The Phnom Penh Post Search

Search form




Logo of Phnom Penh Post newspaper Phnom Penh Post - សាលា​ក្រុង​គ្រោង​បង្សុ​កូល​រាប់​បាត្រ​ព្រះ​សង្ឃ ១០៨ អង្គ​ឲ្យ​អ្នក​ស្លាប់​នៅ​ស្ពាន​ពេជ្រ

សាលា​ក្រុង​គ្រោង​បង្សុ​កូល​រាប់​បាត្រ​ព្រះ​សង្ឃ ១០៨ អង្គ​ឲ្យ​អ្នក​ស្លាប់​នៅ​ស្ពាន​ពេជ្រ

គ្រឿង​សក្ការៈ ដែល​បាន​ឧទ្ទិស​ឲ្យ​អ្នក​ស្លាប់​នៅ​ស្ពាន​ពេជ្រ។
គ្រឿង​សក្ការៈ ដែល​បាន​ឧទ្ទិស​ឲ្យ​អ្នក​ស្លាប់​នៅ​ស្ពាន​ពេជ្រ។ ហេង ជីវ័ន

សាលា​ក្រុង​គ្រោង​បង្សុ​កូល​រាប់​បាត្រ​ព្រះ​សង្ឃ ១០៨ អង្គ​ឲ្យ​អ្នក​ស្លាប់​នៅ​ស្ពាន​ពេជ្រ

ភ្នំពេញៈ សាលា​រាជធានី​ភ្នំពេញ​អំពាវនាវ និង​អញ្ជើញ​ញាតិ​មិត្ត​ជិត​ឆ្ងាយ​របស់​ជន​រង​គ្រោះ​ដែល​ស្លាប់​ក្នុង​ឧបទ្ទវហេតុ រត់​ជាន់​គ្នា​ស្លាប់​នៅ​លើ​ស្ពាន​ពេជ្រ​កាល​ពី ខែ​វិច្ឆិកា ឆ្នាំ​២០១០ មក​ចូល​រួម​ក្នុង​ពិធី​គម្រប់​ខួប ៤​ឆ្នាំ ប៉ុន្តែ គ្រួសារ​ជន​រង​គ្រោះ​ខ្លះ​ថា នឹង​មិន​មក​ចូល​រួម​ឡើយ។

អ្នក​នាង ទូច រស្មី វ័យ ៤២​ឆ្នាំ ដែល​ប្អូន​ស្រី​របស់​នាង​បាន​ស្លាប់​នៅ​លើ​ស្ពាន​ពេជ្រ កាល​ពី ៤​ឆ្នាំ មុន​និយាយ​ថា នាង​មិន​មក​ចូល​រួម​ពិធី​បង្សុកូល​ឧទ្ទិស​ជូន​វិញ្ញាណ​ក្ខន្ធ​អ្នក​ស្លាប់​ទេ ដោយ​សារ​វា​ធ្វើ​ឲ្យ​នាង​នឹក​ឃើញ​ពី​ព្រឹត្តិការណ៍​ដែល​នាង​ក៏​ស្ថិត​នៅ​ក្នុង​គ្រោះ​ថ្នាក់​នោះ​ដែរ ប៉ុន្តែ​សំណាង​ល្អ នាង​មិន​គ្រោះ​ថ្នាក់​ដល់​ជីវិត។

អ្នក​នាង រស្មី និយាយ​ថា៖ «ខ្ញុំ​មិន​ចង់​រំឭក​រូបភាព​ដ៏​គួរ​ឲ្យ​ខ្លោច​ផ្សា​នេះ​ឡើង​វិញ​ទេ ដូច​នេះ​ខ្ញុំ​នឹង​មិន​ទៅ​ចូល​រួម​ឡើយ»។

តាម​សេចក្តី​ជូន​ដំណឹង​របស់​សាលា​រាជធានី​ភ្នំពេញ កាល​ពី​សប្តាហ៍​មុន​ឲ្យ​ដឹង​ថា ពិធី​បង្សុកូល​ឧទ្ទិស​កុសល ជូន​ជន​រង​គ្រោះ​នៅ​លើ​ស្ពាន​ពេជ្រ​នឹង​ប្រព្រឹត្ត​ទៅ​នៅ​ថ្ងៃ ទី២២ វិច្ឆិកា នេះ នៅ​ស្តូប​ក្បែរ​ស្ពាន​នាគ​នៃ​មជ្ឈម​ណ្ឌល​សន្និបាត​ពិព័រណ៍​កោះ​ពេជ្រ ដោយ​មាន​ការ​ចូល​រួម​ពី​អភិបាល​រាជធានី​ភ្នំពេញ មន្រ្តី​តាម​បណ្តា​ខណ្ឌ និង​ប្រជា​ពលរដ្ឋ​ផង ហើយ​ពិធី​នេះ​មាន​ការ​រាប់​បាត​ព្រះ​សង្ឃ​ចំនួន ១០៨ អង្គ​ទៀត​ផង។

អ្នក​នាង ទូច រស្មី បាន​អះអាង​ថា គ្រួសារ​នាង​នឹង​រៀបចំ​ពិធី​ខួប​នេះ​ជូន​ប្អូន​ស្រី​ដែល​ស្លាប់​ក្នុង​ហេតុ​ការណ៍​នៃ​ថ្ងៃ​អុំទូក ទី៣ ក្នុង ឆ្នាំ​២០១០ នោះ នៅ​ឯ​គេហដ្ឋាន​នាង ក្នុង​ស្រុក​កំណើត​ក្នុង ខេត្ត​ស្វាយរៀង។

សូម​រំឭក​ថា ក្នុង​ឧបទ្ទវហេតុ​កើត​ឡើង​ក្នុង​យប់​ថ្ងៃ​ចុង​ក្រោយ​នៃ​ពិធី​បុណ្យ​អុំ​ទូក បណ្តែត​ប្រទីប អក​អំបុក និង​សំពះ​ព្រះ​ខែ ក្នុង​អំឡុង ឆ្នាំ​២០១០ នោះ​បាន​បណ្តាល​ឲ្យ​ស្លាប់​មនុស្ស​ច្រើន​ជាង ៣៥០ នាក់ និង​របួស​រាប់​រយ​នាក់​ទៀត​ផង ហើយ​ដោយ​សារ​តែ​ហេតុ​ការណ៍​នេះ​រដ្ឋាភិបាល​បាន​ផ្អាក​ការ​រៀបចំ​បុណ្យ​ជាតិ​ដ៏​ធំ​មួយ​នេះ​អស់​រយៈ​ពេល​បី​ឆ្នាំ​ជាប់​គ្នា ហើយ​ទើប​តែ​រៀប​ចំ​ព្រះ​រាជ​ពិធី​បុណ្យ​នេះ​ឡើង​វិញ​នៅ​ក្នុង​ឆ្នាំ​នេះ​ទេ៕

អត្ថបទគួរចាប់អារម្មណ៍