ភ្នំពេញៈ សាលាឧទ្ធរណ៍កាលពីម្សិលមិញបានជំនុំជម្រះបុរសវ័យចំណាស់ជាគ្រូខ្មែរម្នាក់ពាក់ព័ន្ធការព្យាបាលនារីជំទង់ដែលមានជំងឺហើយបានចាប់នាងរំលោភសេពសន្ថវៈបានសម្រេចចំនួន ៤ លើកដែលប្រព្រឹត្តនៅភូមិទួលវិហារ ឃុំចាន់សែន ស្រុកឧដុង្គកាលពីថ្ងៃទី ២៧ ខែកញ្ញា ឆ្នាំ ២០១៥ ។
ជនជាប់ចោទបាននិយាយក្នុងសវនាការកាលពីម្សិលមិញថា ករណីនេះគាត់មិនបានប្រព្រឹត្តដូចការចោទប្រកាន់ទេហើយគាត់សុំចៅក្រមសាលាឧទ្ធរណ៍ដោះលែង។
ជនជាប់ចោទឈ្មោះ ផន ខឿន បានថ្លែងទៅកាន់តុលាការថា៖ «ខ្ញុំមានជំងឺប្រចាំកាយហើយខ្ញុំសុំតុលាការដោះលែងខ្ញុំវិញ»។
តាមកំណត់ហេតុរបស់តុលាការបានបង្ហាញថា ជនជាប់ចោទឈ្មោះ ផន ខឿន អាយុ ៦៣ ឆ្នាំរស់នៅភូមិទួលវិហារ ជាគ្រូព្យាបាលជំងឺដែលអ្នកភូមិតែងតែទៅទទួលការព្យាបាលជំងឺពីលោកគ្រូម្នាក់នោះហើយគាត់ក៏ជាគ្រូមន្តអាគមចេះដោះអំពើអំព័ន្ធអ្នកជំងឺផងដែរ។ គ្រាដែលល្បីថាមានគ្រូចេះព្យាបាលជំងឺពូកែហើយគាប់ជួនស្ត្រីម្នាក់ដែលកូនកំពុងមានជំងឺប្រចាំកាយដែលធ្លាប់ព្យាបាលនៅមន្ទីរពេទ្យហើយគ្រូពេទ្យប្រាប់ថា រលាកស្រោមខួរតែព្យាបាលមិនជាសះស្បើយឡើយ។ ម្តាយក្មេងស្រីរងគ្រោះបានយកកូនស្រីរបស់ខ្លួនអាយុ ១៤ ឆ្នាំទៅឲ្យគ្រូខ្មែរម្នាក់នោះព្យាបាល។ កំណត់ហេតុបង្ហាញបន្តថា ពេលនោះម្តាយក្មេងស្រីរងគ្រោះឲ្យគ្រូខ្មែរម្នាក់នោះមើលគន់គូរទៅស្រាប់តែលោកគ្រូខ្មែរនោះប្រាប់ថា កូនស្រីរបស់គាត់ត្រូវអំពើគេហើយហើយបង្គាប់ឲ្យដាក់ទ្រនឹបចំនួន ១៥ ម៉ឺនរៀលក៏ត្រូវម្តាយក្មេងស្រីរងគ្រោះជូនលុយតាមការបង្គាប់របស់លោកគ្រូនោះ។ ម្យ៉ាងដោយមានការជឿទុកចិត្តទៅលើលោកគ្រូខ្មែរម្នាក់នោះផងម្តាយក្មេងរងគ្រោះក៏បានទុកកូនស្រីឲ្យនៅដេកព្យាបាលនឹងផ្ទះរបស់លោកគ្រូខ្មែរនោះ។
កំណត់ហេតុបង្ហាញទៀតថា បន្ទាប់ពីក្មេងស្រីរងគ្រោះបានស្នាក់នៅព្យាបាលនៅផ្ទះរបស់លោកគ្រូខ្មែរម្នាក់នោះបានប៉ុន្មានថ្ងៃហើយដោយមើលឃើញពីស្ថានភាពជំងឺរបស់កូនហាក់មិនទាន់មានអ្វីប្រែប្រួលម្តាយក្មេងរងគ្រោះបានយកកូនទៅផ្ទះវិញមួយរយៈ។ ក្រោយមកម្តាយក្មេងរងគ្រោះក៏នាំកូនស្រីឲ្យទៅស្នាក់នៅព្យាបាលជំងឺជាមួយលោកគ្រូខ្មែរនោះម្តងទៀត។ លុះនៅក្នុងអំឡុងខែសីហា និងខែកញ្ញា ឆ្នាំ ២០១៥ លោកគ្រូខ្មែរនោះបាននាំក្មេងរងគ្រោះទៅក្នុងព្រៃដែលនៅឆ្ងាយពីភូមិហើយបានចាប់នាងរំលោភបានសម្រេចហើយលោកគ្រូនោះបានប្រព្រឹត្តទៅលើក្មេងស្រីរងគ្រោះជាបន្តបន្ទាប់ទៀត។
