្រធានសហភាពរូបនេះ បានបន្តថា៖ «នេះជារឿងមួយដែលគួរឲ្យរីករាយបំផុត ចំពោះការសម្រេចទម្លាក់បទចោទប្រកាន់មកលើខ្ញុំ ក៏ដូចជាតំណាងសហជីពផ្សេងទៀត។ អ្វីដែលសំខាន់ ពួកយើង មិនបានប្រព្រឹត្តអ្វីដូចការចោទប្រកាន់របស់សាលាដំបូងនោះទេ»។
ជាមួយនឹងការសម្រេចនេះ លោកចង់ឃើញរដ្ឋាភិបាល បើកឱកាសឲ្យបានពេញលេញដល់សហជីពបានធ្វើការងាររបស់ខ្លួនជួយដល់កម្មករនៅកម្ពុជា ដោយមិនរងការគំរាមកំហែងពីប្រព័ន្ធតុលាការ ឬអាជ្ញាធរបន្តទៀត ដើម្បីបង្ហាញថា សិទ្ធិសេរីភាពរបស់សហជីព មានភាពល្អប្រសើរជាងនេះ។
មិនខុសគ្នានេះដែរ លោក រ៉ុង ឈុន ប្រធានសហភាពសហជីពកម្ពុជា ក៏បានបង្ហាញការសាទររបស់ខ្លួន ចំពោះសេចក្តីម្រេចនេះផងដែរ។ ប៉ុន្តែលោក អំពាវនាវឲ្យតុលាការគួរទម្លាក់បទចោទប្រកាន់ទាំងឡាយណា ដែលសម្រេចមិនត្រឹមត្រូវ ទៅលើមេដឹកនាំសហជីពដទៃទៀត ដើម្បីបង្ហាញពីឯករាជភាពរបស់តុលាការ និងបង្ហាញថា តុលាការពិតជាគ្មានទទួលគំនាបណាមួយពីថ្នាក់ដឹកនាំរដ្ឋាភិបាលនោះទេ។
លោកបញ្ជាក់ថា៖ «ខ្ញុំចង់ឲ្យប្រព័ន្ធតុលាការប្រកាន់នូវយុត្តិធម៌បន្តទៀតដោយឈរលើវិជ្ជាជីវៈ ហើយផ្តល់យុត្តិធម៌ដល់អ្នកផ្សេងៗទៀត ដូចជាជនរងគ្រោះដោយសារដីធ្លី សកម្មជន និងសកម្មជននយោបាយ ជាពិសេសដូចជាករណី លោក រ៉ាត់ រ័ត្នមុនី ដែលត្រូវសវនាការនៅព្រហស្បតិ៍នេះ ដោយពួកគាត់មិនមានកំហុសឆ្គងដូចអ្វីដែលបានចោទប្រកាន់នោះទេ»។
ពាក់ព័ន្ធនឹងករណីនេះកាលពីឆ្នាំ ២០១៨ កន្លងទៅលោកនាយករដ្ឋមន្ត្រី ហ៊ុន សែន បានលើកទឹកចិត្តឲ្យមេដឹកនាំសហជីពទាំងនោះប្តឹងឧទ្ធរណ៍ និងឲ្យតុលាការពិចារណាលើសេចក្តីសម្រេចនេះឡើងវិញផងដែរ។
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បាននិយាយថា គ្មានកិច្ចអន្តរាគមន៍ណាមួយដែលមានសិទ្ធិលូកលាន់លើកិច្ចការរបស់តុលាការនោះទេ រួមទាំងលោកនាយករដ្ឋមន្ត្រីផងដែរ ហើយការសម្រេចនេះ គឺជាសិទ្ធិ របស់តុលាការ ដែលលោកមានកាតព្វកិច្ចពិចារណាដោយខ្លួនផ្ទាល់។ ជាមួយគ្នានេះ លោក ផៃ ស៊ីផាន ក៏អះអាងថា ការសម្រេចរបស់តុលាការក៏មិនអាចឲ្យបុគ្គលណាបកស្រាយស្រេចតែចិត្តនោះដែរ។
លោកបញ្ជាក់ថា៖ «សូមកុំធ្វើការបកស្រាយ ក្រៅពីការវិនិច្ឆ័យរបស់តុលាការ ពីព្រោះមានតែអង្គតុលាការមួយទេដែលមានកាតព្វកិច្ចអាជ្ញាសិទ្ធិក្នុងការសម្រេច ឈរទៅលើអង្គហេតុ និងអង្គច្បាប់ ហើយលោកនាយករដ្ឋមន្ត្រី គ្រាន់តែឲ្យពន្លឿនការវិនិច្ឆ័យ ដូច្នេះនីតិវិធីជួនកាលគេទុកជនសង្ស័យដើម្បីស្វែងរកភ័ស្តុតាងជាក់ស្តែង។ ការអំពាវនាវណាមួយរបស់ពួកគេ គឺជាឆន្ទៈរបស់ពួកគេ ក៏ប៉ុន្តែតុលាការ មានហេតុផល ដែលជាអំណាចផ្ទាល់របស់ចៅក្រមដែលគាត់អាចចាត់វិធានការតាមអង្គហេតុ ដែលប្រព្រឹត្តទៅ»៕