The Phnom Penh Post Search

Search form




Logo of Phnom Penh Post newspaper Phnom Penh Post - សាលា​ក្រុង​នឹង​សង់​រង្វង់​មូល​ថ្មី​មួយ​ទៀត​នៅ​ត្រើយ​ស្ពាន​ជ្រោយ​ចង្វារ​ខាង​កើត




សាលា​ក្រុង​នឹង​សង់​រង្វង់​មូល​ថ្មី​មួយ​ទៀត​នៅ​ត្រើយ​ស្ពាន​ជ្រោយ​ចង្វារ​ខាង​កើត

សាលា​ក្រុង​នឹង​សង់​រង្វង់​មូល​ថ្មី​មួយ​ទៀត​នៅ​ត្រើយ​ស្ពាន​ជ្រោយ​ចង្វារ​ខាង​កើត

121218_04
លោកកែប ជុតិមា អភិបាលរាជធានីភ្នំពេញ ផា លីណា

ភ្នំពេញៈ សាលា​រាជធានី​ភ្នំពេញ​នឹង​សាងសង់​រង្វង់​មូល​ថ្មី​មួយ​ទៀត​ត្រង់​ចំណុច​ត្រើយ​ខាង​កើត​ស្ពាន​ជ្រោយ​ចង្វារ តាម​បណ្តោយ​ផ្លូវ​ជាតិ​លេខ ៦អា ដើម្បី​សម្រួល​ការ​កកស្ទះ​សរាចរណ៍។ នេះ​បើ​យោង​ទៅ​តាម​សេចក្តី​ជូន​ដំណឹង​របស់​សាលា​រាជធានី​ភ្នំពេញ ដែល​បាន​ចេញ​ផ្សាយ​កាលពី​ថ្ងៃទី ១៧ ខែធ្នូ ឆ្នាំ​២០១២។

នៅ​ក្នុង​សេចក្តី​ជូន​ដំណឹង​របស់​សាលា​រាជធានី​ភ្នំពេញ​ចុះ​ថ្ងៃទី​១៧ ខែ​ធ្នូ ឆ្នាំ​២០១២ បាន​ជូន​ដំណឹង​ទៅ​ដល់​សារធារណៈ​ជន​ឲ្យ​ដឹង​ថា ដើម្បី​សម្រួល​ដល់​ការ​ធ្វើ​ចរាចរណ៍​ទៅ​មក​ឲ្យ​មាន​ភាព​ល្អ​ប្រសើរ​កាត់​បន្ថយ​បាន​នូវ​ការ​កកស្ទះ​ចរាចរណ៍​នោះ សាលា​រាជធានី​ភ្នំពេញ​នឹង​ស្ថាបនា​រង្វង់​មូល​ថ្មី​មួយ​ទៀត ដែល​មាន​ទីតាំង​ស្ថិត​នៅ​គល់​ស្ពាន​ជ្រោយ​ចង្វារ​ខាង​កើត​មាន​អង្កត់​ផ្ចិត​ស្មើ​នឹង​១៥៥​ម៉ែត្រ​ដែល​នឹង​ចាប់​ផ្តើម​ក្នុង​ពេល​ឆាប់ៗ​ខាង​មុខ​នេះ។

លោក ឡុង ឌីម៉ង់ មន្ត្រី​នាំ​ពាក្យ​សាលា​រាជធានី​ភ្នំពេញ​បាន​ឲ្យ​ដឹង​ថា ការ​សាងសង់​រង្វង់​មូល​ថ្មី​នេះ​ដោយ​សារ​តែ​មាន​ផលប៉ះពាល់​នៅ​ពេល​ស្ពាន​មួយ​ទៀត​កើត​ឡើង។ លោក បាន​បញ្ជាក់​ទៀត​ថា៖ «យើង​ឃើញ​ស្រាប់​ហើយ ស្ពាន​មាន​តែ​មួយ​យើង​ស្ទះ​ចរាចរណ៍​ប៉ុណ្ណឹង​ហើយ ចុះ​ទម្រាំ​តែ​មាន​ស្ពាន​មួយ​ទៀត ចំនួន​ចរាចរណ៍​នឹង​កើន​ឡើង។ ដូច្នេះ​ការ​សង់​រង្វង់​មូល​នេះ​មិន​ត្រឹម​តែ​បង្កើន​សោភ័ណភាព​ប៉ុណ្ណោះ​ទេ​តែ​ក៏​បញ្ចៀស​បាន​ចរាចរណ៍​មិន​ឲ្យ​កកស្ទះ​ផង​ដែរ»។

លោក ពេជ្រ សារឿន ចៅ​សង្កាត់​ជ្រោយ​ចង្វារ​បាន​ឲ្យ​ដឹង​ថា​ដើម្បី​សម្រួល​ដល់​ការ​សាងសង់​លោក​បាន​ជម្រាប​ដល់​ពលរដ្ឋ​ដែល​មាន​ទីតាំង​នៅ​ក្បែរ​នោះ​អស់​ហើយ​ពី​ផល​ប៉ះពាល់​និង​សំណង។ ការ​សាងសង់​នេះ​ធ្វើ​ឲ្យ​ប៉ះពាល់​ប្រជា​ពលរដ្ឋ ប្រហែល​ជា​៧៨​គ្រួសារ ប៉ុន្តែ​ខាង​អន្តរ​ក្រសួង​បាន​ដោះស្រាយ​សំណង​រួចរាល់​អស់​ហើយ នៅសល់​ប្រហែល​ជា​៥​គ្រួសារ​ប៉ុណ្ណោះ​ដែល​អាជ្ញាធរ​កំពុង​ដោះស្រាយ​បន្ត។

លោក បាន​ឲ្យ​ដឹង​ទៀត​ថា៖ «រាជរដ្ឋាភិបាល​បាន​គិត​គូរ​សំណង​ហ្មត់ចត់​ហើយ​មុន​ការ​ចាប់​ផ្តើម​សាងសង់​រង្វង់​មូល​នេះ»។

លោក​បាន​ឲ្យ​ដឹង​ទៀត​ថា នៅ​ពេល​ដែល​ការ​សាងសង់​រង្វង់​មូល​ចាប់​ផ្តើម​ចៀស​មិន​ផុត​ពី​បញ្ហា​កកស្ទះ​ចរាចរណ៍​ទេ ប៉ុន្តែ​អ្នក​ដំណើរ​គួរ​រក​ផ្លូវ​វាង​ដើម្បី​សម្រួល​ដល់​ការ​សាងសង់​និង​ងាយ​ស្រួល​ដល់​ការ​ធ្វើ​ដំណើរ​ផង។

គម្រោង​សាងសង់​រង្វង់​មូល​ថ្មី​មួយ​នោះ​មិន​ត្រូវ​បាន​មន្ត្រី​សាលា​រាជធានី​បញ្ជាក់​ថា​ត្រូវ​ចំណាយ​ថវិកា​អស់​ប៉ុន្មាន​នោះ​ទេ៕

អត្ថបទគួរចាប់អារម្មណ៍