.jpg)
ភ្នំពេញៈ សាលាឧទ្ធរណ៍បានបើកសវនាការកាលពីម្សិលមិញលើសំណុំរឿងជួញដូរគ្រឿងញៀនដែលសាលាដំបូងរាជធានីភ្នំពេញកាត់ទោសឲ្យបុរសជនជាតិឡាវម្នាក់ជាប់គុក ១ ជីវិត និងប្ដីប្រពន្ធវៀតណាម ២ នាក់ជាប់គុក ២០ ឆ្នាំ។
ក្រោយពីសួរដេញដោលជនជាប់ចោទទាំង ៣ នាក់នៅក្នុងសវនាការប្រមាណជា ២ ម៉ោងរួចមក លោក ហ៊ាន រិទ្ធ តំណាងមហាអយ្យការបានធ្វើការសន្និដ្ឋានដោយយោងតាមច្បាប់ត្រួតពិនិត្យគ្រឿងញៀនមាត្រា ៣៣ ថ្មីចែងថា គ្រឿងញៀនចាប់ពី ៣០០ ក្រាមឡើងទៅត្រូវផ្តន្ទាទោសពី ២០ ឆ្នាំទៅ ៣០ ឆ្នាំ ឬ ១ ជីវិតតែចំពោះជនជាប់ចោទម្នាក់ក្នុងចំណោម ២ នាក់ ត្រូវបានរកឃើញចំនួនគ្រឿងញៀនលើសពី ៣០០ ក្រាម ដូច្នេះមិនអាចបន្ថយទោសតាមការស្នើសុំរបស់ជនជាប់ចោទបានទេ ដោយតំណាងមហាអយ្យការសូមតម្កល់សាលក្រមនៅដដែល ចំណែកជនជាប់ចោទ ២ នាក់ផ្សេងទៀតទុកឲ្យក្រុមប្រឹក្សាពិចារណាតាមច្បាប់។
នៅក្នុងបន្ទប់សវនាការសាលាឧទ្ធរណ៍ជនជាប់ចោទឈ្មោះ ប៊ុន ណាក់លូត បានសារភាពតាមរយៈអ្នកបកប្រែភាសាវៀតណាមថាគាត់ជាម្ចាស់រថយន្តម៉ាកមែរស៊ើដេសពណ៌ខ្មៅហើយបានឲ្យមិត្តភក្តិខ្ចីមិនដឹងថាក្នុងរថយន្តនោះមានគ្រឿងញៀនទេពេលសងវិញ។
ជនជាប់ចោទថ្លែងថា៖ «ខ្ញុំទទួលយកកំហុសនេះតែសូមតុលាការបន្ថយទោសដល់ខ្ញុំខ្លះផងដើម្បីខ្ញុំមានឱកាសចេញទៅមើលម្តាយចាស់ជរា»។
ខណៈជនជាតិវៀតណាម ២ នាក់ប្តីប្រពន្ធក៏បានសុំឲ្យតុលាការដោះលែងពួកគេ។
ក្រោយជំនុំជម្រះលោកស្រីចៅក្រម ចាន់ ម៉ាឌីណា ប្រធានក្រុមប្រឹក្សាជំនុំជម្រះថ្លែងថា សាលដីកានេះប្រកាសនៅថ្ងៃទី ២៧ កក្កដា។ សំណុំរឿងនេះត្រូវបានសាលាដំបូងរាជធានីភ្នំពេញប្រកាសសាលក្រមនៅថ្ងៃទី ១៣ ខែតុលា ឆ្នាំ ២០១២ ផ្តន្ទាទោសឈ្មោះ ប៊ុន ណាក់លូត ជនជាតិឡាវដាក់ពន្ធនាគារ ១ ជីវិត និងពិន័យប្រាក់ ៦០ លានរៀលចោទបទជួញដូរគ្រឿងញៀនខុសច្បាប់។
ឈ្មោះ ជឿង បាញ់លុង និងឈ្មោះ ឌីញ ធីថ័រ (ប្ដីប្រពន្ធ) ដាក់ពន្ធនាគារម្នាក់ ២០ ឆ្នាំ និងពិន័យប្រាក់ម្នាក់ៗ ៤០ លានរៀល។ ខណៈម្នាក់ទៀតកំពុងលាក់ខ្លួនឈ្មោះ រ៉េត ចាន់ធា ដាក់ពន្ធនាគារ ២៣ ឆ្នាំ និង ចេញដីកាបង្គាប់ឲ្យសមត្ថកិច្ចតាមចាប់ខ្លួន។ យោងតាមកំណត់ហេតុសាលាឧទ្ធរណ៍បានឲ្យដឹងថា មន្ត្រីនគរបាលកាលពីថ្ងៃទី ១១ ខែមីនា ឆ្នាំ ២០១១ បានចាប់ខ្លួនជនជាប់ចោទទាំង ៣ នាក់នៅក្នុងខណ្ឌទួលគោក រាជធានីភ្នំពេញរឹបអូសគ្រឿងញៀនមេតំហ្វតាមីនជាង ២ គីឡូក្រាម៕
