ភ្នំពេញៈ សាលាឧទ្ធរណ៍កាលពីម្សិលមិញបានប្រកាសសាលដីកាកំបាំងមុខ លោក ឈូក បណ្ឌិត អតីតអភិបាលក្រុងបាវិតដោយសម្រេចផ្តល់នីតិសម្បទាដល់លោកវិញ បន្ទាប់ពីបុគ្គលរូបនេះបានអនុវត្តទោសក្នុងពន្ធនាគារ ១៨ ខែរួចរាល់នៅឆ្នាំ ២០១៧ ពាក់ព័ន្ធនឹងការប្រើកាំភ្លើងបាញ់រះទៅលើកម្មករដែលកំពុងតវ៉ាបណ្តាលឲ្យកម្មករ ៣ នាក់រងរបួសធ្ងន់កាលពីឆ្នាំ ២០១២។
ចៅក្រមសាលាឧទ្ធរណ៍លោក សេង ស៊ីវុត្ថា បានថ្លែងក្នុងបន្ទប់សវនាការពីម្សិលមិញថា សំណុំរឿងនេះមាន ឈ្មោះ ឈូក បណ្ឌិត ជាម្ចាស់បណ្តឹងទាស់ ស្នើសុំផ្តល់នីតិសម្បទាឡើងវិញដែលសំណុំរឿងនេះសាលាឧទ្ធរណ៍បានបើកសវនាការជំនុំជម្រះកាលពីថ្ងៃទី ៣ ខែកក្កដា ឆ្នាំ ២០២០។ ប៉ុន្តែ លោក បណ្ឌិត មិនបានចូលស្តាប់ទេ ដូច្នេះតុលាការមិនបានអានសំអាងហេតុទាក់ទងនឹងការផ្តល់នីតិសម្បទានេះលម្អិតទេ។
លោកថ្លែងថា៖ «បណ្តឹងស្នើសុំផ្តល់នីតិសម្បទានេះ ក្រុមប្រឹក្សាជំនុំជម្រះសាលាឧទ្ធរណ៍សម្រេចផ្តល់នីតិសម្បទាដល់លោក ឈូក បណ្ឌិត វិញចាប់ពីថ្ងៃប្រកាសសាលដីកានេះតទៅ»។
ពាក់ព័ន្ធនឹងការប្រកាសសាលដីកានេះ ភ្នំពេញប៉ុស្តិ៍ មិនអាចស្វែងរកមេធាវីការពារសិទ្ធិរបស់លោក បណ្ឌិត ដើម្បីពន្យល់បានទេ។ ប៉ុន្តែបើតាមលោក មេធាវី យុង ផានិត ដែលជាអ្នកច្បាប់ ១ រូបពន្យល់ថា ពាក្យថាផ្តល់នីតិសម្បទាមានន័យថា កំហុសផ្នែកច្បាប់ដែលបុគ្គលនោះមានទាំងប៉ុន្មានគឺ ល្អដូចដើមវិញ។ លោកពន្យល់ថា៖ «ការផ្តល់នីតិសម្បទាគឺជាការជួសជុលផ្នែកផ្លូវច្បាប់ឲ្យល្អឡើងវិញ។ កំហុសទាំងប៉ុន្មានត្រូវបានបញ្ចប់ទាំងអស់ ព្រោះបុគ្គលនោះក៏បានអនុវត្តទោសចប់ហើយដែរ»។
លោកបន្ថែមថា៖ «បើតុលាការផ្តល់នីតិសម្បទាវិញបញ្ជាក់ថា គាត់ជាពលរដ្ឋធម្មតាមានសិទ្ធិពេញលេញអាចចូលរួមគ្រប់សកម្មភាពក្នុងសង្គមការងារបានទាំងអស់»។
លោក ឈូក បណ្ឌិត បានបាញ់រះធ្វើឲ្យកម្មការិនីនៃរោងចក្រស្បែកជើងកៅវ៉េ (Kaoway) ក្នុងក្រុងបាវិតចំនួន ៣ នាក់រងរបួសធ្ងន់ក្នុងពេលពួកគេតវ៉ាទាមទារលក្ខខណ្ឌការងារដែលកើតឡើងកាលពីថ្ងៃទី ២០ ខែកុម្ភៈ ឆ្នាំ ២០១២។ បន្ទាប់មកលោកបានគេចខ្លួនជាង ៣ ឆ្នាំ ប៉ុន្តែនៅថ្ងៃទី ១៨ ខែសីហាឆ្នាំ ២០១៥ លោក ឈូក បណ្ឌិត បានចូលសារភាព ក្រោយពីមានការប្រកាសរបស់លោកនាយករដ្ឋមន្ត្រី ហ៊ុន សែន អំពាវនាវឲ្យសមត្ថកិច្ចស្វែងរកចាប់ខ្លួនលោកបណ្ឌិតដោយមានការសហការជាមួយប៉ូលិសអាំងទែរប៉ូលផង។
លោក ឈូក បណ្ឌិត ត្រូវចៅក្រមសាលាដំបូងខេត្តស្វាយរៀងផ្តន្ទាទោសដាក់ពន្ធនាគារចំនួន ១៨ ខែពីបទបង្ករបួសស្នាមដោយអចេតនា និងបង្គាប់ឲ្យសងសំណងទៅស្ត្រីរងគ្រោះទាំង ៣ នាក់សរុប ៣៨ លានរៀល។ លោកបណ្ឌិតបានអនុវត្តទោសចំនួន ១៨ ខែ ក្នុងពន្ធនាគារចប់ និងត្រូវដោះលែងពីពន្ធនាគារឲ្យមានសេរីភាពវិញនៅថ្ងៃទី ៩ ខែកុម្ភៈ ឆ្នាំ ២០១៧៕