ភ្នំពេញៈ បន្ទាប់ពីជំនុំជម្រះជនជាប់ចោទជួញដូរគ្រឿងញៀន ប្រភេទមេតំហ្វេតាមីន ប្រមាណជិតមួយម៉ោង នៅថ្ងៃទី ២៧ ខែវិច្ឆិកា សាលាឧទ្ធរណ៍បានសម្រេចនឹងប្រកាសសាលដីកានៅថ្ងៃទី ១៩ ខែធ្នូ ឆ្នាំ ២០១៨។ នេះបើយោងតាមលោក ចៅក្រម សេង ស៊ីវត្ថា ប្រធានក្រុមប្រឹក្សាជំនុំជម្រះថ្លែងមុនពេលបញ្ចប់ការជំនុំជម្រះ។
ជនជាប់ចោទឈ្មោះ អន ខេន អាយុ ៦៧ឆ្នាំ ជាអ្នកបកប្រែឲ្យបុរសជនជាតិថៃមនាក់ឈ្មោះ កាន់ ឆាយ ត្រូវបានតុលាការខេត្តបន្ទាយមានជ័យកាត់ទោស ឲ្យជាប់គុក ២៣ ឆ្នាំ ពាក់ព័ន្ធក្នុងការជួញដូរគ្រឿងញៀនទម្ងន់ ៨៤៥,៥ ក្រាមនៅក្រុងប៉ោយប៉ែតកាលពីឆ្នាំ ២០១៦។
កំណត់ហេតុបរបស់តុលាការបានឲ្យដឹងថា ជនជាប់ចោទ អន ខេន បានស្គាល់ស្ត្រីម្នាក់ឈ្មោះ មុំ ជាកម្លាំងបង្កប់របស់សមត្ថកិច្ច បានទាក់ទងជនជាប់ចោទ ដើម្បីទិញថ្នាំញៀន ហើយជនជាប់ចោទ បានទាក់ទងបុរសថៃនោះ។ ក្រោយពីនិយាយត្រូវរ៉ូវគ្នាហើយ បុរសថៃនោះ បានលក់ថ្នាំញៀនទម្ងន់ ៨៤៥,៥ ក្រាមតម្លៃ ៨០ ម៉ឺនបាត ប៉ុន្តែតាមរយៈជនជាប់ចោទ ស្ត្រីឈ្មោះ មុំ ឲ្យថ្លៃត្រឹម ៧០ ម៉ឺនបាត ហើយក៏មានការព្រមព្រៀងគ្នា។
លុះដល់ថ្ងៃទី ១០ ខែមីនា ឆ្នាំ ២០១៦ ស្ត្រីឈ្មោះ មុំ ក៏ធ្វើការណាត់ដើម្បីដោះដូរទំនិញថ្នាំញៀននោះ នៅភូមិក្បាលស្ពាន សង្កាត់-ក្រុង ប៉ោយប៉ែត ហើយក៏ត្រូវសមត្ថកិច្ចព័ទ្ធចាប់បានទាំងបុរសថៃនិងជនជាប់ចោទសំណុំរឿងនេះត្រូវសាលាដំបូងខេត្ត បន្ទាយមានជ័យបើកសវនាការនិងប្រកាសសាលក្រមនៅថ្ងៃទី២៥ ខែមករា ឆ្នាំ ២០១៧ ផ្តន្ទាទោសម្នាក់២៣ឆ្នាំចោទពីបទជួញដូរគ្រឿងញៀនខុសច្បាប់តាមបញ្ញត្តិមាត្រា៤០ច្បាប់ស្តីពីការត្រួត-ពិនិត្យគ្រឿងញៀន។ ប៉ុន្តែក្រោយមកបុរសថៃនោះមានជំងឺឈឺស្លាប់ហើយត្រូវតុលាការរំលត់បណ្តឹងអាជ្ញាចោល។
ជនជាប់ចោទ អន ខេន បានឆ្លើយក្នុងសវនាការពីម្សិលមិញថា៖«រឿងនេះខ្ញុំមិនបានជួញដូរគ្រឿងញៀនដូចតុលាការចោទប្រកាន់ទេ តែខ្ញុំគ្រាន់តែជាអ្នកបកប្រែភាសាឲ្យបុរសជនជាតិថៃនោះតែប៉ុណ្ណោះ។ ខ្ញុំស្នើសុំឲ្យតុលាការសាលាឧទ្ធរណ៍ដោះលែងខ្ញុំឲ្យមានសេរីភាពវិញផង»។
លោក អគ្គព្រះរាជអាជ្ញារង ហ៊ាន រិទ្ធ តំណាងមហាអយ្យការសន្និដ្ឋានថា យោងតាមអង្គហេតុលោកយល់-ឃើញថា នគរបាលចាប់ខ្លួនជនជាប់ចោទដោយសារគាត់មានទំនាក់ទំនងជាមួយបុរសថៃនោះ។ ត្បិតគាត់បដិសេធពីការមិនពាក់ព័ន្ធគ្រឿង-ញៀនក្តី ប៉ុន្តែគាត់បានសម្រួលតាមរយៈការបកប្រែក្នុងការទិញលក់ថ្នាំញៀននេះ។
លោកថ្លែងថា៖«យោងតាមអង្គហេតុនិងចម្លើយរបស់បុរសថៃនោះហើយនឹងចម្លើយសារភាពរបស់ជនជាប់ចោទនៅដំណាក់កាលនគរបាលគឺវាស៊ីសង្វាក់គ្នាដូចដែលតុលាការខេត្តបន្ទាយមានជ័យចោទប្រកាន់មែនហើយតាមច្បាប់ជួញដូរគ្រឿងញៀនត្រង់មាត្រា៤០ថ្មីកំណត់ទណ្ឌកម្មទោសពី២០ទៅ៣០ឆ្នាំ។ ដូច្នេះ តុលាការខេត្តដាក់ទោស២៣ឆ្នាំដូចជាសមល្មមហើយ ហើយខ្ញុំសូមតម្កល់សាលក្រមរបស់តុលាការខេត្តបន្ទាយមានជ័យទុកដដែល»។
លោក ស្រី ជាតិ សុខា ជាមេធាវីការពារសិទ្ធិឲ្យជនជាប់ចោទសន្និដ្ឋានថា កូនក្តីរបស់លោកស្រីត្រឹមតែជាអ្នកបកប្រែភាសាតែប៉ុណ្ណោះរីឯការទិញលក់ថ្នាំយ៉ាងណានោះគាត់មិនបានពាក់ព័ន្ធទេ។ កូនក្តីលោកស្រីប្តឹងមកឧទ្ធរណ៍នេះក៏ព្រោះតែគាត់មិនសុខចិត្តនឹងទោស២៣ឆ្នាំ។
លោកស្រីបន្តថា៖«ក្នុងរឿងនេះ ខាងនាយកដ្ឋានប្រឆាំងបទល្មើសគ្រឿងញៀនក្រសួងមហាផ្ទៃក៏ចេញលិខិត១ច្បាប់ទៅតុលាការខេត្ត សុំឲ្យដោះលែងកូនក្តីខ្ញុំដែរព្រោះយល់ថា តាមរយៈកូនក្តីខ្ញុំនេះហើយទើបអាចចូលជ្រៅឈានទៅចាប់គ្រឿងញៀនបាន។ ដូច្នេះខ្ញុំសូមតុលាការច្រានចោលសាលក្រមរបស់តុលាការខេត្តបន្ទាយមានជ័យនិងសុំដោះលែងកូនក្តីខ្ញុំវិញ»៕