The Phnom Penh Post Search

Search form

Logo of Phnom Penh Post newspaper Phnom Penh Post - សាលា​ក្រុង​និង​គ្រួសារ​ជន​រងគ្រោះ​នៅ​ស្ពាន កោះពេជ្រ បង្សុកូល​ឲ្យ​អ្នក​ស្លាប់




សាលា​ក្រុង​និង​គ្រួសារ​ជន​រងគ្រោះ​នៅ​ស្ពាន កោះពេជ្រ បង្សុកូល​ឲ្យ​អ្នក​ស្លាប់

សាលា​ក្រុង​និង​គ្រួសារ​ជន​រងគ្រោះ​នៅ​ស្ពាន កោះពេជ្រ បង្សុកូល​ឲ្យ​អ្នក​ស្លាប់

131119_06
ផ្កានិងគ្រឿងបូជាដែលដាក់ឧទ្ទិសដល់វិញ្ញាណក្ខន្ធអ្នកស្លាប់លើស្ពានពេជ្រក្រោយកើតហេតុ ហេង ជីវ័ន

ភ្នំពេញៈ ស្រប​ពេល​ដែល​សាលា​រាជធានី​ភ្នំពេញ​គ្រោង​នឹង​ប្រារព្ធ​ពិធី​បង្សុកូល​ឧទ្ទិស​កុសល​ជូន​ដួង​វិញ្ញាណក្ខន្ធ​ជន​រងគ្រោះ​ក្នុង​ឧបទ្ទវហេតុ​លើ​ស្ពាន​ពេជ្រ នៃ​មជ្ឈមណ្ឌល​សន្និបាត និង​ពិព័រណ៍​កោះពេជ្រ​នៅ​ថ្ងៃ​សុក្រ ទី២២ វិច្ឆិកា ក្រុម​គ្រួសារ​លោក យ៉ាង ពិត នៅ​ខេត្ត កំពង់ស្ពឺ ក៏​បាន​រៀបចំ​ឧទ្ទិស​កុសល​ជូន​ដល់​ចៅ​ប្រុស​គាត់​ដែល​ស្លាប់​ក្នុង​ហេតុការណ៍​នេះ កាល​ព្រឹក​ថ្ងៃ​ចន្ទ​ម្សិលមិញ​ដែរ។

លោក យ៉ាង ពិត អាយុ ៥៦ឆ្នាំ កំពុង​តែ​រៀបចំ​ពិធី​បង្សុកូល​ក្នុង​ស្រុក គងពិសី ខេត្ត កំពង់ស្ពឺ ជូន​ដល់​វិញ្ញាណក្ខន្ធ​ចៅ​ប្រុស​គាត់​ឈ្មោះ ឈឹម វណ្ឌី អាយុ ២៣ឆ្នាំ ដែល​ស្លាប់​ដោយ​ការ​រត់​ជាន់​គ្នា​លើ​ស្ពាន​ពេជ្រ​ក្នុង​រាត្រី​ថ្ងៃ ទី៣ នៃ​ពិធី​បុណ្យ​អុំទូក កាល​ពី​ខែ វិច្ឆិកា ឆ្នាំ ២០១០។

លោក យ៉ាង ពិត និយាយ​ថា៖ «កំពុង​តែ​រៀបចំ​បង្សុកូល​ជូន​ចៅ​ប្រុស​ខ្ញុំ​នៅ​ឯ​ផ្ទះ​ដោយ​បាន​និមន្ត​ព្រះសង្ឃ និង​ញាតិ​មិត្ត​ជិត​ឆ្ងាយ​ចូល​រួម​ផង​។ ខ្ញុំ​នឹង​ទៅ​ចូល​រួម​បង្សុកូល​ម្តង​ទៀត​នៅ​ថ្ងៃ​សុក្រ​នៅ​ឯ​ស្តូប​ជិត​ស្ពាន​ដែល​ចៅ​ខ្ញុំ​ស្លាប់»។ លោក​ឲ្យ​ដឹង​ទៀត​ថា គ្រួសារ​គាត់​តែង​ធ្វើ​ពិធី​ឧទ្ទិស​ដល់​ដួង​វិញ្ញាណក្ខន្ធ​ចៅ​ប្រុស​គាត់​ជា​រៀង​រាល់​ឆ្នាំ​ដោយ​មិន​អាច​បំភ្លេច​បាន​នូវ​អ្វី​ដែល​បាន​កើត​មាន​ឡើង​នៅ​ស្ពាន​ពេជ្រ​ដែល​បាន​ធ្វើ​ឲ្យ​មនុស្ស​រាប់​រយ​នាក់​បាន​បាត់បង់​ជីវិត និង​រង​របួស​នោះ​ឡើយ។

អ្នក​ស្រី ហ៊ន សារ៉ុម ម្តាយ​របស់ ឈឹម វណ្ឌី បាន​និយាយ​កាល​ពី​ថ្ងៃ​ម្សិលមិញ​ដែរ​ថា គាត់​មិន​ដែល​មក​ចូល​រួម​ពិធី​អុំ​ទូក​ទេ ព្រោះ​វា​ធ្វើ​ឲ្យ​គាត់​នឹក​ឃើញ​ហេតុការណ៍​ដែល​កើត​មាន​លើ​កូន​ប្រុស​របស់​គាត់។

