The Phnom Penh Post Search

Search form




Logo of Phnom Penh Post newspaper Phnom Penh Post - សាលា​ក្រុង​ហាម​បិទ​ផ្សាយ​ពាណិជ្ជកម្ម​នៅ​ទីសាធារណៈ

សាលា​ក្រុង​ហាម​បិទ​ផ្សាយ​ពាណិជ្ជកម្ម​នៅ​ទីសាធារណៈ

សាលា​ក្រុង​ហាម​បិទ​ផ្សាយ​ពាណិជ្ជកម្ម​នៅ​ទីសាធារណៈ

ភ្នំពេញៈ សាលា​រាជធានី​ភ្នំពេញ បាន​បញ្ជា​ឲ្យ​ក្រុមហ៊ុន​ឯកជន អង្គការ សមាគម ឬ​ស្ថាប័ន​ឯកជន​ទាំង​អស់​ត្រូវ​បញ្ឈប់​ជា​បន្ទាន់​ក្នុង​ការ​បិទ និង​ចង​បដា​ផ្សាយ​ពាណិជ្ជកម្ម ឬ​ព័ត៌មាន​ផ្សេងៗ​នៅ​លើ​ដើម​ឈើ បង្គោល​ភ្លើង និង​អគារ​សាធារណៈ ដែល​ធ្វើ​ឲ្យ​ខូច​សោភ័ណភាព​រាជធានី។

យោង​តាម​សេចក្តី​ជូន​ដំណឹង​ដែល​គេ​ឃើញ​នៅ​លើ​គេហទំព័រ របស់​សាលា​រាជធានី​កាល​ពី​ម្សិលមិញ បាន​រៀប​រាប់​ថា​៖«​ដើម្បី​រួម​ចំណែក​រក្សា​សណ្តាប់ធ្នាប់​របៀប​រៀប​រយ​សាធារណៈ និង​សោភ័ណ​ភាព​រាជធានី​ភ្នំពេញ អង្គការ ក្រុមហ៊ុន ស្ថាប័ន​ឯកជន ឬ​សមាគម​ទាំង​អស់ ត្រូវ​បញ្ឈប់​ជា​បន្ទាន់ នូវ​សកម្មភាព​បិទ​ផ្សាយ​ពាណិជ្ជកម្ម ឬ​ព័ត៌មាន នៅ​តាម​ដើម​ឈើ បង្គោល​ភ្លើង របង​ការដ្ឋាន និង​អគារ​សាធារណៈ​ដែល​ធ្លាប់​បាន​ធ្វើ​កន្លង​មក​»។ សាលា​រាជធានី​បាន​បង្គាប់​ឲ្យ​អាជ្ញាធរ​មូលដ្ឋាន គ្រប់​លំដាប់​ថ្នាក់ ត្រូវ​យក​ចិត្ត​ទុក​ដាក់ សហការ​ឃ្លាំ​មើល និង​មាន​វិធានការ​យ៉ាង​ម៉ឺង​ម៉ាត់​ចំពោះ​ជន​ដែល​បាន​ប្រព្រឹត្ត​នូវ​សកម្មភាព​ទាំង​នេះ ហើយ​នាំ​យក​មក​អប់រំ​ណែនាំ​និង​ធ្វើ​កិច្ច​សន្យា​ចំពោះ​មុខ​សមត្ថកិច្ច។

សេចក្តី​ជូន​ដំណឹង​បន្ត​ថា​៖«ក្នុង​ករណី​មិន​រាង​ចាល​ត្រូវ​ធ្វើ​ការ​ផាក​ពិន័យ​អំពី​ការ​ធ្វើ​ឲ្យ​ប៉ះ​ពាល់​ដល់​សណ្តាប់ធ្នាប់​និង​របៀប​រៀបរយ​នៅ​ក្នុង​ទីក្រុង​ហើយ​អាជ្ញាធរ​មាន​សិទ្ធិ រុះរើ​ប័ណ្ណ​ផ្សាយ​ព័ត៌មាន និង​បដា​ដោយ​មិន​ទទួល​ខុស​ត្រូវ​រាល់​ការ​ខូច​ខាត​ផ្សេងៗ​ឡើយ​»។

អ្នក​នាំ​ពាក្យ​សាលា​រាជធានី លោក ឡុង ឌីម៉ង់ បាន​និយាយ​កាល​ពី​ថ្ងៃ​ម្សិលមិញ​ថា សាលា​រាជធានី​បាន​ជូន​ដំណឹង​អំពី​រឿង​នេះ​ជា​ច្រើន​ដង​មក​ហើយ។

លោក បាន​ថ្លែង​ថា​៖​«​ពួក​គេ​អាច​បិទ ឬ​ដាក់​បដា​ផ្សាយ​ពាណិជ្ជកម្ម​របស់​ពួក​គេ​បាន ប៉ុន្តែ​ពួក​គេ​ត្រូវ​សុំ​ការ​អនុញ្ញាត​ពី​សាលា​ក្រុង​ជា​មុន​សិន»​។

លោក​បាន​ឲ្យ​ដឹង​ថា មាន​ស្ថាប័ន​ខ្លះ​បាន​ជូន​ដំណឹង​ដល់​សាលា​រាជធានី ដើម្បី​ដាក់​បដា​ពាណិជ្ជកម្ម ឬ​ព័ត៌មាន​របស់​ពួក​គេ​នៅ​តាម​ទី​សាធារណៈ ហើយ​ពួក​គេ​ក៏​ត្រូវ​បាន​អនុញ្ញាត​ឲ្យ​ធ្វើ​ផង​ដែរ​។

លោក​បន្ត​ថា​៖ «​យើង​មាន​លក្ខខណ្ឌ​សម្រាប់​ពួក​គេ ក្នុង​ការ​បិទ​ការ​ផ្សាយ​ពាណិជ្ជកម្ម​ដូចជា​ពួក​គេ ត្រូវ​ធានា​ពី​សុវត្ថិភាព​ដល់​អ្នក​ធ្វើ​ដំណើរ​ដោយ​ចង​វា​ឲ្យ​មាន​ការ​ប្រុង​ប្រយ័ត្ន​ជ្រើស​រើស​ទី​កន្លែង​និង​ត្រូវ​មាន​កំណត់​រយៈ​ពេល​ប៉ុន្មាន​ថ្ងៃ​ផង​ដែរ​»៕ NR

អត្ថបទគួរចាប់អារម្មណ៍