កំណត់ហេតុបន្តថា លុះនៅវេលារសៀលថ្ងៃទី ២៧ ខែកញ្ញា ឆ្នាំ ២០១៥ លោកគ្រូខ្មែរម្នាក់នោះបានចាប់ក្មេងស្រីរំលោភម្តងទៀតជាលើកទី ៤ ហើយក្មេងរងគ្រោះត្រូវម្តាយនាំយកទៅផ្ទះ ស្រាប់តែឃើញសម្លៀកបំពាក់កូនមានប្រឡាក់ដីក៏សួរក្មេងរងគ្រោះថាទើបមកពីណា។ គ្រានោះក្មេងស្រីរងគ្រោះឆ្លើយថា៖ «បើម៉ែចង់ដឹងច្បាស់ទៅសួរលោកតាជាគ្រូព្យាបាលខ្ញុំទៅ»។
កំណត់ហេតុបង្ហាញបន្តថា បន្ទាប់ពីកូនស្រីប្រាប់ពីរឿងរ៉ាវនេះមក ម្តាយបាននាំក្មេងស្រីទៅពិនិត្យសុខភាពនៅមន្ទីរពេទ្យបង្អែកខេត្តកំពង់ស្ពឺហើយខាងមន្ទីរពេទ្យបានចេញលិខិតបញ្ជាក់ថា ក្មេងស្រីរងគ្រោះមានស្នាមដាច់រលាត់ប្រដាប់ភេទ។ បន្ទាប់មកម្តាយក្មេងរងគ្រោះបានដាក់ពាក្យបណ្តឹងនៅប៉ុស្តិ៍នគរបាលឃុំចាន់សែនដោយទារសំណងចំនួន ៥ ពាន់ដុល្លារហើយសមត្ថកិច្ចបានឃាត់ខ្លួនលោកគ្រូខ្មែរនោះតែម្តង។
សំណុំរឿងនេះត្រូវសាលាដំបូងខេត្តកំពង់ស្ពឺផ្តន្ទាទោសដាក់ពន្ធនាគារ ១០ ឆ្នាំចោទបទរំលោភសេពសន្ថវៈតាមមាត្រា ២៤១ នៃក្រមព្រហ្មទណ្ឌជនជាប់ចោទមិនសុខចិត្តបានប្តឹងទាស់មកសាលាឧទ្ធរណ៍។
លោក នាង ហៃ មេធាវី ការពារសិទ្ធិឲ្យជនជាប់ចោទបានសន្និដ្ឋានថា កូនក្តីរបស់លោកធ្លាប់ឆ្លើយនៅតុលាការខេត្ត និងនៅដំណាក់កាលនគរបាលខេត្តកំពង់ស្ពឺថា គាត់មិនបានប្រព្រឹត្តទៅលើក្មេងស្រីនោះទេ។ រីឯសាក្សីក៏គ្មានដែរ។
លោកថ្លែងថា៖ «កូនក្តីខ្ញុំគាត់ចាស់ជរាហើយបើឃុំខ្លួនគាត់បន្តទៀតគាត់អាចនឹងមានជំងឺសរសៃប្រសាទហើយបើគាត់មានជំងឺសរសៃប្រសាទអាចបង្កការអុកឡុកដល់អ្នកជាប់ឃុំ។ ដូច្នេះសូមតុលាការដោះលែងគាត់ផង»។
លោក ង៉ែត សារ៉ាត់ តំណាងមហាអយ្យការសន្និដ្ឋានថា ចម្លើយរបស់ជនរងគ្រោះក៏ដូចជាម្តាយរបស់ក្មេងរងគ្រោះជាដើមបណ្តឹងបង្ហាញថា ពិតជាមានករណីរំលោភសេពសន្ថវៈពីជនជាប់ចោទមែន។ នៅចំពោះមុខតុលាការក៏ដូចជានៅនគរបាលគឺជនជាប់ចោទតែងតែបដិសេធ។
លោកថា៖ «យ៉ាងណាពេលព្យាបាលអ្នកជំងឺគាត់តែងរកកន្លែងស្ងាត់បើតាមមាត្រា ២៤១ នេះកម្រិតទោសពី ៧ ទៅ ១៥ ឆ្នាំ។ ដូច្នេះសូមក្រុមប្រឹក្សាពិចារណាតាមឆន្ទានុសិទ្ធិចុះ»។ ក្រោយជំនុំជម្រះលោកស្រី ចាន់ ម៉ាឌីណា ប្រធានក្រុមប្រឹក្សាជំនុំជម្រះថ្លែងថា សាលដីកានេះប្រកាសនៅថ្ងៃទី ២៧ មីនា៕