អ្នក​ស្រី​និយាយ​ថា៖ «ទឹក​ភ្នែក​ខ្ញុំ​តែង​តែ​ហូរ​នៅ​ពេល​ដែល​រំឭក​ពី​កូន​របស់​ខ្ញុំ​ក្នុង​ព្រឹត្តិការណ៍​រត់​ជាន់​គ្នា​នោះ»។

អ្នក​ស្រី​ថា គាត់​មិន​ដែល​ទៅ​មើល​ស្ពាន​ឬ​ស្តូប​ដែល​គេ​សាង​សម្រាប់​គោរព​វិញ្ញាណក្ខន្ធ​អ្នក​ស្លាប់​នោះ​ទេ​ព្រោះ​គាត់​មិន​អាច​ទប់​អារម្មណ៍​ឈឺចាប់​បាន។

ចំណែក​អ្នក​រង​របួស​ក្នុង​គ្រោះថ្នាក់​នោះ លោក អ៊ឹង ង៉ែត អាយុ ២៩ឆ្នាំ ដែល​រួច​រស់​ជីវិត​បាន និយាយ​កាល​ពី​ថ្ងៃ​ម្សិលមិញ​ថា គាត់​មិន​ដែល​បំភ្លេច​នូវ​រូបភាព​ដែល​បាន​កើត​មាន​ចំពោះ​រូប​គាត់​និង មនុស្ស​រាប់​រយ​នាក់​ទៀត​បាន​ទេ។ វា​ដក់​ជាប់​ជានិច្ច​ក្នុង​អារម្មណ៍​របស់​គាត់។

លោក អ៊ឹង ង៉ែត បន្ត​ថា៖ «ថ្ងៃ​នោះ​ជា​ថ្ងៃ​ដំបូង ដែល​ខ្ញុំ​មាន​បំណង​ដើរ​ឆ្លង​ស្ពាន​ពេជ្រ​នោះ តែ​ខ្ញុំ​ឆ្លង​មិន​ផុត​ផង ក៏​មាន​ហេតុ​ការណ៍​កើត​ឡើង។ ខ្ញុំ​ព្យាយាម​បំភ្លេច តែ​មិន​អាច​បង្ខំ​ចិត្ត​ខ្លួន​ឯង​ឲ្យ​បំភ្លេច​បាន​ឡើយ»។

លោក អ៊ឹង ង៉ែត នឹង​មក​ចូល​រួម​ប្រារព្ធ​ពិធី​បង្សុកូល​ដែល​រៀបចំ​ដោយ​សាលា​រាជធានី​ភ្នំពេញ​នៅ​ថ្ងៃ​សុក្រ​សប្តាហ៍​នេះ។

យោង​តាម​សេចក្តី​ជូន​ដំណឹង​របស់​សាលា​រាជធានី​ស្តីពី​ការ​ប្រារព្ធ​ពិធី​បង្សុកូល​ឧទ្ទិស​កុសល​ជូន​វិញ្ញាណក្ខន្ធ​ជន​រងគ្រោះ​ក្នុង​ឧបទ្ទវហេតុ​លើ​ស្ពាន​ពេជ្រ​បាន​ឲ្យ​ដឹង​ថា ពិធី​នេះ​នឹង​ប្រព្រឹត្ត​ទៅ​ក្រោម​អធិបតីភាព​លោក​អភិបាល ប៉ា សុជាតិវង្ស និង​មន្រ្តី​ជាច្រើន​នាក់​ទៀត ដោយ​មាន​ពិធី​រាប់​បាត្រ​ប្រគេន​ទេយ្យវត្ថុ​ដល់​ព្រះសង្ឃ ១០៨ អង្គ​ផង ដើម្បី​ឧទ្ទិស​កុសល​ជូន​ជន​រងគ្រោះ។

គួរ​រំឭក​ថា ហេតុការណ៍​រត់​ជាន់​គ្នា​នៅ​លើ​ស្ពាន​ពេជ្រ​បណ្តាល​ឲ្យ​មាន​មនុស្ស ៣៥៣ នាក់ ស្លាប់​និង​រាប់​រយ​នាក់​ទៀត​រង​របួស​។ រាជ​រដ្ឋាភិបាល​បាន​បង្កើត​គណៈកម្មការ​ស៊ើប​អង្កេត​មួយ​រក​មូល​ហេតុ​នៃ​ការ​រត់​ជាន់​គ្នា​នេះ ប៉ុន្តែ ជា​ការ​សន្និដ្ឋាន​ក្រោយ​មក រាជ​រដ្ឋាភិបាល​បាន​ប្រកាស​ថា​ជា​ហេតុការណ៍​ដែល​កើត​ឡើង​ដោយ​ចៃដន្យ តែ​ប៉ុណ្ណោះ ហើយ​ក៏​គ្មាន​មន្រ្តី​ណា​ម្នាក់​ត្រូវ​បាន​ដាក់​ទោស​ឬ​ទទួល​ខុស​ត្រូវ​លើ​រឿង​នេះ​ដែរ៕

អត្ថបទគួរចាប់អារម្មណ៍